ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 21-23 ມີນາ 2022 ທີ່ຜ່ານມານີ້, ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ປະທານສະພາປະຊາຊົນແຂວງໄດ້ລົງເຄື່ອນໄຫວເຜີຍແຜ່ເອກະສານ 02 ວາລະແຫ່ງຊາດ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງ ຊຸດທີ II, ຢູ່ໃນ 03 ຈຸດຂອງເມືອງ ວຽງຄຳ, ແຂວງ ຫຼວງພະບາງ (ຫ້ອງປະຊຸມໃຫຍ່ຂອງເມືອງ, ສະໂມສອນບ້ານເມືອງໝ້ວຍ ແລະ ສະໂມສອນບ້ານ ນໍ້າຊອຍ). ໃຫ້ກຽດຕ້ອນຮັບໂດຍທ່ານ ຊາຍພອນ ຈັນທຸມມາ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງວຽງຄຳ. ມີບັນດາທ່ານຄະນະບໍລິຫານງານພັກເມືອງ, ຫົວໜ້າ-ຮອງຫົວໜ້າຫ້ອງການ, ອົງການ ແລະ ໜ່ວຍງານທີ່ກ່ຽວຂ້ອງຂອງເມືອງ ພ້ອມທັງມີຄະນະພັກ, ອົງການປົກຄອງບ້ານ ແລະ ປະຊາຊົນຜູ້ມີສິດເລືອກຕັ້ງພາຍໃນ 15 ບ້ານ ທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ ຈໍານວນ 731 ທ່ານ,ຍິງ 199 ທ່ານ.

ໃນໂອກາດນີ້, ຍັງໄດ້ຮັບຟັງການລາຍງານຈາກທ່ານເຈົ້າເມືອງ ກ່ຽວກັບສະພາບລວມ ຂອງການຈັດຕັ້ງປະຕິບັດວຽກງານຮອບດ້ານແລະ ວຽກງານຄະນະສະມາຊິກສະພາປະຊາຊົນແຂວງ ປະຈຳເມືອງໃນໄລຍະ 01 ປີຜ່ານມາ. ຈາກນັ້ນ, ກໍໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານ ແລະ ແຜນພັດທະນາ ຂອງແຕ່ລະບ້ານ ໃນ 01 ປີ ຜ່ານມາ ຈາກຄະນະພັກ ແລະ ອົງການປົກຄອງບ້ານ ທີ່ເຂົ້າຮ່ວມ. ເຊິ່ງບັນດາທ່ານ ໄດ້ຍົກໃຫ້ເຫັນທັງຂໍ້ສະດວກ ແລະ ຂໍຫຍຸ້ງຍາກ ຂອງການຈັດຕັ້ງປະຕບັດວຽກງານ ພ້ອມທັງໄດ້ມີຂໍ້ສະເໜີບາງຈຸດເພື່ອຂໍໃຫ້ຂັ້ນເທິງມີທິດຊີ້ນຳໃນການແກ້ໄຂວຽກງານ.

ໃນຕອນທ້າຍ ທ່ານ ວົງສະຫວັນ ເທບພະຈັນ ໄດ້ຊີ້ນຳ ໃຫ້ຄະນະນຳພັກ, ອົງການປົກຄອງເມືອງ, ຄະນະພັກ ແລະ ອົງການປົກຄອງບ້ານ ເອົາໃຈໃສ່ໃນການນຳພາ-ຊີ້ນຳ ພະນັກງານ-ລັດຖະກອນ ແລະ ປະຊາຊົນພາຍໃນແຕ່ລະບ້ານ ໃຫ້ອອກແຮງແຂ່ງຂັນກັນ ໃນການປະຕິບັດໜ້າທີ່ວຽກງານ ແລະ ແຂ່ງຂັນກັນໃນການຜະລິດກະສິກຳເປັນສິນຄ້າ, ເປັນຕົ້ນແມ່ນການປູກພືດຜັກປອດສານພິດ ແລະ ການລ້ຽງສັດເປັນສິນຄ້າ ເພື່ອຮັບໃຊ້ພາຍໃນເມືອງ ແລະ ສົ່ງອອກໄປຍັງຕ່າງແຂວງ-ຕ່າງປະເທດ, ທ່ານໄດ້ເນັ້ນໃຫ້ສົ່ງເສີມການຜະລິດທີ່ເປັນມູນເຊື້ອ, ການຜະລິດທີ່ຕິດພັນກັບການດຳລົງຊີວິດປະຈຳວັນ ຂອງປະຊາຊົນ ເພື່ອພ້ອມກັນຫຼຸດພົ້ນອອກຈາກຄວາມທຸກຍາກເທື່ອລະກ້າວ ໄປພ້ອມໆກັບການປະກອບອາຊີບອື່ນໆອີກ ທີ່ບໍ່ຂັດກັບ ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ. ສຳລັບການຈັດຕັ້ງປະຕິບັດ 02 ວາລະແຫ່ງຊາດ ຄະນະພັກ, ອົງການປົກຄອງທຸກຂັ້ນ ຕ້ອງເອົາໃຈໃສ່ປະຕິບັດຢ່າງເຂັ້ມງວດ, ບັນຫາຢາເສບຕິດ ຖ້າເກີດຂຶ້ນຢູ່ບ່ອນໃດ ບ່ອນນັ້ນຕ້ອງຮັບຜິດຊອບ ຕາມກົດໝາຍຢ່າງເຂັ້ມງວດ ແລະ ເດັດຂາດ, ສ່ວນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕ້ອງເອົາໃຈໃສ່ໃນການປະຕິບັດນະໂຍບາຍ ປະຢັດມັດທະຍັດ ແລະ ປະຕິບັດຕາມວິໄນການເງິນ ຢ່າງເຂັ້ມງວດ, ຖ້າບຸກຄົນ ຫຼື ການຈັດຕັ້ງໃດ ກະທຳຜິດຕໍ່ວິໄນການເງິນຕ້ອງດຳເນີຄະດີຕາມກົດໝາຍ ໃຫ້ເດັດຂາດ.

ພາບ ແລະ ຂ່າວໂດຍ: ໄວພົດ ເສລິພົງໄຊ