ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ຕອນເຊົ້າຂອງວັນທີ 25 ເມສາ 2022 ທີ່ສະໂມສອນເມືອງໃໝ່, ແຂວງຜົ້ງສາລີ ທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງ, ປະທານຄະນະ ສສຊ ປະຈໍາເຂດເລືອກຕັ້ງ 2 ແຂວງຜົ້ງສາລີ ເຄື່ອນໄຫວຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ, ສໍາປະທານທີ່ດິນຂອງລັດ ແລະ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ; ມີບັນດາທ່ານ ສະມາຊິກສະພາປະຊາຊົນແຂວງ ປະຈໍາເມືອງ, ບັນດາທ່ານຮອງເລຂາພັກເມືອງ, ຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການ, ອົງການທຽບເທົ່າຫ້ອງການຂັ້ນເມືອງ, ກອງບັນຊາການ ປກຊ ເມືອງ-ປກສ ເມືອງ  ອົງການແນວລາວສ້າງຊາດເມືອງ, ສະຫາພັນນັກຮົບເກົ່າເມືອງ, ອົງການຈັດຕັ້ງມະຫາຊົນຂັ້ນເມືອງ ເຂົ້າຮ່ວມ.

ທັງນີ້ກໍເພື່ອເປັນການຈັດຕັ້ງປະຕິບັດສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບເລກທີ 12/ສພຊ, ລົງວັນທີ 15 ພະຈິກ 2016 ໄດ້ກໍານົດ; ໂດຍສະເພາະແມ່ນຕິດຕາມ, ກວດກາ ແລະ ເກັບກຳຂໍ້ມູນການຈັດຕັ້ງປະຕິບັດຕາມມະຕິຂອງສະພາແຫ່ງຊາດສະບັບເລກທີ 25/ສພຊ, ລົງວັນທີ 19 ພະຈິກ 2019 ແລະ ມະຕິກອງປະຊຸມຂອງສະພາປະຊາຊົນແຂວງ ວ່າດ້ວຍການຮັບ ຮອງເອົາການສະເໜີປົດ (ລຶບ) ບັນຊີຄ້າງຂອງບັນດາໂຄງການສ້າງສັນຍາເຊົ່າ-ສຳປະທານທີ່ດິນຂອງລັດ ສະບັບເລກທີ 69/ສພຂ.ຜລ, ລົງວັນທີ 24 ທັນວາ 2020; ຕິດຕາມ, ກວດກາການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍທີ່ພົວພັນກັບວຽກງານເຊົ່າ ແລະ ສໍາປະທານທີ່ດິນຂອງລັດ ໃນການດໍາເນີນກິດຈະການຕ່າງໆ ຢູ່ພາຍໃນແຂວງຜົ້ງສາລີ ຮັບປະກັນໃນການຄຸ້ມຄອງ, ນໍາໃຊ້ທີ່ດິນໃຫ້ມີປະສິດທິພາບ, ປະສິດທິຜົນສູງ ແລະ ຕິດຕາມຊຸກຍູ້ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ.

ທີ່ກອງປະຊຸມ ໄດ້ຮັບຟັງ ທ່ານ ຄໍາເລີດ ອີນແກ້ວ ຮອງເຈົ້າເມືອງໃໝ່ ຜູ້ຊີ້ນໍາວຽກງານເສດຖະກິດຂັ້ນເມືອງ ຂຶ້ນລາຍງານການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ ແລະ ວຽກງານສໍາປະທານທີ່ດິນຂອງລັດ ໃນໄລຍະຜ່ານມາ, ຮັບຟັງ ທ່ານ ທອງຄູນ ໄຊຍະກອນ ຮອງເລຂາພັກເມືອງ, ປະທານກວດກາພັກ-ລັດເມືອງ, ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເມືອງໃໝ່ ຂຶ້ນລາຍງານ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ, ຮັບຟັງ ທ່ານ ນາງ ພີມພາ ມະຫາວົງທັດ ຫົວໜ້າຂະແໜງຈັດຕັ້ງ-ກວດກາ ຂຶ້ນແນະນໍາການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ ແລະ ບຸກຄະລາກອນເສນາທິການຊ່ວຍວຽກຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ. ຈາກນັ້ນ ຜູ້ເຂົ້າຮ່ວມກອງປະຊຸມໄດ້ພັດປ່ຽນກັນປະກອບຄວາມເຫັນ ຢ່າງກົງໄປກົງມາລັກສະນະສ້າງສັນ.

ຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ຍັງໄດ້ເໜັ້ນບາງບັນຫາຕໍ່ກອງປະຊຸມໃຫ້ເອົາໃຈໃສ່ ເປັນຕົ້ນແມ່ນ: ສະເໜີອົງການປົກຄອງເມືອງເອົາໃຈໃສ່ວຽກງານການເຊົ່າ, ສໍາປະທານທີ່ດິນຂອງລັດ ໂດຍສະເພາະກວດກາຄືນສັນຍາ ເຊົ່າ, ສໍາປະທານບັນດາກິດຈະການທີ່ຂັ້ນເມືອງຄຸ້ມຄອງ ໃຫ້ຄົບຖ້ວນຕາມກົດໝາຍກຳນົດ; ຮຽກຮ້ອງຂະແໜງການກ່ຽວຂ້ອງຂັ້ນເມືອງ ໃຫ້ການປະສານງານຢ່າງກົມກຽວ ແລະ ສະໝໍາສະເໝີ ກັບຄະນະສະມາຊິກສະພາປະຊາຊົນແຂວງ ປະຈໍາເມືອງໃໝ່ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ກໍ່ຕ້ອງເອົາໃຈໃສ່ປະຕິບັດໜ້າທີ່ຕາມຂອບເຂດສິດ ແລະ ໜ້າທີ່ຂອງຕົນຢ່າງເຂັ່ມງວດ.

ໃນຕອນບ່າຍຂອງວັນດຽວກັນນີ້ທ່ານ ທອງສີ ເສົາສຸລິພົມ ພ້ອມດ້ວຍທີມງານ ໄດ້ລົງຕິດຕາມ ຄວາມຄືບໜ້າຂອງການສ້າງບ້ານນ້ອຍໃຫ້ກາຍເປັນບ້ານໃຫຍ່ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອບໃນຊົນນະບົດ ຢູ່ຈຸດສຸມພັດທະນາ ບ້ານສະຫຼວງ, ເມືອງໃໝ່, ແຂວງຜົ້ງສາລີ ແລະ ຍັງໄດ້ນໍາເອົາເກືອຈໍານວນ 30 ເປົາ, ມູນຄ່າ 750.000 ກີບ ມອບໃຫ້ບ້ານສະຫຼວງ.

ການເຄື່ອນໄຫວຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍທີ່ພົວພັນວຽກງານເຊົ່າ, ສໍາປະທານທີ່ດິນຂອງລັດ ແລະ ການຈັດຕັ້ງປະຕິບັດໜ້າທີ່ວຽກງານຂອງຄະນະສະມາຊິກສະພາປະຊາຊົນຂັ້ນແຂວງປະຈຳເມືອງ ຍັງຈະສືບຕໍ່ເຄື່ອນໄຫວຢູ່ເມືອງ ບຸນໃຕ້, ເມືອງຜົ້ງສາລີ ໄປຈົນເຖິງວັນທີ 01 ພຶດສະພາ 2022 ຈິ່ງຈະສໍາເລັດ.

ພາບ-ຂ່າວ: ທອງຄໍາ ວິໄລຈິດ.