ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 19 ມີນາ 2022 ທີ່ຜ່ານມານີ້, ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ,ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ເດີນທາງໄປມອບເຄື່ອງຊ່ວຍເຫຼືອໃຫ້ໂຮງຮຽນປະຖົມສົມບູນ ແລະ ສຸກສາລາ ບ້ານຊ້ອງໃຕ້. ເຊິ່ງເຄື່ອງທີ່ນຳມາມອບໃນຄັ້ງນີ້ ປະກອບມີ ພັດລົມແຂວນຝາ ຈຳນວນ 15 ໜ່ວຍ.

ໃຫ້ກຽດມອບໂດຍທ່ານ ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ປະທານສະພາປະຊາຊົນແຂວງ. ຂຶຶ້ນຮັບໂດຍມີຕາງໜ້າຄະນະພັກ, ອົງການປົກຄອງບ້ານ, ຄະນະພັກໂຮງຮຽນປະຖົມສົມບູນ ແລະ ສຸກສາລາບ້ານຊ້ອງໃຕ້, ເຂົ້າຮ່ວມເປັນສັກຂີພະຍານໂດຍທ່ານ ສາຍສະໝອນ ສາລິວົງ ເລຂາຄະນະບໍລິຫານງານພັກເມືອງ, ເຈົ້າເມືອງຈອມເພັດ ແລະ ຂະແໜງການທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.

ໂອກາດນີ້ຕາງໜ້າຄະນະພັກໂຮງຮຽນປະຖົມສົມບູນ ແລະ ສຸກສາລາບ້ານຊ້ອງໃຕ້ ໄດ້ຂຶ້ນກ່າວສະແດງຄວາມຂອບໃຈ ຕໍ່ການນໍາສະພາປະຊາຊົນແຂວງ ທີ່ໄດ້ນໍາເອົາເຄື່ອງຊ່ວຍເຫຼືອ ກໍຄືພັດລົມ ຈຳນວນນີ້ ມາມອບໃຫ້ ແລະ ຈະໄດ້ໝູນໃຊ້ເຂົ້າໃນວຽກງານການຮຽນ-ການສອນ ແລະ ວຽກສຸກສາລາ ເພື່ອຫຼຸດຜ່ອນຄວາມຮ້ອນ ຂອງອາກາດໃນລະດູຮ້ອນ.

ໃນຕອນທ້າຍ ທ່ານ ວົງສະຫວັນ ເທບພະຈັນ ໄດ້ຊີ້ນຳ ໃຫ້ຄະນະພັກ, ອົງການປົກຄອງບ້ານ, ຄະນະພັກໂຮງຮຽນປະຖົມສົມບູນ ແລະ ສຸກສາລາບ້ານຊ້ອງໃຕ້ ເອົາໃຈໃສ່ໃນການສົ່ງເສີມການຜະລິດກະສິກຳ (ການປູກ-ການລ້ຽງ)ເປັນສິນຄ້າ, ເອົາໃຈໃສ່ໃນການສິດສອນແບ່ງປັນຄວາມຮູ້, ເບິ່ງແຍງ ແລະ ປິ່ນປົວສຸຂະພາບຂອງນັກຮຽນ ກໍຄືປະຊາຊົນພາຍໃນບ້ານດັ່ງກ່າວ, ທັງໃຫ້ພ້ອມກັນມີສ່ວນຮ່ວມ ຢ່າງສຸດຄວາມສາມາດ ໃນການຈັດຕັ້ງປະຕິບັດ 02ວາລະແຫ່ງຊາດກ່ຽວກັບ ບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.

ພາບ: ເພັດສະໝອນ ທຳມຸງຄຸນ

ຂ່າວ: ໄວພົດ ເສລິພົງໄຊ