ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


(ສພຊ) ວັນທີ 25 ເມສາຜ່ານມາ, ທີ່ຫ້ອງຮັບແຂກສະພາແຫ່ງຊາດ ນະຄອນຫລວງວຽງຈັນ ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ຫງວຽນ ຈ້ອງ ເຫງ້ຍ ເລຂາທິການສູນກາງພັກ, ຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ, ໃນໂອກາດທີ່ມາຢ້ຽມຢາມ ແລະ ເຮັດວຽກຢູ່ ສປປລາວ ຢ່າງເປັນທາງການ.

​ ທັງນີ້, ເພື່ອເປັນການສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ , ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດລາວ-ຫວຽດນາມ ແລະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ແລະ ເພື່ອເປັນການປະກອບສ່ວນເສີີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ-ສອງລັດ ປະຊາຊົນສອງຊາດລາວ-ຫວຽດນາມ ເວົ້າລວມ, ເວົ້າສະເພາະການປະສານພົວພັນລະຫວ່າງສະພາແຫ່ງຊາດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມໃຫ້ເຂົ້າສູ່ລວງເລິກ ແລະ ເກີດດອກອອກຜົນຍິ່ງຂຶ້ນ.

​ ໂອກາດດັ່ງກ່າວ, ສະຫາຍ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍຄືການພົວພັນຮ່ວມມື ລະຫວ່າງຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ແລະ ຄະນະໂຄສະນາສຶກສາສູນກາງພັກກອມມູນິດຫວຽດນາມ ຕະຫລອດໄລຍະຜ່ານມາ ແລະ ຜົນສຳເລັດຂອງການພົບປະ ແລະ ເຮັດວຽກຮ່ວມກັບຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ; ຊົມເຊີຍຕໍ່ບັນດາຜົນສໍາເລັດໃຫຍ່ຫລວງຮອບດ້ານທີ່ພັກ-ລັດ ແລະ ປະຊາຊົນຫວຽດນາມອ້າຍນ້ອງຍາດມາໄດ້ ພາຍໃຕ້ການນໍາພາອັນສະຫລາດສ່ອງໃສຂອງພັກກອມມູນິດຫວຽດນາມໃນການພັດທະນາ ແລະ ສ້າງສາປະເທດຊາດ ຕາມມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ຕີລາຄາສູງຕໍ່ການສະໜັບສະໜູນ ແລະ ຊ່ວຍເຫລືອອັນໃຫຍ່ຫລວງລໍ້າຄ່າຈາກ ສສ.ຫວຽດນາມ ໃນໄລຍະຕໍ່ສູ້ກູ້ຊາດໃນເມື່ອກ່ອນ ກໍຄືໃນໄລຍະສ້າງສາ ແລະ ພັດທະນາປະເທດຊາດໃນປັດຈຸບັນ ໂດຍສະເພາະແມ່ນໂຄງການປຸກສ້າງຫໍສະພາແຫ່ງຊາດຫລັງໃໝ່ ທີ່ພັກ-ລັດ ແລະ ປະຊາຊົນຫວຽດນາມ ໄດ້ມອບໃຫ້ແກ່ ພັກ-ລັດ ແລະ ປະຊາຊົນລາວ. ພ້ອມນັ້ນ, ສະຫາຍ ຍັງໄດ້ລາຍງານຜົນສຳເລັດການດຳເນີນກອງປະຊຸມຂອງສະພາແຫ່ງຊາດລາວໃຫ້ໄດ້ຊາບຕື່ມອີກ.
​ ສະຫາຍ ຫງວຽນ ຈ້ອງ ເຫງ້ຍ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານຜົນສຳເລັດການເຄື່ອນໄຫວ, ການພົບປະປຶກສາຫາລືວຽກງານກັບຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ; ພ້ອມທັງລາຍງານຜົນສຳເລັດຂອງກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ເຊິ່ງໄດ້ມີທິດໃນການສຸມໃສ່ການສ້າງກົດໝາຍ ໃຫ້ເປັນກົດໝາຍແຫ່ງລັດສັງຄົມນິຍົມ; ພ້ອມນັ້ນ, ທ່ານຍັງໄດ້ລາຍງານການຈັດຕັ້ງປະຕິບັດບັນດາກິດຈະກຳ ເພື່ອເປັນການສະເຫລີມສະຫລອງໃຫ້ແກ່ 2 ວັນປະຫວັດສາດ ຂອງສອງຊາດລາວ-ຫວຽດນາມ ກໍຄື 60 ປີ ແຫ່ງການສ້າງຕັ້ງສາຍພົວພັນການທູດລາວ-ຫວຽດນາມ ແລະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ເຊິ່ງໄດ້ມີການຊຸກຍູ້ປະສານສົມທົບກັບອົງການຕ່າງໆ ເພື່ອຈັດຕັ້ງປະຕິບັດບັນດາກິດຈະກຳຕ່າງໆໃຫ້ມີປະສິດທິຜົນຢ່າງແທ້ຈິງ.

(ພາບ ແລະ ຂ່າວ: ນາງ ອາລິນ ສຸພິມມະປະດິດ)