(ສພຊ) ວັນທີ 4 ມີນາຜ່ານມາ, ທີ່ນະຄອນຫລວງວຽງຈັນ ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມດ່ານສາກົນສິນຄ້າທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫລວງວຽງຈັນ ເຊິ່ງໄດ້ຮັບການຕ້ອນຮັບຈາກທ່ານ ຈັນທອນ ສິດທິໄຊ ປະທານບໍລິສັດ ໂລຊິດສະຕິກ ພາກ ຈໍາກັດ ພ້ອມດ້ວຍພາກສ່ວນທີ່ກ່ຽວຂ້ອງ.
ໂອກາດດັ່ງກ່າວ ໄດ້ຮັບຟັງການລາຍງານໂດຍຫຍໍ້ ແລະ ຊົມການນຳສະເໜີວິດີໂອສັ້ນ ກ່ຽວກັບໂຄງການທ່າບົກທ່ານາແລ້ງ ແລະ ເຂດໂລຊິດສະຕິກ ນະຄອນຫລວງວຽງຈັນ ເຊິ່ງເປັນໂຄງການລົງທຶນຂະໜາດໃຫຍ່, ມີຂອບເຂດເນື້ອທີ່ກວ້າງຂວາງ, ຕັ້ງຢູ່ຈຸດທີ່ມີຄວາມສໍາຄັນໃນການເຊື່ອມໂຍງກັບປະເທດໃກ້ຄຽງ, ມີມູນຄ່າການລົງທຶນຈໍານວນຫລວງ ຫລາຍ. ຈາກນັ້ນ, ກໍໄດ້ມີການປຶກສາຫາລືແລກປ່ຽນຄໍາຄິດຄໍາເຫັນທີ່ທັງພາກລັດ ກໍຄືຄະນະກໍາມາທິການກ່ຽວຂ້ອງຂອງສະພາແຫ່ງຊາດ ໃຫ້ຄວາມສົນໃຈໃນບາງບັນຫາ.
ຫລັງຈາກຮັບຟັງການລາຍງານແລ້ວ ທ່ານປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ແລະ ສະເໜີໃຫ້ເອົາໃຈໃສ່ການໂຄສະນາເຜີຍແຜ່ລັດຖະທໍາມະນູນ, ກົດໝາຍ ໂດຍສະເພາະກົດໝາຍທີ່ກ່ຽວຂ້ອງກັບການດໍາເນີນທຸລະກິດ, ການດໍາລົງຊີວິດ ແລະ ທໍາມາຫາກິນຢູ່ປະເທດເຮົາ; ໂຄງການວຽງຈັນໂລຊິດສະຕິກ ພາກ, ໂຄງການທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫລວງວຽງຈັນ ເປັນໂຄງການທີ່ນໍາໃຊ້ທ່າແຮງທາງດ້ານທີ່ຕັ້ງພູມສາດຂອງປະເທດ ເພື່ອເປັນຈຸດເຊື່ອມໂຍງທາງດ້ານການຄ້າ, ການບໍລິການ ຕິດພັນກັບການນໍາໃຊ້ທາງລົດໄຟ ເຊິ່ງຈະເປັນກໍາລັງແຮງເຮັດໃຫ້ການສ້າງສາພັດທະນາເສດຖະກິດຂອງປະເທດ ມີບາດກ້າວຫັນປ່ຽນທີ່ຕັ້ງໜ້າ ຈຶ່ງສະເໜີໃຫ້ບັນດາທ່ານຮີບຮ້ອນການພັດທະນາໂຄງການໃຫ້ສໍາເລັດໂດຍໄວ, ໃນໄລຍະຜ່ານມາ ສະພາແຫ່ງຊາດ, ລັດຖະບານ ກໍໄດ້ອອກກົດໝາຍຈໍານວນໜຶ່ງ ທີ່ກໍານົດເນື້ອໃນກ່ຽວກັບການດໍາເນີນທຸລະກິດດ້ານໂລຊິດສະຕິກ ແຕ່ໂຄງການລົງທຶນນີ້ ກໍເປັນໂຄງການຂະໜາດໃຫຍ່, ເປັນລະບົບຄົບຊຸດ ຖ້າຜ່ານການດໍາເນີນທຸລະກິດ ເຫັນບັນຫາໃດທີ່ຍັງບໍ່ທັນມີກົດໝາຍເປັນບ່ອນອີງໃນການຈັດຕັ້ງປະຕິບັດວຽກງານ ກໍໃຫ້ເກັບກໍາສັງລວມ ເພື່ອສະເໜີຫາລັດຖະບານ, ກໍຄືພາກສ່ວນກ່ຽວຂ້ອງ ຫລື ສະເໜີຫາສະພາແຫ່ງຊາດ ເພື່ອນໍາເຂົ້າແຜນການສ້າງ ແລະ ປັບປຸງກົດໝາຍ ໃຫ້ເປັນລະບົບຄົບຊຸດຂຶ້ນຕື່ມ; ສະເໜີໃຫ້ຄະນະນໍາຂອງບໍລິສັດທັງສອງ ຄົ້ນຄວ້າໃຫ້ບຸລິມະສິດແກ່ແຮງງານທີ່ເປັນຄົນລາວ ໃນການເຂົ້າເຮັດວຽກຢູ່ໂຄງການດັ່ງກ່າວ ເພື່ອຊ່ວຍໃນການສ້າງວຽກເຮັດງານທໍາໃຫ້ແກ່ແຮງງານ, ສ້າງລາຍໄດ້ທີ່ເປັນປົກກະຕິ ເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການຍົກລະດັບດີຂຶ້ນ.
ໃນໂອກາດເຄື່ອນໄຫວຢ້ຽມຢາມຄັ້ງນີ້ ຄະນະ ຍັງໄດ້ຢ້ຽມຢາມປະຕູໂຂງ (Main Gate), ຕຶກປະຕິບັດງານຂອງບໍລິສັດ ທ່າບົກທ່ານາແລ້ງ ແລະ ຕຶກພາສີ ປະຈຳດ່ານສາກົນ, ລານຕູ້ສິນຄ້າ ຊີວາຍ ແລະ ສາງຄ່ຽນຖ່າຍສິນຄ້າ, ພ້ອມກັນນັ້ນ ກໍໄດ້ຢ້ຽມຊົມຈຸດເຊື່ອມຕໍ່ຈາກຂົວມິດຕະພາບ ລາວ-ໄທ ແຫ່ງທີໜຶ່ງ ຫາດ່ານສາກົນສິນຄ້າທ່າບົກທ່ານາແລ້ງ.
(ພາບ ແລະ ຂ່າວ: ສົມນຶກ ແກ້ວໄຊຍະຈັກ)