ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 12 ສິງຫາ 2022 ທີ່ຫ້ອງຮັບແຂກສະພາແຫ່ງຊາດ, ສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ຫງວຽນ ຮ່ວາ ບິ່ງ ກໍາມະການກົມການເມືອງ, ເລຂາທິການສູນກາງພັກ ເລຂາຄະນະພັກ, ປະທານສານປະຊາຊົນສູງສຸດ ແຫ່ງ ສສ.ຫວຽດນາມ ພ້ອມດ້ວຍຄະນະ. ເນື່ອງໃນໂອກາດທີ່ເດີນທາງມາເຂົ້າຮ່ວມກອງປະຊຸມສານ ບັນດາແຂວງທີ່ມີຊາຍແດນຕິດຈອດກັນ 3 ປະເທດ ສປປລາວ, ສສ.ຫວຽດນາມ ແລະ ຣາຊະອານາຈັກກໍາປູເຈຍ ຄັ້ງທີ VI ໃນລະຫວ່າງວັນທີ 9-13 ສິງຫານີ້ ທີ່ນະຄອນຫຼວງວຽງຈັນ.
ການພົບປະຄັງນີ້ ເປັນໂອກາດອັນດີໃຫ້ແກ່ທັງສອງຝ່າຍໄດ້ພົບປະ ແລະ ແລກປ່ຽນຄຳຄິດຄຳເຫັນນຳກັນ ເພື່ອເປັນການຮັດແໜ້ນຄວາມສາມັກຄີ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ ແລະ ຢູ່ໃນທ່າມກາງການສະເຫລີມສະຫລອງປີສາມັກຄີມິດຕະພາບ ປີ 2022 ກໍຄື ຄົບຮອບ 60 ປີວັນສ້າງຕັ້ງສາຍພົວພັນການທູດ ແລະ ຄົບຮອບ 45 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ.
ໂອກາດນີ້, ສະຫາຍ ປອ. ໄຊສົມພອນ ພົມວິຫານ ກໍໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ສະແດງຄວາມຂອບໃຈເປັນຢ່າງສູງ ທີ່ສະຫາຍ ພ້ອມດ້ວຍຄະນະ ໄດ້ນໍາເອົາມິດຈິດມິດໃຈອັນດູດດື່ມ, ຄວາມສາມັກຄີແບບພິເສດຖານສະຫາຍອ້າຍນ້ອງ ຂອງພັກ, ລັດ ແລະ ປະຊາຊົນ ຫວຽດນາມອ້າຍນ້ອງ ມາສູ່ ພັກ, ລັດ ແລະ ປະຊາຊົນລາວບັນດາເຜົ່າພວກຂ້າພະເຈົ້າ; ຕີລາຄາສູງຕໍ່ຜົນສຳເລັດຢ່າງຈົບງາມຂອງກອງປະຊຸມສານ 3 ປະເທດ ລາວ-ກຳປູເຈຍ-ຫວຽດນາມ ຄັ້ງທີ VI ທີ່ໄດ້ຈັດຂຶ້ນຢູ່ທີ່ນະຄອນຫຼວງວຽງຈັນ; ຊົມເຊີຍ ແລະ ຕີລາຄາສູງຕໍ່ຜົນສໍາເລັດການພົບປະສອງຝ່າຍ ລະຫວ່າງ ຄະນະຜູ້ແທນສານປະຊາຊົນສູງສຸດ ສອງປະເທດລາວ-ຫວຽດນາມ ແລະ ການເຂົ້າຮ່ວມພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງສານປະຊາຊົນສູງສຸດ ແຫ່ງ ສປປລາວ ຄົບຮອບ 40 ປີ. ພ້ອມນັ້ນ, ສະຫາຍປະທານສະພາແຫ່ງຊາດ ຍັງໄດ້ອວຍພອນໃຫ້ການຢ້ຽມຢາມ ສປປລາວ ຂອງສະຫາຍ ພ້ອມດ້ວຍຄະນະ ໃນຄັ້ງນີ້ ຈົ່ງປະສົບຜົນສຳເລັດອັນຈົບງາມ ເຊິ່ງເປັນການປະກອບສ່ວນອັນສຳຄັນ ໃນການເພີ່ມພູນຄູນສ້າງສາຍພົວພັນມິດຕະ ພາບຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະ ກໍຄືລະຫວ່າງສອງອົງການຕຸລາການລາວ-ຫວຽດນາມ ໃຫ້ເລິກເຊິ່ງຍິ່ງໆຂຶ້ນ.
ໃນຕອນທ້າຍ ສະຫາຍ ຫງວຽນ ຮ່ວາ ບິ່ງ ໄດ້ສະແດງຄວາມຂອບໃຈຕໍ່ສະຫາຍ ປະທານສະພາແຫ່ງຊາດ ແຫ່ງ ສປປລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມນັ້ນ, ຍັງໄດ້ລາຍງານໃຫ້ຮູ້ກ່ຽວກັບຈຸດປະສົງຂອງການມາຢ້ຽມຢາມ ສປປລາວ ກໍຄືນະຄອນຫຼວງວຽງຈັນໃນຄັ້ງນີ້ ພ້ອມນັ້ນ, ຍັງໄດ້ລາຍງານກ່ຽວກັບຜົນສໍາເລັດຂອງກອງປະຊຸມສານ ບັນດາແຂວງທີ່ມີຊາຍແດນຕິດຈອດກັນ 3 ປະເທດ ສປປລາວ, ສສ.ຫວຽດນາມ ແລະ ຣາຊະອານາຈັກ ກໍາປູເຈຍ ຄັ້ງທີ VI ຕື່ມອີກ.
(ພາບ ແລະ ຂ່າວ: ກົງທະນູຄຳ ພິພັດເສລີ)