(ສພຊ) ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 61 ປີ (5 ເມສາ 1961-5 ເມສາ 2022); ວັນທີ 1 ເມສາ 2022 ທີ່ຫ້ອງຮັບແຂກ ສະພາແຫ່ງຊາດ ນະຄອນຫລວງວຽງຈັນ ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ຕ້ອນຮັບການເຂົ້າພົບ ແລະ ອວຍພອນ ເຊິ່ງນຳໂດຍທ່ານ ພົອ. ວິໄລ ຫລ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍຄະນະ.
​ ໃນການເຂົ້າພົບຄັ້ງນີ້, ທ່ານ ພົອ. ວິໄລ ຫລ້າຄຳຟອງ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານ 2 ວາລະແຫ່ງຊາດ ທີ່ສະພາແຫ່ງຊາດ ໄດ້ຮັບຮອງເອົາ ໂດຍສະເພາະວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງທ່ານໄດ້ຍົກໃຫ້ເຫັນເຖິງຜົນງານທີ່ຍາດມາໄດ້, ຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆທີ່ເກີດຂຶ້ນ ໃນການຈັດຕັ້ງປະຕິບັດວຽກງານດັ່ງກ່າວ. ພ້ອມນັ້ນ, ທ່ານຍັງໄດ້ລາຍງານໃຫ້ຊາບກ່ຽວກັບກິດຈະກຳທີ່ຈະຈັດຂຶ້ນ ໃນໂອກາດສະເຫລີມສະຫລອງວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 61 ປີ ໃນປີນີ້.
​ ໂອກາດດຽວກັນ, ທ່ານ ປອ. ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຄະນະນຳຂອງກຳລັງປ້ອງກັນຄວາມສະຫງົບໃນແຕ່ລະຂັ້ນ ທີ່ເອົາໃຈໃສ່ໃກ້ສິດຕິດແທດ ຈົນສາມາດຍາດໄດ້ຜົນງານຫລາຍດ້ານ ໂດຍສະເພາະວຽກງານການແກ້ໄຂບັນຫາຢາເສບຕິດ ທີ່ເປັນບັນຫາຊໍາເຮື້ອມາເປັນເວລາດົນນານ ພ້ອມທັງເນັ້ນໃຫ້ຄະນະພັກ-ຄະນະນຳ ກຳລັງປ້ອງກັນຄວາມສະຫງົບ ເອົາໃຈໃສ່ກະກຽມຂໍ້ມູນທີ່ເປັນປະໂຫຍດ ເພື່ອມາລາຍງານໃນກອງປະຊຸມສະໄໝສາມັນຂອງສະພາແຫ່ງຊາດ ທີ່ຈະຈັດຂຶ້ນໃນມໍ່ໆນີ້ ໃຫ້ບັນດາທ່ານຜູ້ແທນໄດ້ຮັບຊາບ ພ້ອມທັງສະເໜີໃຫ້ມີການປະສານສົມທົບກັບພາກສ່ວນກ່ຽວຂ້ອງໃນການແກ້ໄຂ ແລະ ຕັດສິນຄະດີຕ່າງໆ ເພື່ອໃຫ້ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໄດ້ຮັບຜົນສໍາເລັດຕາມລະດັບຄາດໝາຍ.
(ພາບ ແລະ ຂ່າວ ນາງ ອາລິນ ສຸພິມມະປະດິດ)