ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           ​(ສພຊ) ວັນທີ 28 ເມສາຜ່ານມາ, ທີ່ຫ້ອງຮັບແຂກສະພາແຫ່ງຊາດ ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ບຸຍ ແທັງ ເຊິນ ລັດຖະມົນຕີກະຊວງການຕ່າງປະເທດ ສສ.ຫວຽດນາມ. ໃນໂອກາດທີ່ເດີນທາງຢ້ຽມຢາມ ສປປລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມປືກສາຫາລືດ້ານການເມືອງຂັ້ນລັດຖະມົນຕີ ຄັ້ງທີ 9 ລະຫວ່າງວັນທີ 27-29 ເມສາ 2022.
            ໂອກາດດັ່ງກ່າວ ສະຫາຍ ປອ. ໄຊສົມພອນ ພົມວິຫານ ໄດ້ກ່າວຄວາມປິຕິຊົມຊື່ນ ແລະ ຮູ້ສຶກດີໃຈ ທີ່ໄດ້ຕ້ອນຮັບສະຫາຍ ບຸຍ ແທັງ ເຊິນ ພ້ອມດ້ວຍຄະນະ ໃນການມາຢ້ຽມຢາມ ແລະ ເຮັດວຽກຄັ້ງນີ້, ສະຫາຍ ປອ. ໄຊສົມພອນ ພົມວິຫານ ຍັງໄດ້ຝາກຄວາມຢື້ຢາມຖາມຂ່າວໄປຍັງສະຫາຍ ປະທານສະພາແຫ່ງຊາດ ແຫ່ງ ສສ.ຫວຽດນາມ ເວືອງ ດິງ ເຫວະ ແລະ ບັນດາສະຫາຍການນຳຂອງຫວຽດນາມ ແລະ ຄອງຄອຍທີ່ຈະໄດ້ຕ້ອນຮັບ ແລະ ເຮັດວຽກກັບສະຫາຍໃນເດືອນພຶດສະພາທີ່ຈະມາເຖິງນີ້.
            ສະຫາຍໄດ້ຕີລາຄາສູງຕໍ່ການ ເດີນທາງມາຢ້ຽມຢາມ ສປປລາວ ຢ່າງເປັນທາງການໃນຄັ້ງນີ້ ນອກຈາກເປັນການຢ້ຽມຢາມຕາມປະເພນີ ເພື່ອເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແລ້ວ, ຍັງເປັນກິດຈະກໍາໜຶ່ງປະກອບສ່ວນເຮັດໃຫ້ການສະເຫລີມສະຫລອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ກໍຄືວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໃຫ້ມີເນື້ອໃນ ແລະ ຄວາມໝາຍຍິ່ງຂຶ້ນ, ພ້ອມກັນນັ້ນ ຍັງໄດ້ສະແດງຄວາມຍິນດີ ແລະ ຊົມເຊີຍນໍາສະຫາຍຫວຽດນາມ ທີ່ສາມາດຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ແລະ ເປີດຄືນປະເທດ ໂດຍຫລຸດຜ່ອນຂັ້ນຕອນການ ເຂົ້າ-ອອກ ເມືອງໃຫ້ສະດວກສະບາຍ; ຊົມເຊີຍສອງຂະແໜງການຕ່າງປະເທດ ທີ່ໄດ້ເຮັດວຽກຢ່າງໜັກໜ່ວງ ເພື່ອເປັນເສນາທິການ ແລະ ກະກຽມໃຫ້ແກ່ການພົບປະຂອງການນໍາຂັ້ນສູງສອງປະເທດຕະຫລອດມາ, ເຮັດໃຫ້ການພົວພັນສອງຝ່າຍ ນັບມື້ນັບຂະຫຍາຍຕົວ ແລະ ປາກົດຜົນເປັນຈິງ, ຮ່ວມກັນຈັດຕັ້ງສະເຫລີມສະຫລອງ ປີສາມັກຄີມິດຕະພາບ ໃນປີ 2022 ໃຫ້ມີບັນຍາກາດຟົດຟື້ນ, ເຕັມໄປດ້ວຍເນື້ອໃນ ແລະ ຄວາມໝາຍ ເພື່ອໃຫ້ຄົນຮຸ່ນໜຸ່ມ ທີ່ເປັນຜູ້ສືບທອດໄດ້ຮັບຮູ້ ແລະ ເຂົ້າໃຈຕໍ່ສາຍພົວພັນພິເສດສອງປະເທດ.
            ພ້ອມນີ້, ສະຫາຍ ຍັງໄດ້ສະແດງຄວາມຂອບໃຈມາຍັງພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ ແລະ ທັນການ ຕໍ່ ສປປລາວ ຕະຫລອດມາ ບໍ່ວ່າໃນໄລຍະຕໍ່ສູ້ກູ້ຊາດ, ໄລຍະສ້າງສາພັດທະນາປະເທດຊາດໃນປັດຈຸບັນ ກໍຄືເວລາປະສົບກັບໄພພິບັດ ແລະ ການແຜ່ລະບາດຂອງພະຍາດໂຄວິດ-19, ກໍໄດ້ບິແບ່ງການຊ່ວຍເຫລືອ ໂດຍໄດ້ສົ່ງທິມຊ່ຽວຊານແພດ, ຢາວັກຊີນ ແລະ ຢາປົວພະຍາດ ມາຊ່ວຍເຫລືອລັດຖະບານລາວ ໃນການສະກັດກັ້ນ ແລະ ຕ້ານການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປລາວ.
            ໃນຕອນທ້າຍ ສະຫາຍ ປອ. ໄຊສົມພອນ ພົມວິຫານ ໄດ້ສະແດງຄວາມຊົມເຊີຍ ການມາຢ້ຽມຢາມເຮັດວຽກຂອງສະຫາຍ ແລະ ຄະນະ ທີ່ ສປປ ລາວ ໃນຄັ້ງນີ້ ແລະ ເຊື່ອໝັ້ນວ່າໝາກຜົນຂອງການຢ້ຽມຢາມໃນຄັ້ງນີ້ ຈະເປັນການປະກອບສ່ວນອັນສຳຄັນໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ຫາຍາກໃນການພົວພັນສາກົນນີ້ ໃຫ້ຈະເລີນງອກງາມຕະຫລອດໄປ ແລະ ຖ່າຍທອດ ໃຫ້ແກ່ຮຸ່ນລູກຮຸ່ນຫຼານຂອງພວກເຮົາໄດ້ສືບທອດຕໍ່ໄປ.
            ຈາກນັ້ນ, ສະຫາຍ ບຸຍ ແທັງ ເຊິນ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ປອ. ໄຊສົມພອນ ພົມວິຫານ ທີ່ໄດ້ເສຍສະຫລະເວລາຕ້ອນຮັບຢ່າງອົບອຸ່ນ ພ້ອມທັງລາຍງານໃຫ້ຮູ້ກ່ຽວກັບຈຸດປະສົງຂອງການຢ້ຽມຢາມ ແລະ ພົບປະເຮັດວຽກຢູ່ ສປປລາວ ໃນຄັ້ງນີ້.
(ພາບ ແລະ ຂ່າວ: ສອນສັກ ວັນວິໄຊ)