(ສພຊ) ໃນໂອກາດທີ່ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງໄຊຍະບູລີ ກໍໄດ້ເຂົ້າຮ່ວມພິທີເປີດງານມະຫາກຳບຸນຊ້າງ ຄັ້ງທີ 16 ປະຈຳປີ 2023 ທີ່ແຂວງໄຊຍະບູລີ ເຊິ່ງງານບຸນຊ້າງປີນີ້ ແມ່ນເລີ່ມແຕ່ວັນທີ 13-20 ກຸມພາ 2023 ຢູ່ທີ່ສະໜາມຫຼວງໄຊຍະບູລີ ແຂວງໄຊຍະບູລີ ໂດຍເນັ້ນຫຼາກຫຼາຍກິດຈະກຳທີ່ຕິດພັນກັບຊ້າງ ແລະ ການອະນຸລັກຊ້າງ ໂດຍສະເພາະການສະແດງຂອງຊ້າງຄຳຮູ້, ບໍລິການຂີ່ຊ້າງ ແລະ ຕິດພັນກັບຫຼາຍກິດຈະກໍາປະເພນີຂອງຊົນເຜົ່າ ແລະ ສາສະໜາ ລາຍລະອຽດຄື:

ວັນທີ 17 ກຸມພາ, ຈະມີພິທີຕັກບາດຖວາຍສັງຄະທານອຸທິດສ່ວນບຸນກຸສົນໃຫ້ແກ່ຊ້າງ ຕາມຮີດຄອງປະເພນີຢູ່ທີ່ເດີ່ນສະໜາມຫຼວງ.

ວັນທີ 18 ກຸມພາ, ຕອນເຊົ້າ ຈະມີພິທີເປີດງານຢ່າງເປັນທາງການ ຢູ່ທີ່ສະໜາມຫຼວງເທສະບານແຂວງໄຊຍະບູລີ ປະກອບດ້ວຍການສະແດງຊ້າງຄໍາຮູ້, ຂະບວນຊ້າງ 75 ໂຕ, ຊົມການສະແດງໂດດຈ້ອງ, ກິດຈະກໍາອະນຸລັກຊ້າງ, ບໍລິການຂີ່ຊ້າງ, ຂະບວນກ້ອນແຫ່ຂອງ 11 ເມືອງ, ຂະບວນຟ້ອນບັດສະລ໋ອບ, ຊົມການສະແດງກິດຈະກໍາຂອງຊ້າງຄໍາຮູ້ 19 ລາຍການ.

ວັນທີ 19 ກຸມພາ, ມີກິດຈະກໍາກິນອາຫານບຸບເຟລະຫວ່າງຄົນກັບຊ້າງ, ຢ້ຽມຊົມພິພິຕະພັນຊ້າງ, ບໍລິການຂີ່ຊ້າງ ແລະ ກິດຈະກໍາອື່ນໆ.

ວັນທີ 20 ກຸມພາ, ຕອນເຊົ້າ ຈະມີການປະກວດອາຫານ (ພາເຂົ້າຊ້າງ), ຊົມການສະແດງຊ້າງຂໍ່ານັບແຂກ, ຊ້າງເຕະບານ, ຊ້າງແຕ້ມຮູບ, ຊ້າງຟ້ອນລໍາວົງ, ຊ້າງແກວ່ງບ້ວງ, ຊ້າງຊັດປຸມເປົ້າ, ຊ້າງໂຍນບ້ວງ, ຊ້າງຈັບໄມ້ແລ່ນແຂ່ງກັນ, ຊ້າງນ້ອຍແລ່ນແຂ່ງກັນ, ຊ້າງຈັບກະຕ່າເກັບຂີ້ເຫຍື້ອ ແລະ ກິດຈະກໍາອື່່ນໆ. ສ່ວນຕອນຄໍ່າ, ຈະມີການສະແດງຄອນເສີດສິລະປະວັນນະຄະດີຈາກແຂວງອ້ອມຂ້າງ ແລະ ເມືອງ ຕະຫຼອດການເປີດງານ.

ງານມະຫາກຳບຸນຊ້າງໄຊຍະບູລີ ແມ່ນຈັດຂຶ້ນໃນເດືອນກຸມພາຂອງທຸກໆປີ; ຄັ້ງທໍາອິດຈັດຂຶ້ນໃນປີ 2007 ຢູ່ທີ່ບ້ານວຽງແກ້ວ ເມືອງຫົງສາ, ແຕ່ມາຮອດປີ 2020-2022 ໄດ້ຢຸດເຊົາ ຍ້ອນການລະບາດຂອງພະຍາດໂຄວິດ-19. ປີ 2023 ນີ້ ສະພາບການລະບາດຂອງພະຍາດໂຄວິດ-19 ໄດ້ຫຼຸດຜ່ອນລົງ ການນໍາແຂວງໄຊຍະບູລີ ຈຶ່ງໄດ້ຕົກລົງຈັດງານມະຫາກຳບຸນຊ້າງ ປະຈຳປີ 2023 ຂຶ້ນ ເປັນຄັ້ງທີ 16 ເຊິ່ງມີຊ້າງເຂົ້າຮ່ວມທັງໝົດ 75 ໂຕ.

(ພາບ ແລະ ຂ່າວ: ອານຸສອນ ພູມມີທອນ)