ໃນຕອນບ່າຍວັນທີ 9 ກຸມພາ 2022 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ຕ້ອນຮັບການເຂົ້າຢ້ຽມຢາມ ແລະ ເຮັດວຽກຂອງທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ ພ້ອມຄະນະ ເນື່ອງໃນໂອກາດທີ່ເຂົ້າຮ່ວມກອງປະຊຸມສໍາມະນາກັບວຽກງານຄຸ້ມຄອງສາສະໜາ 6 ແຂວງພາກໃຕ້ ເຊິ່ງທ່ານໄດ້ແຈ້ງຈຸດປະສົງແມ່ນ ເພື່ອພົບປະ ແລະ ແລກປ່ຽນຄຳຄິດເຫັນກັບປະທານຄະນະ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ການນໍາຂອງແຂວງ.

ເຊິ່ງທ່ານ ປະທານສະພາປະຊາຊົນແຂວງກໍ່ໄດ້ສະແດງຂອບອົກຂອບໃຈ ທີ່ທ່ານຮອງປະທານສະພາແຫ່ງຊາດໄດ້ຍາດເວລາເຂົ້າພົບປະເຮັດວຽກໃນຄັ້ງນີ້, ວຽກງານສາສະໜາເປັນວຽກງານໜຶ່ງທີ່ສໍາຄັນໃນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ ບໍ່ວ່າຈະເປັນທາງດ້ານຈິດໃຈ, ການເຊື່ອຖື ແຕ່ການເຄື່ອນໄຫວຕ້ອງສອດຄ່ອງກັບລະບຽບກົດໝາຍທີ່ວາງໄວ້ ຫຼັງຈາກນັ້ນ ທ່ານຮອງປະທານສະພາແຫ່ງຊາດ ກໍ່ໄດ້ສືບຕໍ່ເຂົ້າພົບປະຢ້ຽມຢາມ ການນໍາສູງສຸດຂອງແຂວງ ໂດຍການຕ້ອນຮັບຂອງທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານພັກແຂວງ ເຈົ້າແຂວງໆສະຫວັນນະເຂດ ທີ່ຫ້ອງຮັບແຂກຫ້ອງວ່າການແຂວງອີກດ້ວຍ ແລະ ໃນຕອນເຊົ້າວັນທີ 10 ກຸມພາ 2022 ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຂົ້າວາງກະຕ່າດອກໄມ້ ແລະ ດອກໄມ້ ຢູ່ຕໍ່ໜ້າອະນຸສາວະລີປະທານໄກສອນ ພົມວິຫານ ເພື່ອສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ, ສັນລະເສີນເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງທ່ານປະທານທີ່ໄດ້ອຸທິດຕະຫຼອດຊີວິດ ເພື່ອປະເທດ ແລະ ການປະຕິວັດ ນຳພາປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນໄປເລື້ອຍໆ.