(ສພຊ) ໃນວັນທີ 20 ມັງກອນຜ່ານມາ. ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍພັນລະຍາ ແລະ ຄະນະ ຈາກສະພາແຫ່ງຊາດ, ການນໍາຈາກພະແນກການຕ່າງໆຂອງແຂວງສະຫວັນນະເຂດ ໄດ້ພົບປະຢ້ຽມຢາມ ຄະນະພັກ, ອົງການປົກຄອງ, ຫ້ອງການອ້ອມຂ້າງ, ພະນັກງານຫຼັກແຫຼ່ງ ຂອງເມືອງໄຊບູລີ ທີ່ສະໂມສອນ ຫ້ອງວ່າການປົກຄອງເມືອງໄຊບູລີ ແຂວງສະຫວັນນະເຂດ. ມີບັນດາ ຄະນະພັກ, ຄະນະປົກຄອງເມືອງ, ຫົວໜ້າຫ້ອງການ, ຄະນະຫ້ອງການ, ກໍໍາລັງ ປກສ-ປກຊ, ພະນັກງານຫຼັກແຫຼ່ງພາຍໃນເມືອງເຂົ້້າຮ່ວມ.

ໃນໂອກາດດັ່ງກ່າວ ທ່ານ ອ່ອນລໍາພັນ ບົວສີແກ້ວ ກໍາມະການພັກແຂວງ ເລຂາພັກເມືອງ ເຈົ້້າເມືອງໄຊບູລີ ຕາງໜ້າການນໍາເມືອງ ໄດ້ກ່າວຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ແລະ ການຜະລິດເປັນສິນຄ້າ, ການພັດທະນາຊົນນະບົດ ແລະ ລຶບລ້າງຄວາມທຸກຍາກ, ການແກ້ໄຂບັນຫາຢາເສບຕິດພາຍໃນເມືອງ ໃນໄລຍະ 1 ປີຜ່ານມາ ແລະ ວຽກງານຈຸດສຸມທີ່ຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ ເຊິ່ງມີຫຼາຍດ້ານທີ່ພົ້ນເດັ່ນ ເປັນຕົ້ນ ສາມາດຈັດເກັບລາຍຮັບເຂົ້າງົບປະມານເມືອງໄດ້ 3,9 ຕື້ກວ່າກີບ ເທົ່າກັບ 104,75% ລື່ນແຜນການປີ 2022 (ແຜນການປີ 2022 ແມ່ນ 3,8 ຕື້ກວ່າກີບ) ສ້າງຕັ້ງກຸ່ມການຜະລິດໄດ້ 67 ກຸ່ມ, ນອກຈາກນີ້ ຍັງມີວຽກງານທີ່ສໍາຄັນ ແລະ ສາມາດຈັດຕັ້ງປະຕິບັດໄດ້ດີອີກຫຼາຍດ້ານ.

ພາຍຫຼັງທີ່ໄດ້ຮັບຟັງການລາຍງານຂອງທ່ານ ເຈົ້າເມືອງໄຊບູລີ ແລ້ວ, ທ່ານ ປອ. ໄຊສົມພອນ ພົມວິຫານ ກໍໄດ້ ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ກອງປະຊຸມ ໃນການຈັດຕັ້ງປະຕິບັດວຽກງານຕ່າງໆພາຍໃນເມືອງ ເປັນຕົ້ນ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ການຈັດຕັ້ງແຜນພັດທະນາເສດຖະກິດ-ສັງຄົມຂອງເມືອງ, ການຊີ້ນໍາ-ນໍາພາ ຂອງອົງຄະນະພັກເມືອງ ຕໍ່ການເຄື່ອນໄຫວວຽກງານຂອງຄະນະສະມາຊິກສະພາປະຊາຊົນແຂວງ ທີ່ປະຈໍາຢູ່ເມືອງໄຊບູລີ, ໃນໂອກາດດຽວກັນ ທ່ານ ປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ມອບ ອຸປະກອນການແພດຈໍານວນໜຶ່ງ ໃຫ້ຫ້ອງການສາທາລະນະສຸກເມືອງ ເພື່ອນໍາໃຊ້ເຂົ້າໃນວຽກງານວິຊາສະເພາະ.
ຈາກນັ້ນ, ຄະນະ ໄດ້ສືບຕໍ່ຢ້ຽມຢາມກຸ່ມຊາວນາ ບ້ານດົງຍາງ ແລະ ຕິດຕາມການກໍ່ສ້າງຄອງເໝືອງໂຄງການຊົນລະປະທານ ບ້ານດົງຍາງ. ຕິດຕາມການກໍ່ສ້າງຄູຕ້ານຖ້ວມບ້ານກ້າງປາ ຫາ ບ້ານຫາດຊາຍສູງ, ຕິດຕາມໂຄງການຈັກສູບນໍ້າຊົນລະປະທານ ບ້ານຕົ້ນແຫນ ແລະ ຕິດຕາມເບິ່ງກຸ່ມການລ້ຽງໄກ່ແບບເປັນຟາມ ຢູ່ບ້ານມະນີລາດ.