ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ໃນໂອກາດທີ່ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ເດີນທາງຢ້ຽມຢາມ ແລະ ເຮັດວຽກຮ່ວມກັບ ຄະນະພັກແຂວງ, ສະພາປະຊາຊົນແຂວງ, ອໍານາດການປົກຄອງຂອງແຂວງອຸດົມໄຊ ລວມທັງພະແນກການອ້ອມຂ້າງແຂວງ ເຊິ່ງທ່ານໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ 12 ຂໍ້ ດັ່ງນີ້:


1. ແຂວງອຸດົມໄຊ ເປັນແຂວງໃຈກາງຂອງບັນດາແຂວງພາກເໜືອ ແລະ ເປັນແຂວງທາງຜ່ານ ລະ ຫວ່າງບັນດາແຂວງຢູ່ພາກເໜືອ ແລະ ບັນດາແຂວງພາກໃຕ້. ຈາກຈຸດພິເສດທາງດ້ານທີ່ຕັ້ງດັ່ງກ່າວ ເຮັດໃຫ້ມີການລົງທຶນດ້ານການຄ້າ, ດ້ານການບໍລິການທ່ອງທ່ຽວ, ການຂົນສົ່ງ ນັບມື້ເພີ່ມຂຶ້ນ; ມີນັກທຸລະກິດ, ນັກລົງທຶນເຂົ້າມາເປັນຈໍານວນຫຼາຍ. ສະນັ້ນ, ຈຶ່ງສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ປົກປັກຮັກສາຄວາມສະຫງົບແຂວງຂອງຕົນ; ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.
2. ແຂວງອຸດົມໄຊ ເປັນແຂວງທີ່ມີຫຼາຍຊົນເຜົ່າ (12 ຊົນເຜົ່າ) ທີ່ມີວັດທະນະທໍາ, ຮີດຄອງປະເພນີ ທີ່ຈົບງາມ ແລະ ເປັນເອກະລັກຂອງຕົນ, ມີພູມປັນຍາໃນການດໍາລົງຊີວິດ ແລະ ທໍາມາຫາກິນທີ່ດີເດັ່ນຂອງຕົນ, ຖ້າພວກເຮົາມີຄວາມສາມັກປອງດອງເປັນອັນໜຶ່ງອັນດຽວ ຈະເປັນກໍາລັງແຮງໃນການສ້າງສາພັດທະນາເສດຖະກິດ-ສັງຄົມ ໃຫ້ຈະເລີນຮຸ່ງເຮືອງ. ສະນັ້ນ,​ ຄະນະພັກ, ສະພາປະຊາຊົນແຂວງ ແລະ ອົງການປົກຄອງແຂວງອຸດົມໄຊ ຈະຕ້ອງໄດ້ເອົາໃຈໃສ່ສຶກສາອົບຮົມ ໃຫ້ປະຊາຊົນບັນດາເຜົ່າ ມີຄວາມສາມັກຄີປອງດອງ, ມີນໍ້າໃຈຮັກຊາດ ແລະ ມີນໍ້າໃຈເສຍສະຫຼະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ. ພ້ອມກັນນັ້ນ, ກໍສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນຕາມກົດໝາຍກໍານົດ ຢ່າງມີປະສິດທິພາບ ເພື່ອສຶກສາອົບຮົມບັນດາຊັ້ນຄົນໃຫ້ມີຄວາມສາມັກຄີປອງດອງ, ຕື່ນຕົວ ແລະ ເປັນເຈົ້າການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
3. ແຂວງອຸດົມໄຊ ເຖິງວ່າເປັນແຂວງທີ່ມີພູດອຍກວມເຖິງ 85% ກໍຕາມ ແຕ່ຖ້າເບິ່ງທາງດ້ານຄວາມໜາແໜ້ນຂອງປະຊາກອນ 23 ຄົນຕໍ່ 1 ກິໂລຕາແມັດ ເຫັນວ່າເປັນແຂວງທີ່ມີເນື້ອທີ່ດິນຫວ່າງສໍາລັບການຜະລິດກວ້າງຂວາງ, ເປັນເຂດທີ່ມີດິນອຸດົມສົມບູນ, ອາກາດຊຸ່ມຊື່ນ ເໝາະສົມກັບການຜະລິດກະສິກໍາປະເພດຕ່າງໆ, ດິນຟ້າອາກາດກໍເອື້ອອໍານວຍໃຫ້ແກ່ການຜະລິດກະສິກໍາ, ການລ້ຽງສັດ ເຊິ່ງເປັນທ່າແຮງບົ່ມຊ້ອນສໍາຄັນຂອງແຂວງ; ປະຊາຊົນບັນດາເຜົ່າມີມູນເຊື້ອດຸໝັ່ນໃນການອອກແຮງງານ. ສະນັ້ນ, ຈຶ່ງສະເໜີໃຫ້ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ ຂະແໜງການທີ່ກ່ຽວ ຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາເປັນສິນຄ້າ ໃຫ້ມີຄວາມເໝາະສົມ; ຄົ້ນຄວ້າກໍານົດທ່າແຮງບົ່ມຊ້ອນ ດ້ານອາກາດ, ນໍ້າ, ດິນ, ໂຄງລ່າງ ໃນການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ ການປູກເຂົ້າ, ການປູກໝາກໄມ້ກິນໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປຸງແຕ່ງຜະລິດຕະພັນກະສິກໍາ, ການຫຸ້ມຫໍ່ຫັດຖະກໍາ ເພື່ອສາມາດເປັນຂອງຕ້ອນຂອງຝາກ ໃຫ້ແຂກບ້ານແຂກເມືອງ; ການລ້ຽງສັດໃຫຍ່ເປັນສິນຄ້າ ກໍເປັນທ່າແຮງ ແລະ ມີຕະຫຼາດຕ່າງປະເທດຮອງຮັບ ເຊິ່ງຈະເປັນຖານລາຍຮັບສໍາຄັນຂອງແຂວງ ທັງເປັນການສ້າງອາຊີບ ແລະລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ເອົາໃຈໃສ່ການສ້າງຄອບຄົວຕົວແບບຂອງການຜະລິດໃຫ້ເພີ່ມຂຶ້ນ ເພື່ອເປັນແບບຢ່າງ ແລະ ຖ່າຍທອດບົດຮຽນໃຫ້ຄອບຄົວອື່ນຕໍ່ໆໄປ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ. ເມື່ອຂາຍຜົນຜະລິດໄດ້ເງິນມາແລ້ວ ກໍໃຫ້ປະຢັດມັດທະຍັດ ເພື່ອເປັນທຶນຮອນຂະຫຍາຍການຜະລິດ. ຖອດຖອນບົດຮຽນຈາກບາງແຂວງ ທີ່ບໍ່ໄດ້ກໍານົດແຜນການພັດທະນາເສດຖະກິດລະອຽດ, ເມື່ອມັນຕົ້ນລາຄາສູງ ກໍພາກັນປູກມັນຕົ້ນ, ໄດ້ຜົນຕອບແທນໄວ ແລະ ໃນໄລຍະນີ້ຜົນຕອບແທນກໍສູງ. ແຕ່ການປູກມັນຕົ້ນມີຜົນກະ ທົບຕໍ່ຄຸນນະພາບຂອງດິນ, ເຮັດໃຫ້ດິນເຊື່ອມຄຸນນະພາບໄວ. ສະນັ້ນ, ອົງການປົກຄອງຈະຕ້ອງໄດ້ອະທິບາຍໃຫ້ປະຊາຊົນເຂົ້າໃຈ, ເຮັດແນວໃດການພັດທະນາເສດຖະກິດ ໃຫ້ມີຄວາມຍືນຍົງຕາມທ່າແຮງຂອງແຂວງເຮົາ.
4. ແຂວງອຸດົມໄຊ ເປັນແຂວງທີ່ມີຊັບພະຍາກອນທໍາມະຊາດອັນມີຄ່າຫຼາຍຊະນິດ ເປັນຕົ້ນ ບໍ່ຄໍາ, ບໍ່ທອງແດງ, ບໍ່ເຫຼັກ, ຄໍາຕົກຂ້ອນ ແລະ ແຮ່ທີ່ມີຄຸນຄ່າປະເພດຕ່າງໆ ເຊິ່ງໂຄງການຈໍານວນໜຶ່ງກໍຢູ່ໃນໄລຍະການຂຸດຄົ້ນແລ້ວ ແລະ ຈະເປັັນທ່າແຮງທາງດ້ານເສດຖະກິດຂອງແຂວງເຮົາ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີຄວາມເອົາໃຈໃສ່ໃນການຄຸ້ມຄອງ ເຮັດໃຫ້ການຈັດຕັ້ງປະຕິບັດໂຄງການ ມີຄວາມເຂັ້ມງວດຕາມກົດໝາຍ, ຕາມສັນຍາສໍາປະທານ, ນໍາຜົນປະໂຫຍດມາສູ່ປະເທດຊາດ ແລະ ປະຊາຊົນບັນດາເຜົ່າ, ເປັນແຫຼ່ງລາຍຮັບງົບປະມານຂອງແຂວງ ເພື່ອນໍາໃຊ້ເຂົ້າໃນການພັດທະນາໂຄງລ່າງພື້ນຖານ ໃຫ້ມີການປັບປຸງດີຂຶ້ນ; ສ້າງວຽກເຮັດງານທໍາທີ່ໝັ້ນຄົງ, ສ້າງລາຍຮັບໃຫ້ແກ່ ພໍ່ແມ່ປະຊາຊົນ, ເຮັດໃຫ້ຊີວິດການເປັນຢູ່ນັບມື້ດີຂຶ້ນ.
5. ແຂວງອຸດົມໄຊ ເປັນແຂວງທີ່ມີແຫຼ່ງທ່ອງທ່ຽວທໍາມະຊາດຫຼາຍແຫ່ງ ທີ່ສວຍງາມ ແລະ ດຶງດູດຄວາມສົນໃຈຂອງນັກທ່ອງທ່ຽວພາຍໃນ ແລະ ຕ່າງປະເທດ ເປັນຕົ້ນ ແຫຼ່ງທ່ອງທ່ຽວທໍາມະຊາດນໍ້າກັດຢໍລະປາ, ແຫຼ່ງທ່ອງທ່ຽວທໍາມະຊາດນໍໍ້າພາກ, ແຫຼ່ງທ່ອງທ່ຽວທໍາມະຊາດເມືອງປາກແບງ ແລະ ແຫຼ່ງທ່ອງທ່ຽວນໍ້າຕົກຕາດຕ່າງໆ; ສະຖານທີ່ທ່ອງທ່ຽວວັດທະນະທໍາ ຕິດພັນກັບເອກະລັກ ແລະ ພູມປັນຍາຂອງຊົນເຜົ່າຕ່າງໆ ກໍມີຫຼາຍແຫ່ງ; ອາກາດໜາວເຢັນ, ສົດຊື່ນ, ປອດໂປ່ງ ຈຶ່ງເປັນສິ່ງດຶງດຸດນັກທ່ອງທ່ຽວ. ພ້ອມກັນນັ້ນ, ຍັງເປັນແຂວງທີ່ມີທາງລົດໄຟຄວາມໄວສູງແລ່ນຜ່ານ ເຊິ່ງເປັນເງື່ອນໄຂອໍານວຍຄວາມສະດວກໃຫ້ແກ່ການເດີນທາງມາພັກຜ່ອນຂອງນັກທ່ອງທ່ຽວຢູ່ແຂວງອຸດົມໃຊ້ ຂອງນັກທ່ອງທ່ຽວພາຍໃນ ແລະ ຕ່າງປະເທດ, ເປັນທ່າແຮງດ້ານໜຶ່ງຂອງແຂວງອຸດົມໄຊ ໃນການພັດທະນາເສດຖະກິດ-ສັງຄົມ ໃຫ້ຂະຫຍາຍຕົວ. ສະນັ້ນ, ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາ ໃນການປົກປັກຮັກສາແຫຼ່ງທ່ອງທ່ຽວໃຫ້ມີຄວາມຍືນຍົງ, ດຶງດູດການລົງທຶນເຂົ້າໃນການພັດທະນາແຫຼ່ງທ່ອງທ່ຽວດັ່ງກ່າວ ໃຫ້ເປັນຖານລາຍຮັບດ້ານງົບປະມານຂອງແຂວງ. ພ້ອມກັນນັ້ນ ກໍເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວດັ່ງກ່າວໃຫ້ມີຄວາມກົມກຽວ ແລະ ຊຸກຍູ້ສົ່ງເສີມ ເຊິ່ງກັນ ແລະ ກັນ ແລະ ພ້ອມກັນພັດທະນາຢ່າງບໍ່ຢຸດຢັ້ງ.
6. ການພັດທະນາຊັບພະຍາກອນມະນຸດ ເປັນວຽກງານທີ່ມີຄວາມສໍາຄັນ ແລະ ເປັນຂໍກຸນແຈຕັດສິນຜົນສໍາເລັດຂອງວຽກງານຂະແໜງການຕ່າງໆ, ຖ້າແຂວງເຮົາມີບຸກຄະລາກອນທີ່ມີຄວາມຮູ້, ຄວາມສາມາດ ກໍຈະເຮັດໃຫ້ການສ້າງສາພັດທະນາເສດຖະກິດ-ສັງຄົມມີປະສິດທິຜົນສູງ. ສະນັ້ນ, ຈຶ່ງສະເໜີໃຫ້ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງອຸດົມໄຊ ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການພັດທະນາເສດຖະກິດ-ສັງຄົມ, ສາມາດສະໜອງບຸກຄະລາກອນໃຫ້ແກ່ໂຄງການລົງທຶນຕ່າງໆ; ເອົາໃຈໃສ່ການສ້າງວິຊາຊີບໃຫ້ປະຊາຊົນບັນດາເຜົ່າ ເພື່ອເຮັດໃຫ້ການອອກແຮງງານມີປະສິດທິຜົນສູງຂຶ້ນ ໂດຍສະເພາະ ການເຝິກວິຊາຊີບໃຫ້ແກ່ຊາວໜຸ່ມທີ່ເປັນລູກຫຼານ ຫັນມາເປັນເຈົ້າຂອງກິດຈະການຂະໜາດນ້ອຍ, ຂະໜາດກາງ ເຮັດການຜະລິດກະສິກໍາເປັນສິນຄ້າ ຕາມທ່າແຮງຂອງແຂວງເຮົາ ທັງສ້າງເງື່ອນໄຂໃຫ້ລູກຫຼານໄດ້ຢູ່ຮ່ວມກັບຄອບຄົວ ເຮັດໃຫ້ຄອບຄົວມີຄວາມອົບອຸ່ນ.
7. ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດຢູ່ແຂວງ ໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື້ອຍໆ. ສ້າງເງື່ອນໄຂໃຫ້ປະຊາຊົນບັນດາເຜົ່າ ສາມາດເຂົ້າຮ່ວມ, ປະກອບຄໍາເຫັນ, ຕິດຕາມກວດກາການບໍລິຫານລັດ; ປະຊາຊົນໄດ້ຮັບຮູ້ ການເຄື່ອນໄຫວຂອງສະມາຊິກສະພາປະຊາຊົນຂັ້ນແຂວງ ທີ່ເປັນຕົວແທນຂອງຕົນ.
8. ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ມາຮອດປັດຈຸບັນ ກໍເປັນເວລາ 1 ປີ ທີ່ກອງປະຊຸມສະໄໝວິສາມັນ ເທື່ອທີ 1​ ຂອງສະພາແຫ່ງຊາດ ຊຸດທີ IX ໄດ້ຜັນຂະຫຍາຍແນວທາງນະໂຍບາຍຂອງພັກ ເປັນມະຕິກອງປະຊຸມສະພາແຫ່ງຊາດ ໃຫ້ມີຜົນບັງຄັບໃຊ້ໃນຂອບເຂດທົ່ວປະເທດ. ສະນັ້ນ, ຈຶ່ງສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງອຸດົມໄຊ ເພີ່ມທະວີການໂຄສະນາເຜີຍແຜ່ຢ່າງກວ້າງຂວາງ ແລະ ຖືເອົາວາລະແຫ່ງຊາດ ເປັນພາລະກິດທົ່ວປວງຊົນ ເຊິ່ງສະມາຊິກພັກ, ພະນັກງານ-ລັດຖະກອນ ກໍຄື ພໍ່ແມ່ປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ;​ ຄຸ້ມຄອງການເກັບລາຍຮັບງົບປະມານບໍ່ໃຫ້ຮົ່ວໄຫຼ ມີກົນໄກຕິດຕາມ, ກວດກາຢ່າງເຂັ້ມງວດ; ເອົາໃຈໃສ່ການຄຸ້ມຄອງລາຍຈ່າຍ ແລະ ຈັດຕັ້ງປະຕິບັດບັນດາມາດຕະ ການປະຢັດ, ເຂັ້ມງວດວິໄນລາຍຈ່າຍ,​ ປະຢັດລາຍຈ່າຍບໍລິຫານ ແລະ ການລົງທຶນຂອງລັດ. ໃນທ້າຍປີ 2023 ນີ້ພວກເຮົາກໍຈະໄດ້ສະຫຼຸບຕີລາຄາການຈັດຕັ້ງປະຕິບັດ ເຊິ່ງເປັນວຽກງານທີ່ມີຄວາມສໍາຄັນຫຼາຍໃນຍຸກສະໄໝຂອງພວກເຮົາ ທີ່ຈະນໍາພາປະເທດຊາດ ບໍ່ໃຫ້ຕົກຢູ່ໃນສະພາບວິກິດການທາງດ້ານເສດຖະກິດ ອັນໜັກໜ່ວງ.
9. ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ເຊິ່ງເຫັນວ່າຢາເສບຕິດເປັນໄພອັນຕະລາຍຕໍ່ສັງຄົມ, ເປັນສາເຫດຂອງການເກີດອາດຊະຍາກໍາປະເພດຕ່າງໆ. ສະນັ້ນ, ຄະນະພັກ, ສະພາປະຊາຊົນແຂວງ, ອົງການປົກຄອງແຂວງອຸດົມໄຊ ເອົາໃຈໃສ່ປຸກລະດົມຂົນຂວາຍໃຫ້ພໍ່ແມ່ປະຊາຊົນບັນດາເຜົ່າ ເຫັນໄດ້ຜົນຮ້າຍຂອງບັນຫາຢາເສບຕິດ ທີ່ມີຕໍ່ປະເທດຊາດ, ສັງຄົມ, ຄອບຄົວ ກໍຄື ສຸຂະພາບຂອງລູກຫຼານ. ສະນັ້ນ, ທຸກພາກສ່ວນໃນສັງຄົມ ຈະຕອ້ງໄດ້ພ້ອມກັນເຂົ້າຮ່ວມໃນການຈັດຕັ້ງປະຕິບັດວາລະແຫ່ງຊາດດັ່ງກ່າວ, ບໍ່ປ່ອຍປະໃຫ້ແຕ່ສອງກໍາລັງປະກອບອາວຸດ ເປັນຜູ້ແກ້ໄຂບັນຫາຢາເສບຕິດ; ຖືເອົາການແກ້ໄຂບັນຫາຢາເສບຕິດ ຕິດພັນກັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ການສົ່ງເສີມການຜະລິດ, ສ້າງວຽກເຮັດງານທໍາ, ການສ້າງລາຍໄດ້ແກ່ປະຊາຊົນ. ເມື່ອໃດສັງຄົມມີຄວາມເຂັ້ມແຂງ, ມີຊີວິດການເປັນຢູ່ທີ່ດີແລ້ວ ກໍຈະເຮັດໃຫ້ການຕ້ານກັບບັນຫາຢາເສບຕິດ ມີຄວາມເຂັ້ມແຂງ. ເອົາໃຈໃສ່ວຽກງານການບໍາບັດຜູ້ຕິດຢາເສບຕິດ ໂດຍເນັ້ນໃສ່ການປິ່ນປົວ, ຟື້ນຟູສຸຂະພາບ ເພື່ອໃຫ້ຜູ້ຕິດຢາທີ່ເປັນລູກຫຼານຂອງພໍ່ແມ່ປະຊາຊົນ ມີສຸຂະພາບແຂງແຮງ, ກັບຄືນສູ່ສັງຄົມ ແລະ ສາມາດທໍາມາຫາກິນໄດ້ຢ່າງເປັນປົກກະຕິ. ປັບປຸງສະຖານທີ່ຄຸມຂັງ, ສະຖານທີ່ບໍາບັດຜູ້ຕິດຢາເສບຕິດ ໃຫ້ມີສະພາບແວດລ້ອມທີ່ດີ ເພື່ອບໍ່ໃຫ້ສົ່ງຜົນກະທົບຕໍ່ສຸຂະພາບຂອງ ນັກໂທດ, ຜູ້ຕ້ອງຫາ ຫລື ຜູ້ບໍາບັດຢາເສບຕິດ, ຖືເປັນນະໂຍບາຍດ້ານສິດທິມະນຸດຂອງປະເທດເຮົາ.
10. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ສືບຕໍ່ເອົາໃຈໃສ່ຊີ້ນໍາອົງການປົກຄອງແຕ່ລະຂັ້ນ ຕິດຕາມ, ເກັບກໍາຂໍ້ມູນ ການລະບາດຂອງພະຍາດໂຄວິດ-19 ຢູ່ທ້ອງຖິ່ນຂອງຕົນ ເພື່ອສາ ມາດກໍາໄດ້ສະພາບ ແລະ ແກ້ໄຂບັນຫາໃຫ້ທັນເວລາ; ເພີ່ມທະວີການນໍາພາຊີ້ນໍາ ຂະແໜງການທີ່ກ່ຽວຂ້ອງ ໃນການກວດຫາເຊື້ອ, ການປິ່ນປົວຜູ້ຕິດເຊື້ອ ດ້ວຍຄວາມເອົາໃຈໃສ່ ເພື່ອເຮັດໃຫ້ການລະບາດຂອງພະຍາດ ຢູ່ໃນຂອບເຂດຈໍາກັດ; ຕິດຕາມ,​ ຊຸກຍູ້ ພໍ່ແມ່ປະຊາຊົນພາຍໃນແຂວງ ໃນການສັກຢາວັກຊິນໃຫ້ຄົບຖ້ວນ.
11. ການເຄື່ອນໄຫວວຽກງານຂອງສະພາປະຊາຊົນແຂວງອຸດົມໄຊ ໃນໄລຍະຜ່ານມາກໍມີຜົນສໍາເລັດຫຼາຍດ້ານ ແລະ ສາມາດສ້າງປະສົບປະການນັບມື້ດີຂຶ້ນ. ເຖິງແນວໃດກໍຕາມ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນຕໍ່ໜ້າ ຈຶ່ງສະເໜີໃຫ້ຄະນະພັກແຂວງອຸດົມໄຊ ເພີ່ມທະວີຄວາມເອົາໃຈໃສ່ນໍາພາການປະຕິບັດໜ້າທີ່ຂອງສະພາປະຊາຊົນແຂວງ ເຮັດໃຫ້ການເປັນອົງການຕົວແທນ ແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າພາຍໃນແຂວງ ມີຄຸນນະພາບ ແລະ ປະສິດທິຜົນສູງຂຶ້ນ ໂດຍສະເພາະ ການກະກຽມເນື້ອໃນກອງປະຊຸມສະໄໝສາມັນຂອງສະພາປະຊາຊົນແຂວງ ເພື່ອພິຈາລະນາຮັບຮອງເອົາບັນຫາສໍາຄັນຂອງແຂວງ, ການພິຈາລະນາຮັບຮອງນິຕິກໍາທີ່ສໍາຄັນຂອງແຂວງ ລວມທັງການເຄື່ອນໄຫວຕິດຕາມກວດກາຂອງສະພາປະຊາຊົນແຂວງອຸດົມໄຊ ເຊິ່ງຈະເປັນຂໍ້ມູນໃຫ້ແກ່ຄະນະພັກແຂວງ ໃນການປັບປຸງແກ້ໄຂບັນຫາຕ່າງໆໄດ້ຢ່າງຖືກຕ້ອງ; ສະເໜີໃຫ້ຄະນະພັກ, ອົງການປົກຄອງແຂວງ ເພີ່ມທະວີການນໍາພາຊີ້ນໍາ ຂະແໜງການກ່ຽວຂ້ອງຂອງແຂວງ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການປັບປຸງກົງຈັກຊ່ວຍວຽກຂັ້ນຂະແໜງການຂອງສະພາປະຊາຊົນແຂວງ ລວມທັງບຸກຄະລາກອນ ໃຫ້ສາມາດຮັບປະກັນການປະຕິບັດໜ້າທີ່ການເມືອງໄດ້ຮັບຜົນສໍາເລັດ ລວມທັງການຍົກສູງບົດບາດການເຄື່ອນໄຫວວຽກງານ ຂອງສະມາຊິກສະພາປະຊາຊົນແຂວງ ທີ່ປະຈໍາຢູ່ເມືອງ ໃຫ້ນັບມື້ດີຂຶ້ນ.
12. ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ເປັນອົງການຈັດຕັ້ງທີ່ຄະນະປະຈໍາສະພາແຫ່ງຊາດສ້າງຕັ້ງ ແລະ ປະຕິບັດໜ້າທີ່ວຽກງານຢູ່ທ້ອງຖິ່ນ ເພື່ອເຮັດໃຫ້ການປະຕິບັດໜ້າທີ່ຂອງ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ໄດ້ຮັບຜົນສໍາເລັດດ້ວຍປະສິດທິຜົນສູງນັ້ນ ຈະຕ້ອງໄດ້ເອົາໃຈໃສ່ເກັບກໍາ, ສັງລວມເອົາບັນຫາຕ່າງໆ ກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ນໍາໄປສະເໜີຕໍ່ກອງປະຊຸມສະພາແຫ່ງຊາດ ເພື່ອພິຈາລະນາ, ຊອກຫາວິທີການແກ້ໄຂ. ພາຍຫຼັງກອງປະຊຸມສະພາແຫ່ງຊາດ ຕົກລົງເປັນມະຕິກອງປະຊຸມສະພາແຫ່ງຊາດແລ້ວ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກໍນໍາເອົາການຕົກລົງຂອງສະພາແຫ່ງຊາດ ມາລາຍງານຕໍ່ຄະນະພັກແຂວງ, ປະສານສົມທົບກັບສະພາປະຊາຊົນແຂວງ, ອົງການປົກຄອງແຂວງ ຈັດຕັ້ງຜັນຂະຫຍາຍ ລວມທັງຕິດຕາມຊຸກຍູ້ການຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ.