ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນບ່າຍຂອງວັນທີ 20 ກັນຍາຜ່ານມາ, ທີ່ຫ້ອງຮັບແຂກສະພາແຫ່ງຊາດ ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຈະເດັດ ອິນສະຫວ່າງ ສະມາຊິກວຸດທິສະພາ, ປະທານກຸ່ມມິດຕະພາບລັດຖະສະພາ ໄທ-ລາວ ພ້ອມດ້ວຍຄະນະ ເນື່ອງໃນໂອກາດເຄື່ອນໄຫວເຮັດວຽກ ຢູ່ ສປປລາວ ຢ່າງເປັນທາງການ ໃນລະຫວ່າງວັນທີ 20-24 ກັນຍາ 2022.
ໂອກາດດັ່ງກ່າວ ທ່ານ ປອ. ໄຊສົມພອນ ພົມວິຫານ ໄດ້ກ່າວສະແດງຄວາມຕ້ອນຮັບຢ່າງຈິງໃຈຕໍ່ຄະນະປະທານຄະນະມິດຕະພາບລັດຖະສະພາໄທ-ລາວ ແລະ ຕີລາຄາສູງຕໍ່ການຢ້ຽມຢາມລາວ ຂອງຄະນະໃນເທື່ອນີ້ ເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີງາມ ຖານບ້ານໃກ້ເຮືອນຄຽງ ລະຫວ່າງ ສອງປະເທດ ລາວ-ໄທ, ໄທ-ລາວ ໃຫ້ຈະເລີນງອກງາມ ບົນພື້ນຖານການເປັນຄູ່ຮ່ວມຍຸດທະສາດ ແລະ ການພັດທະນາແບບຍືນຍົງ ພ້ອມທັງຝາກຄວາມຢື້ຢາມຖາມຂ່າວເຖິງທ່ານ ຊວນ ຫຼີກໄພ ປະທານສະພາຜູ້ແທນລາດຊະດອນໄທ ແລະ ທ່ານ ພອນເພັດ ພິຊິດຊົນໄຊ ປະທານວຸດທິສະພາໄທ ແລະ ບັນດາທ່ານການນຳຂອງລັດຖະສະພາໄທ; ຕີລາຄາສູງຕໍ່ຜົນການພົບປະສອງຝ່າຍ ລະຫວ່າງ ປະທານຄະນະມິດຕະພາບລັດຖະສະພາ ລາວ-ໄທ, ໄທ-ລາວ ຂອງສອງອົງການນິຕິບັນຍັດ; ແຈ້ງໃຫ້ຮູ້ແຜນການຈະເດີນທາງເຂົ້າຮ່ວມກອງປະຊຸມປະຈໍາປີ ເວທີປຶກສາຫາລືລັດຖະສະພາອາຊີ-ປາຊີຟິກ (APPF) ທີ່ລັດຖະສະພາໄທເປັນເຈົ້າພາບ ແລະ ສືບຕໍ່ຢ້ຽມຢາມ ຣາຊະອານາຈັກໄທ ຢ່າງເປັນທາງການ ແລະ ຍົກໃຫ້ເຫັນກ່ຽວກັບ 5 ເສດຖະກິດ ປາຍແຫຼມ ຂອງ ສປປລາວ ເປັນຕົ້ນແມ່ນ: ອຸດສາຫະກຳປຸງແຕ່ງ; ອຸດສາຫະກຳການທ່ອງທ່ຽວ ເຊີງອະນຸລັກ, ປະຫວັດສາດ, ວັດທະນະທຳ; ສົ່ງເສີມເຂດໂລຈິດສະຕິກ; ການພັດທະນາການສຶກສາ, ສາທາລະນະສຸກ, ຫຼັກສູດການສອນ ແລະ ການສ້າງໂຮງຮຽນໂຕແບບ ແລະ ສົ່ງເສີມເສດຖະກິດດີຈີຕອນ ພ້ອມທັງສະເໜີີໃຫ້ສອງຄະນະມິດຕະພາບລັດຖະສະພາໄທ-ລາວ, ລາວ-ໄທ ສືບຕໍ່ຊຸກແລກປ່ຽນການຢ້ຽມຢາມ, ການໄປມາຫາສູ່ກັນ, ການສ້າງກິດຈະກໍາທາງດ້ານວັດທະນະທໍາ, ກິລາ, ການທ່ອງທ່ຽວ, ຊຸກຍູ້ການຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ, ສະເໜີໃຫ້ຄະນະມິດຕະພາບລັດຖະສະພາ ສືບຕໍ່ເປັນຂົວຕໍ່ມິດຕະພາບ ທີ່ດີໃຫ້ແກ່ປະຊາຊົນສອງຊາດ.
ທ່ານ ຈະເດັດ ອິນສະຫວ່າງ ກໍໄດ້ກ່າວສະແດງຄວາມຂອບໃຈເປັນຢ່າງສູງທີ່ທ່ານ ປອ. ໄຊສົມພອນ ພົມວິຫານ ໄດ້ເສຍສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ພ້ອມທັງລາຍງານໃຫ້ຮູ້ກ່ຽວກັບຈຸດປະສົງຂອງການຢ້ຽມຢາມ ສປປລາວ ໃນຄັ້ງນີ້ ແລະ ລາຍງານຜົນຂອງການພົບປະສອງຝ່າຍຮ່ວມກັບທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ, ປະທານຄະນະມິດຕະພາບລັດຖະສະພາລາວ-ໄທ ແລະ ເຫັນພ້ອມກັບຂໍ້ສະເໜີທີ່ປະທານສະພາແຫ່ງຊາດລາວ ໄດ້ສະເໜີມານັ້ນ ພ້ອມທີ່ຈະສືບຕໍ່ເສີມຂະຫຍາຍສາຍພົວພັນການຮ່ວມມືໃຫ້ແໜ້ນແຟ້ນຂຶ້ນກວ່າເກົ່າ.
ນອກຈາກນີ້ ຄະນະຜູ້ແທນລັດຖະສະພາໄທ ພ້ອມດ້ວຍຄະນະ ຍັງໄດ້ສືບຕໍ່ເຂົ້າຢ້ຽມຂໍ່ານັບ ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ.
ໃນມື້ຕໍ່ມາ ຂອງວັນທີ 21 ກັນຍາ 2022 ຄະນະຜູ້ແທນລັດຖະສະພາ ແຫ່ງ ຣາຊະອານາຈັກໄທ ເດີນທາງຢ້ຽມຢາມໂຄງການສູນພັດທະນາ ແລະ ບໍລິການກະເສດ ຫ້ວຍຊອນ-ຫ້ວຍຊົ້ວ ຢູ່ບ້ານນາຍາງ, ເມືອງນາຊາຍທອງ, ນະຄອນຫຼວງວຽງຈັນ ໂດຍການຕ້ອນຮັບຂອງທ່ານ ດວງຕາວັນ ສີສົມບັດ ຫົວໜ້າສູນພັດທະນາ ແລະ ບໍລິການກະເສດ ຫ້ວຍຊອນ-ຫ້ວຍຊົ້ວ ແລະ ຍັງໄດ້ລາຍງານໃຫ້ຮູ້ກ່ຽວກັບການສ້າງຕັ້ງສູນພັດທະນາ ແລະ ການບໍລິການກະເສດ ຫ້ວຍຊອນ-ຫ້ວຍຊົ້ວ ດັ່ງກ່າວ ພ້ອມສະເໜີໃຫ້ພະນັກງານວິຊາການຂອງສູນໄດ້ມີການໄປຍົກລະດັບການສຶກສາ ໃນລະດັບປະລິນຍາຕີ, ປະລິນຍາໂທ, ການເຝິກອົບຮົມ ແລະ ຊ່ວຍເຫຼືອທາງດ້ານອຸປະກອນຕ່າງໆ ເພື່ອໃຫ້ທາງສູນມີການພັດທະນາໃຫ້ດີຂຶ້ນ. ຫຼັງຈາກນັ້ນ ທ່ານ ດວງຕະວັນ ສີສົມບັດ ຍັງໄດ້ນຳພາຄະນະຜູ້ແທນລັດຖະສະພາ ແຫ່ງ ຣາຊະອານາຈັກໄທ ຢ້ຽມຊົມໂຮງເພາະປູກພຶດ ແລະ ການປະສົມພັນປາ ຂອງໂຄງການ.
ນອກຈາກນີ້ ຄະນະຜູ້ແທນລັດຖະສະພາ ແຫ່ງ ຣາຊະອານາຈັກໄທ ກໍໄດ້ເດີນທາງໄປຢ້ຽມຢາມ ໂຮງຮຽນວັດທະນະທຳຊົນເຜົ່າເດັກກຳພ້າ ຫຼັກ 67 ເມືອງໂພນໂຮງ ແລະ ໂຮງຮຽນ ມສ ຊົນເຜົ່າ ເມືອງວັງວຽງ, ໂຮງຮຽນສາມັນກິນນອນຊົນເຜົ່າ ເມືອງວັງວຽງ ແຂວງວຽງຈັນ. ໃນໂອກາດຢ້ຽມຢາມຄັ້ງນີ້ ຄະນະຜູ້ແທນລັດຖະສະພາ ແຫ່ງ ຣາຊະອານາຈັກໄທ ຍັງໄດ້ມອບອຸປະກອນການກິລາຈຳນວນໜຶ່ງ ແລະ ໄດ້ສືບຕໍ່ຢ້ຽມຢາມ ແລະ ແລກປ່ຽນບົດຮຽນກັບມະຫາວິທະຍາໄລສຸພານຸວົງ ແຂວງຫຼວງພະບາງ ໃນຫົວຂໍ້ການຮ່ວມມືດ້ານການສຶກສາ ແລະ ກິລາ.
(ພາບ ແລະ ຂ່າວ: ສອນສັກ ວັນວິໄຊ)