ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນໂອກາດທີ່ເດີນທາງຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ອໍານາດການປົກຄອງເມືອງສິງ ແຂວງຫຼວງນໍ້າທາ ຂອງທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໃນວັນທີ 17 ສິງຫາ 2022 ເຊິ່ງທ່ານ ໄດ້ມີຄໍາເຫັນໂອ້ລົມ ແລະ ເນັ້ນຕໍ່ອໍານາດການປົກຄອງເມືອງສິງ 10 ບັນຫາສໍາຄັນດັ່ງນີ້:
1. ເມືອງສິງ ເປັນເມືອງທີ່ມີຊາຍແດນທາງບົກ ຕິດຈອດກັບຕ່າງປະເທດ ຄື ສປຈີນ ທີ່ມີຄວາມຍາວ 75 ກິໂລ ແມັດ ແລະ ຕິດຈອດກັບມຽນມາ ມີຄວາມຍາວ 49 ກິໂລແມັດ ເຊິ່ງເປັນເງື່ອນໄຂອັນດີໃຫ້ແກ່ການຄ້າຂາຍ, ແລກປ່ຽນສິນຄ້າ. ຄຽງຄູ່ກັນນັ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍຈະຕ້ອງໄດ້ເພີ່ມທະວີຄວາມເອົາໃຈໃສ່ ເພື່ອສະກັດກັ້ນຄົນບໍ່ດີນໍາໃຊ້ເຂດຊາຍແດນດັ່ງກ່າວ. ສະນັ້ນ, ຈຶ່ງສະເໜີໃຫ້ຄະນະພັກ, ອົງການປົກຄອງເມືອງສິງ ເພີ່ມທະວີຄວາມເອົາໃຈໃສ່ ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຂອງພັກ, ນໍາພາວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ໜັກແໜ້ນ, ເຂັ້ມແຂງ ສາມາດຕອບໂຕ້ ແລະ ແກ້ໄຂອາດຊະຍາກໍາປະເພດຕ່າງໆຢ່າງວ່ອງໄວ, ທັນເວລາ ແລະ ເດັດຂາດ; ເອົາໃຈໃສ່ປັບປຸງສອງກໍາລັງໃຫ້ມີຄວາມເຂັ້ມແຂງ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່.
2. ເມືອງສິງ ເຖິງວ່າເປັນເມືອງທີ່ມີເນື້ອທີ່ພູດອຍກວມເອົາ 85%, ແຕ່ເປັນເມືອງທີ່ມີເນື້ອທີ່ດິນທີ່ສາມາດຮອງຮັບໃຫ້ແກ່ການຜະລິດກະສິກໍາເຖິງ 22.898 ເຮັກຕາ ເຊິ່ງເປັນເນື້ອທີ່ດິນກວ້າງຂວາງ, ດິນມີຄວາມອຸດົມສົມບູນ, ມີແມ່ນໍ້າຫຼາຍສາຍທີ່ສາມາດສະໜອງນໍ້າໃຫ້ແກ່ການຜະລິດກະສິກໍາ, ການລ້ຽງສັດ; ເປັນເມືອງທີ່ມີທິວທັດທໍາມະຊາດສວຍງາມ, ເໝາະກັບການທ່ອງທ່ຽວຊົມທໍາມະຊາດ ແລະ ທ່ອງທ່ຽວດ້ານວັດທະນະທໍາ, ຈຶ່ງສະເໜີໃຫ້ ຄະນະພັກ, ອົງການປົກຄອງເມືອງ ເອົາໃຈໃສ່ຊຸກຍູ້ສົົ່ງເສີມ ແລະ ສ້າງເງື່ອນໄຂ ໃຫ້ປະຊາຊົນເຮັດການຜະລິດກະສິກໍາ, ການລ້ຽງສັດ ເປັນສິນຄ້າ, ມີມາດຕະຖານ, ມີຄຸນນະພາບ ເພື່ອສະໜອງໃຫ້ບັນດາໂຮງແຮມ, ຮ້ານອາຫານ, ຕະຫຼາດຕ່າງໆ ເຊິ່ງເປັນບ່ອນຮອງຮັບຜົນຜະລິິດຂອງປະຊາຊົນ, ເປັນການສ້າງວຽກເຮັດງານທໍາ, ສ້າງລາຍຮັບທີ່ໝັ້ນຄົງ ໃຫ້ແກ່ປະຊາຊົນບັນດາເຜົ່າ. ສະນັ້ນ, ຈຶ່ງສະເໜີໃຫ້ບັນດາສະຫາຍ ນໍາໃຊ້ທ່າແຮງດັ່ງກ່າວ ເຂົ້າໃນການສ້າງສາພັດທະນາເສດຖະກິດ-ສັງຄົມ ຂອງເມືອງສິງ ໃຫ້ມີບາດກ້າວຫັນປ່ຽນທີ່ຕັ້ງໜ້າ. ເອົາໃຈໃສ່ຊຸກຍູ້ສົ່ງເສີມວິສາຫະກິດຂະໜາດນ້ອຍ ແລະ ກາງ ດ້ວຍການສ້າງເງື່ອນໄຂໃຫ້ສາມາດເຂົ້າເຖິງແຫຼ່ງທຶນ, ເຂົ້າເຖິງຕະຫຼາດ ແລະ ການສົ່ງເສີມດ້ານອື່ນໆ ເຮັດໃຫ້ວິສາຫະກິດດັ່ງກ່າວ ມີຄວາມເຂັ້ມແຂງ ກາຍເປັນຖານລາຍຮັບງົບປະມານຂອງເມືອງ.
3. ເມືອງສິງ ເປັນເມືອງບໍ່ໃຫຍ່, ພົນລະເມືອງບໍ່ຫຼາຍ (44.147 ຄົນ), ຖານລາຍຮັບຍັງມີຈໍານວນຈໍາກັດ, ເຮັດໃຫ້ຕົວເລກງົບປະມານລາຍຮັບຍັງບໍ່ສູງ ແຕ່ມີທ່າແຮງດ້ານການທ່ອງທ່ຽວທໍາມະຊາດ, ເນື້ອທີ່ດິນທໍາການຜະລິດກະສິກໍາ ແລະ ທ່າແຮງດ້ານອື່ນໆຈໍານວນໜຶ່ງ ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຄົ້ນຄວ້າວາງແຜນພັດທະນາເສດຖະກິດ-ສັງຄົມຂອງເມືອງຕົນ ໃຫ້ສອດຄ່ອງກັບທ່າແຮງບົ່ມຊ້ອນ, ຄົ້ນຄວ້າຈັດແບ່ງເຂດການຜະລິດ, ການລົງທຶຶນໃຫ້ລະອຽດ ເພື່ອສຸມທຶນຮອນ, ເຕັກນິກ, ວິຊາການ ເຂົ້າໃສ່ການລົງທຶນດັ່ງກ່າວ ໃຫ້ບັນລຸຜົນສໍາເລັດ.
4. ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ ເປັນວຽກງານທີີ່ຮີບດ່ວນ ທີ່ອົງຄະນະພັກ, ອົງການປົກຄອງທຸກຂັ້ນ ຕະຫຼອດຮອດພະນັກງານ, ທະຫານ, ຕໍາຫຼວດ ກໍຄືປະຊາຊົນບັນດາເຜົ່າ ຕ້ອງໄດ້ພ້ອມກັນຈັດຕັ້ງປະຕິບັດດ້ວຍຄວາມຮັບຜິດຊອບສູງ ແລະ ເປັນວິທີທາງດຽວ ທີ່ຈະນໍາພາປະເທດຊາດ ໃຫ້ຫຼຸດພົ້ນຈາກວິກິດການທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ໃຫ້ບັນລຸຜົນສໍາເລັດ ຈຶ່ງສະເໜີມາຍັງຄະນະພັກ, ອົງການປົກຄອງເມືອງສິງ ຈົ່ງໄດ້ເພີ່ມທະວີການນໍາພາຊີ້ນໍໍາ ຈັດຕັ້ງປະຕິບັດວາລະແຫ່ງຊາດຢ່າງຕັ້ງໜ້າ ແລະ ຖືເປັນພັນທະຂອງພົນລະເມືອງທຸກຄົນ ເປັນຕົ້ນ ການປະຕິບັດນະໂຍບາຍປະຢັດມັດທະຍັດງົບປະມານຂອງລັດ, ຫຼີກລ່ຽງການສ້າງແຜນການລົງທຶນຂອງລັດ ເກີນຄວາມສາມາດໃນການຊໍາລະສະສາງ ເຊິ່ງຈະເກີດໜີ້ສິນໃນອະນາຄົດ; ການຂຸດຄົ້ນແຫຼ່ງລາຍຮັບ ແລະ ຊຸກຍູ້ສົ່ງເສີມປະຊາຊົນເຮັດການຜະລິດ ເພື່ອສ້າງຖານລາຍຮັບໃໝ່, ການແກ້ໄຂບັນຫາຮົ່ວໄຫຼຂອງງົບປະມານ ແລະ ອື່ນໆ. ການສະກັດກັ້ນ ແລະ ແກ້ໄຂບັນຫາຢາເສບຕິດ ກໍເປັນວຽກງານທີ່ສໍາຄັນ ເຊິ່ງບັນຫາດັ່ງກ່າວ ເປັນໄພອັນຕະລາຍຕໍ່ໍ່ໍ່ປະເທດຊາດ, ເປັນປາກົດການຫຍໍ້ທໍ້ຂອງສັງຄົມ ຈຶ່ງສະເໜີໃຫ້ເອົາໃຈໃສ່ສະກັດກັ້ນບັນຫາຢາເສບຕິດ ເຊິ່ງຈະສົ່ງຜົນກະທົບຕໍ່ລູກຫຼານ ທີ່ເປັນອະນາຄົດຂອງປະເທດຊາດພວກເຮົາ.
5. ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຮຽກຮ້ອງຕ້ອງການ ຂອງການສ້າງສາພັດທະນາພາຍໃນເມືອງຂອງເຮົາ ເປັນຕົ້ນ ການສ້າງນັກວິຊາການດ້ານການປູກຝັງ-ລ້ຽງສັດ ເພື່ອເຮັດໃຫ້ການຜະລິດກະສິກໍາພາຍໃນເມືອງຂອງເຮົາຂະຫຍາຍຕົວ ແລະ ມີຄວາມເຂັ້ມແຂງ; ສຶກສາອົບຮົມໃຫ້ປະຊາຊົນຮັກສາມູນເຊື້ອຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫຼະເພື່ອຜົນປະໂຫຍດສ່ວນລວມ; ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ; ເພີ່ມທະວີການເຝິກອົບຮົມສີມືແຮງງານ ໃຫ້ມີຄຸນນະພາບ, ປະຊາຊົນມີວຽກເຮັດງານທໍາ, ມີລາຍຮັບ ແລະ ມີຊີວິດການເປັນຢູ່ທີ່ໝັ້ນຄົງດີຂຶ້ນ.
6. ເມືອງສິງ ເປັນເມືອງທີ່ມີຊາຍແດນຕິດກັບ 2 ປະເທດ, ໃນເງື່ອນໄຂການພັດທະນາເສດຖະກິດຂອງເມືອງສິງ ຍັງບໍ່ທັນເຂັ້ມແຂງ ຊາວໜຸ່ມທີ່ເປັນລູກຫຼານ ມັກມີແນວຄິດໄປອອກແຮງງານຢູ່ຕ່າງປະເທດ ເຊິ່ງມີຄວາມເປັນຫ່ວງ ແລະ ມີຄວາມສ່ຽງຫຼາຍດ້ານ. ສະນັ້ນ, ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ ການສຶກສາອົບຮົມໃຫ້ລູກຫຼານ ເຫັນໄດ້ທ່າແຮງບົ່ມຊ້ອນທາງດ້ານເສດຖະກິດຂອງປະເທດເຮົາ ເປັນຕົ້ນ ເຮົາມີທີ່ດິິນອັນອຸດົມສົມບູນ, ເໝາະກັບການຜະລິດກະສິກໍາເປັນສິນຄ້າ, ເຮົາມີຕະຫຼາດພາຍໃນ ແລະ ຕ່າງປະເທດຮອງຮັບ. ສະນັ້ນ, ລູກຫຼານເຮົາ ຄວນຫັນແນວຄິດການໄປອອກແຮງງານຢູ່ຕ່າງປະເທດ ມາເປັນເຈົ້າຂອງວິສາຫະກິດຂະໜາດນ້ອຍ ແລະ ກາງ ຢູ່ປະເທດເຮົາ ທັງມີກຽດສັກສີ, ທັງມີລາຍຮັບຫຼາຍພໍສົມຄວນ ທັງຈະເຮັດໃຫ້ລູກຫຼານເຮົາ ບໍ່ຕົກຢູ່ໃນຄວາມສ່ຽງ, ໄດ້ຢູ່ນໍາຄອບຄົວຢ່າງອົບອຸ່ນ.
7. ໃນສະພາບແວດລ້ອມປັດຈຸບັນ ການລະບາດຂອງພະຍາດຕາມລະດູການ, ການລະບາດຂອງພະຍາດໂຄວິດ-19 ກໍຍັງມີຄວາມສ່ຽງນັ້ນ ການບໍລິການດ້ານສາທາລະນະສຸກໃຫ້ແກ່ພໍ່ແມ່ປະຊາຊົນ ກໍມີຄວາມຈໍາເປັນຕ້ອງໄດ້ຍົກສູງປະສິດທິພາບໃຫ້ສູງຂຶ້ນ. ສະນັ້ນ, ຈຶ່ງສະເໜີໃຫ້ ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ ໃນການສ້າງເງື່ອນໄຂໃຫ້ພໍ່ແມ່ປະຊາຊົນ ສາມາດເຂົ້າເຖິງການປິ່ນປົວຢ່າງກວ້າງຂວາງ, ສະດວກ ແລະ ມີປະສິດທິພາບ; ເອົາໃຈໃສ່ປັບປຸງໂຮງໝໍເມືອງ, ໂຮງໝໍນ້ອຍ ດ້ວຍການປະກອບອຸປະກອນ, ເຄື່ອງມືດ້ານການແພດ ທີ່ສາມາດຍົກສູງປະສິດທິພາບໃນການປິ່ນປົວໃຫ້ສູງຂຶ້ນ; ເພີ່ມຄວາມສາມາດໃນການເຝົ້າລະວັງຕິດຕາມ, ບົ່ງມະຕິ, ຊອກຄົ້ນຫາ ແລະ ໂຕ້ຕອບກໍລະນີພະຍາດລະບາດໃຫ້ໄດ້ໄວ.
8. ໃນໄລຍະປີກວ່າຜ່ານມາ ການເຂົ້າຮຽນຂອງລູກຫຼານເຮົາ ໄດ້ພົບຄວາມຫຍຸ້ງຍາກ, ບໍ່ເປັນລະບົບ ຍ້ອນການລະບາດຂອງພະຍາດໂຄວິດ-19. ມາຮອດປັດຈຸບັນ ສະພາບການໄດ້ກັບຄືນສູ່ປົກກະຕິແລ້ວ ຈຶ່ງມີຄວາມຈໍາເປັນໃນການຊຸກຍູ້ການຮຽນຂອງລູກຫຼານ, ປັບປຸງຄຸນນະພາບການສຶກສາໃຫ້ສູງຂຶ້ນ, ເອົາໃຈໃສ່ການສ້າງ ແລະ ສ້ອມແປງໂຮງຮຽນ ເພື່ອອໍານວຍຄວາມສະດວກໃຫ້ແກ່ລູກຫຼານໄດ້ເຂົ້າຮຽນ, ປະກອບປື້ມແບບຮຽນ, ອຸປະກອນການຮຽນ ພ້ອມທັງສ້າງເງື່ອນໄຂການເຂົ້າເຖິງການສຶກສາ ແລະ ຂະຫຍາຍຕາໜ່າງການສຶກສາໃຫ້ມີຄຸນນະພາບນັບມື້ສູງຂຶ້ນ ແລະ ທົ່ວເຖິງຢູ່ເຂດຫ່າງໄກສອກຫຼີກ.
9. ການປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດ ເປັນທິດທາງລວມຂອງພັກ-ລັດເຮົາ ໃນສະພາບແວດລ້ອມໄລຍະໃໝ່. ສະນັ້ນ, ຈຶ່ງສະເໜີໃຫ້ ຄະນະພັກ, ອົງການປົກຄອງເມືອງສິງ ເອົາໃຈໃສ່ການຄົ້ນຄວ້າປັບປຸງກົງຈັກການຈັດຕັ້ງຂອງຕົນ ໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ, ຮັບປະກັນການປະຕິບັດໜ້າທີ່ວຽກງານ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື້ອຍໆ. ສ້າງເງື່ອນໄຂໃຫ້ປະຊາຊົນບັນດາເຜົ່າ ສາມາດເຂົ້າຮ່ວມ, ປະກອບຄໍາເຫັນ, ຕິດຕາມກວດກາການບໍລິຫານລັດ ຕາມແນວທາງຂອງພັກ; ປະຊາຊົນໄດ້ຮັບຮູ້ ການເຄື່ອນໄຫວຂອງສະມາຊິກສະພາປະຊາຊົນຂັ້ນແຂວງ ທີ່ເປັນຕົວແທນຂອງຕົນ.
10. ເພີ່ມທະວີການຊີ້ນໍາ-ນໍາພາຂອງອົງຄະນະພັກເມືອງ ຕໍ່ການເຄື່ອນໄຫວວຽກງານຂອງສະມາຊິກສະພາປະຊາຊົນແຂວງຫຼວງນໍ້າທາ ທີ່ປະຈໍາຢູ່ເມືອງສິງ ໃຫ້ສາມາດເຄື່ອນໄຫວປະຕິບັດໜ້າທີ່ເປັນຕົວແທນຂອງປະຊາຊົນ ຕາມກົດໝາຍກໍານົດ, ຄົ້ນຄວ້າປະກອບບຸກຄະລາກອນຊ່ວຍວຽກ ລວມທັງສະຖານທີ່ເຮັດວຽກ ໃຫ້ມີຄວາມເໝາະສົມ ແນໃສ່ເຮັດໃຫ້ການປະຕິບັດໜ້າທີ່ວຽກງານ ເຂົ້າສູ່ລະບົບ ແລະ ມີປະສິດທິຜົນນັບມື້ສູງຂຶ້ນ.