ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

       (ສພຊ) ວັນທີ 7 ທັນວາ 2021, ສະຫາຍ ປອ. ໄຊສົມພອນ ພົມວິຫານກໍາມະການກົມການເມືອງ ສູນກາງພັກ, ປະທານສະພາແຫ່ງຊາດລາວພ້ອມດ້ວຍຄະນະ ໄດ້ສືບຕໍ່ເຄື່ອນໄຫວຢ້ຽມຢາມສັນຖະວະໄມຕີ ຢູ່ ສສ.ຫວຽດນາມ ຢ່າງເປັນທາງການ.

        ໃນໂອກາດນີ້, ສະຫາຍປະທານສະພາແຫ່ງຊາດ ພ້ອມດ້ວຍຄະນະ ໄດ້ວາງພວງມາລາ ທີ່ສຸສານ ປະທານ ໂຮ່ ຈີ ມິນ ນະຄອນຫລວງຮ່າໂນ້ຍ; ຈາກນັ້ນ, ໄດ້ເຂົ້າຢ້ຽມຂໍ່ານັບສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະ ນະບໍລິຫານງານພັກກອມມູນິດຫວຽດນາມ ເຊິ່ງໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ອວຍພອນໃຫ້ ການຢ້ຽມຢາມສັນຖະວະໄມຕີ ຢູ່ ສສ.ຫວຽດນາມ ຂອງສະຫາຍປະທານສະພາແຫ່ງຊາດລາວ ໃນຄັ້ງນີ້.

      ສະຫາຍປະທານສະພາແຫ່ງຊາດລາວ ໄດ້ແຈ້ງໃຫ້ຊາບວ່າ: ການຢ້ຽມຢາມ ສສ.ຫວຽດນາມ ໃນຄັ້ງນີ້ ແມ່ນເປັນການຕອບສະໜອງຕາມການເຊື້ອເຊີນຂອງສະຫາຍ ເວືອງ ດິງ ເຫວະ ກຳມະການກົມການເມືອງສູນກາງ ພັກກອມມູນິດຫວຽດນາມ, ປະທານສະພາແຫ່ງຊາດຫວຽດນາມແລະ ຜົນຂອງການພົບປະສອງຝ່າຍລະຫວ່າງ ສອງປະທານສະພາແຫ່ງຊາດລາວ-ຫວຽດນາມ; ພ້ອມນັ້ນ, ຍັງໄດ້ສະແດງຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ ທີ່ປະທານ ໂຮ່ ຈີ ມິນ ຜູ້ນໍາທີ່ຍິ່ງໃຫຍ່,ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ຮ່ວມກັນກໍ່ຕັ້ງຂຶ້ນ, ເພີ່ມພູນຄູນສ້າງ ແລະ ພັດທະນາ ຢ່າງຕໍ່ເນື່ອງຕະຫຼອດມາ ຈາກຮຸ່ນຄົນສູ່ຮຸ່ນຄົນ ຈົນໄດ້ກາຍເປັນມໍລະດົກລວມອັນລໍ້ຄ່າ, ເປັນກົດເກນແຫ່ງການຄົງ ຕົວ ແລະ ຂະຫຍາຍຕົວຂອງສອງປະເທດ; ປະຈຸບັນ, ສາຍພົວພັນດັ່ງກ່າວຍັງໄດ້ສືບຕໍ່ເພີ່ມພູນຄູນສ້າງໃນທຸກດ້ານ ເຊິ່ງສະແດງອອກໃນການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆຮ່ວມກັນ ດ້ວຍຫລາຍຮູບການ ທັງພົບປະ ຜ່ານລະບົບທາງໄກ. ພິເສດ, ໃນໄລຍະມີການແຜ່ລະບາດຂອງພະຍາດໂຄວິດ-19, ສສ.ຫວຽດນາມ ໄດ້ໃຫ້ການ ຊ່ວຍເຫລືອຢ່າງທັນການ ດ້ວຍການຊ່ວຍເຫຼືອດ້ານທຶນຮອນ, ຢາວັກແຊັງ ແລະ ອຸປະກອນການແພດທີ່ຈໍາເປັນ ເຊິ່ງມີມູນຄ່າລວມ 6,3 ລ້ານກວ່າໂດລາສະຫະລັດ ໃຫ້ແກ ສປປລາວ.

        ໃນຕອນເຊົ້າຂອງວັນດຽວກັນ, ສະຫາຍປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ຕ້ອນຮັບສະຫາຍ ເຈິນ ວັນ ຕຸ່ຍ ອາດີດກໍາມະການສູນກາງພັກກອມມູນິດຫວຽດນາມ, ອາດີດຫົວໜ້າຄະນະກຳມະການວຽກງານສະ ມາຊິກສະພາແຫ່ງຊາດ, ປະທານສະມາຄົມມິດຕະພາບຫວຽດນາມ-ລາວຂັ້ນສູນກາງ; ສ່ວນໃນຕອນບ່າຍ ແມ່ນໄດ້ ເດີນທາງໄປແຂວງວິ້ງຟຸກ ເພື່ອຢ້ຽມຢາມກຸ່ມບໍລິສັດເກ້ວເລີມ ເຊິ່ງເປັນກຸ່ມບໍລິສັດທີ່ໄດ້ຮັບຜົນສໍາເລັດ ດ້ານກະສິ ກໍາ ໂດຍສະເພາະແມ່ນການຜະລິດຝຸ່ນຊີວະພາບດ້ວຍເຕັກໂນໂລຊີທີ່ທັນສະໄໝ; ຈາກນັ້ນ, ໃນຕອນຄໍ່າ ທີ່ນະຄອນ ຫລວງຮ່າໂນ້ຍ ໄດ້ຢ້ຽມຢາມພົບປະ ສະຫາຍ ນາງ ຫງວຽນ ທິ ກິມ ເງິນ ອະດີດປະທານສະພາແຫ່ງຊາດ ແຫ່ງ ສສ.ຫວຽດນາມ; ແລະ ຍັງໄດ້ພົບປະສະຫາຍ ໂດ ວັນ ຈ້ຽນ ປະທານສູນກາງແນວໂຮມປະເທດຊາດ ແຫ່ງ ສສ.ຫວຽດນາມ.

              (ພາບ ແລະ ຂ່າວ: ບຸນເກີດ ວົງໄຊຍາ)