ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ຢູ່ທີ່ບໍລິສັດຮ່ວມທຶນລາວ-ຈີນ ໂດຍການຕ້ອນຮັບຂອງທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ພ້ອມດ້ວຍຄະນະ, ຫົວໜ້າພະແນກການ ຕະຫລອດຮອດພະນັກງານວິຊາການ ແລະ ພາກສ່ວນກ່ຽວຂ້ອງ ໃນວັນທີ 16 ມີນາຜ່ານມາ.

ໂອກາດຢ້ຽມຢາມຄັ້ງນີ້ ທ່ານ ຂຽງຄໍາ ພຸດຈັນທະວົງສາ ຮອງອຳນວຍການ ບໍລິສັດຮ່ວມທຶນລາວ-ຈີນ ໄດ້ລາຍງານສະພາບການພັດທະນາໂດຍສັງເຂບ ແລະ ສະພາບການພົ້ນເດັ່ນ ໃນການພັດທະນາເຂດເສດຖະກິດພິເສດ ນະຄອນຫລວງວຽງຈັນ ປີ 2021 ແລະ 3 ເດືອນຕົ້ນປີ 2022, ຂໍ້ຄົງຄ້າງ ແລະ ຂໍ້ສະເໜີ, ການຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຊິ່ງໄດ້ຍົກໃຫ້ເຫັນຜົນສຳເລັດທີ່ສາມາດຍາດມາໄດ້ ໃນໄລຍະຜ່ານມາ ດ້ວຍຄວາມເອົາໃຈໃສ່ຢ່າງຕັ້ງໜ້າ, ຈາກນັ້ນ ຄະນະກຳມາທິການ ແລະ ພາກສ່ວນທີ່ຂ້ອງ ຍັງໄດ້ແລກປ່ຽນຄຳຄິດຄຳເຫັນ ຮ່ວມກັນປຶກສາຫາລື ໃນຫລາຍບັນຫາທີ່ເປັນພື້ນຖານ ອັນຫນັກແຫນ້ນ ໃນການພັດທະນາເສດຖະກິດພິເສດ ນະຄອນຫລວງວຽງຈັນ ເປັນຖານສ້າງວຽກເຮັດງານທຳ, ການຜະລິດເພື່ອສົ່ງອອກ, ການຖ່າຍທອດເຕັກໂນໂລຊີ, ການເກັບພັນທະເຂົ້າງົບປະມານ ຕາມທິດລວມຂອງນະຄອນຫລວງ ກໍຄືລັດຖະບານ.

ໃນໂອກາດດັ່ງກ່າວ ທ່ານປະທານສະພາແຫ່ງຊາດ ກໍໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ເຮັດໃຫ້ວຽກງານຫລາຍດ້ານ ມີການຂະຫຍາຍຕົວ ຜັນແປໄປຢ່າງຕັ້ງໜ້າ ເຊິ່ງເຫັນໄດ້ວ່າ ມີການພັດທະນານັບມື້ນັບດີຂຶ້ນ     ແຕ່ແນວໃດກໍຕາມ ຂໍຮຽກຮ້ອງໃຫ້ຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ສືບຕໍ່ເອົາໃຈໃສ່ຊີ້ນຳ-ນຳພາ ໃນການຈັດຕັ້ງປະຕິບັດທຸກວຽກງານຢ່າງຮອບດ້ານ ຫັນເອົາມູນເຊື້ອທີ່ມີມາຜັນຂະຫຍາຍ ໃຫ້ເກີດມີປະສິດທິຜົນ ທັງເພີ່ມທະວີເອົາໃຈໃສ່ໂຄສະນາປ້ອງກັນພະຍາດໂຄວິດຢ່າງຕໍ່ເນື່ອງ ບໍ່ໃຫ້ຖືເບົາ ຮັບປະກັນໄດ້ຄວາມສະຫງົບປອດໄພເປັນລະບຽບຮຽບຮ້ອຍ ຕິດພັນກັບ 2 ວາລະແຫ່ງຊາດ ໃນການແກ້ໄຂຄວາມຫຍຸ້ງຍາກດ້ານເສດຖະກິດ, ແກ້ໄຂບັນຫາຢາເສບຕິດໃຫ້ໄດ້ຢ່າງຂາດຕົວ.

ຈາກນັ້ນ, ຄະນະ ກໍໄດ້ຢ້ຽມຢາມຕົວຈິງ ຢູ່ບໍລິສັດເປ້ເຕີ້ ເຄື່ອງນຸ່ງຫົ່ມ (ລາວ) ຈໍາກັດ ແລະ ບໍລິສັດ ເປໂຕຼເຄມີ ລາວຈໍາກັດ ຕື່ມອີກ.

(ຂ່າວ-ພາບ: ອານຸສອນ ພູມມີທອນ)