ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 19 ກັນຍາ 2022 ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ພົນເອກ ບຸນສ້າງ ນຽນປຣະດິດ ປະທານກໍາມາທິການທະຫານ ແລະ ຄວາມໝັ້ນຄົງຂອງລັດ ວຸດທິສະພາ ແຫ່ງ ຣາຊະອານາຈັກໄທ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ສປປລາວ ລະຫວ່າງວັນທີ 19-22 ກັນຍາ 2022.
ທ່ານປະທານສະພາແຫ່ງຊາດລາວ ໄດ້ສະແດງຄວາມຍິນດີຕ້ອນຮັບ ທ່ານປະທານກໍາມາທິການທະຫານ ແລະ ຄວາມໝັ້ນຄົງຂອງລັດວຸດທິສະພາ ແຫ່ງ ຣາຊະອານາຈັກໄທ ພ້ອມດ້ວຍຄະນະ ຢ່າງອົບອຸ່ນ ພ້ອມທັງຕີລາຄາສູງຕໍ່ການຢ້ຽມຢາມ ສປປລາວ ໃນຄັ້ງນີ້ ເຊິ່ງເປັນການປະກອບສ່ວນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີງາມ ຖານບ້ານໃກ້ເຮືອນຄຽງ ລະຫວ່າງສອງປະເທດລາວ ແລະ ໄທເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ ໃຫ້ຈະເລີນງອກງາມ ບົນພື້ນຖານການເປັນຄູ່ຮ່ວມຍຸດທະສາດ ແລະ ການພັດທະນາແບບຍືນຍົງ ທັງໄດ້ແຈ້ງສະພາບການ ພັດທະນາເສດຖະກິດ-ສັງຄົມຂອງ ສປປລາວ, ກົງຈັກການຈັດຕັ້ງຂອງສະພາແຫ່ງຊາດ ຊຸດທີ IX ແລະ ສະພາບການເຄື່ອນໄຫວຂອງສະພາແຫ່ງຊາດໂດຍຫຍໍ້.
ໂອກາດດຽວກັນ, ທ່ານ ພົນເອກ ບຸນສ້າງ ນຽນປຣະດິດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນໃນຄັ້ງນີ້ ພ້ອມທັງແຈ້ງໃຫ້ຊາບ ຈຸດປະສົງໃນການມາຢ້ຽມຢາມຄັ້ງນີ້ ກໍເພື່ອເຊື່ອມສາຍສໍາພັນໄມຕີ ໃຫ້ເຂັ້ມແຂງ, ຊຸກຍູ້ສົ່ງເສີມການຮ່ວມມືແບບທະວີພາຄີ ແລະ ພະຫຸພາຄີ ໃນເວທີພາກພື້ນ ແລະ ສາກົນ. ນອກຈາກນັ້ນ, ກໍຍັງໄດ້ແຈ້ງໃຫ້ຊາບກ່ຽວກັບການປະຕິບັດໜ້າທີ່ວຽກງານອີກຈໍານວນໜຶ່ງ.
ໃນໂອກາດດັ່ງກ່າວ, ທ່ານ ປອ. ໄຊສົມພອນ ພົມວິຫານ ກໍໄດ້ສະເໜີໃຫ້ ທ່ານພົນເອກ ບຸນສ້າງ ນຽນປຣະດິດ ສືບຕໍ່ພົວພັນພົບປະເຮັດວຽກຮ່ວມກັບກໍາມາທິການປ້ອງກັນຊາດ-ປ້ອງກັນຄວາມສະຫງົບ, ສະພາແຫ່ງຊາດລາວ ໃນການຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດສັນຍາ, ສົນທິສັນຍາ ແລະ ຂໍ້ຕົກລົງຕ່າງໆ ລະຫວ່າງສອງປະເທດ ໃຫ້ໄດ້ຮັບການຈັດຕັ້ງປະຕິບັດ, ປາກົດຜົນເປັນຈິງ. ພ້ອມນີ້, ກໍໄດ້ຝາກຄວາມຢື້ຢາມຖາມຂ່າວເຖິງທ່ານ ຊວນ ຫລີກໄພ ປະທານສະພາຜູ້ແທນລາສະດອນໄທ ແລະ ທ່ານ ພອນເພັດ ພິຊິດຊົນໄຊ ປະທານວຸດທິສະພາໄທ ແລະ ບັນດາທ່ານການນຳຂອງລັດຖະສະພາໄທ ແລະ ສະແດງຄວາມຂອບໃຈ ລັດຖະບານ, ລັດຖະສະພາ ແລະ ປະຊາຊົນໄທ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອລັດຖະບານ, ສະພາແຫ່ງຊາດ ແລະ ປະຊາຊົນລາວບັນດາເຜົ່າ ເປັນຕົ້ນແມ່ນການຊ່ວຍເຫຼືອອຸປະກອນທາງການແພດ ໃນໄລຍະທີ່ ສປປລາວ ໄດ້ປະເຊີນໜ້າກັບການແຜ່ລະບາດຂອງພະຍາດໂຄວິດ-19 ຜ່ານມາ ແລະ ອື່ນໆ ພ້ອມທັງອວຍພອນໃຫ້ບັນດາທ່ານໃນຄະນະ ໄດ້ຮັບຜົນສໍາເລັດໃນການຢ້ຽມຢາມ ສປປລາວ ຄັ້ງນີ້.