ໃນຕອນບ່າຍຂອງວັນທີ 14 ກຸມພາ 2022 ທີ່ຫ້ອງຮັບແຂກຫ້ອງວ່າການປົກຄອງເມືອງເລົ່າງາມ ແຂວງສາລະວັນ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍທ່ານ ສົມສັກ ທົງຄໍາຫານ ເລຂາພັກເຈົ້າເມືອງເລົ່າງາມ; ທ່ານ ນາງ ອິນແປງ ຊາມົນຕີ ປະທານສະພາອຸດສາຫະກໍາ ແລະການຄ້າແຂວງ ສາລະວັນ ພ້ອມດ້ວຍຄະນະ ໄດ້ໃຫ້ກຽດຕ້ອນຮັບ ທ່ານ ສົມມາດ ພົນເສນາ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໃນໂອກາດທີ່ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງເລົ່າງາມແຂວງສາລະວັນໃນຄັ້ງນີ້.
ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວຕ້ອນຮັບ ແລະ ລາຍງານເຖິງສະພາບ ລວມທົ່ວແຂວງ ໃນໄລຍະຜ່ານມາ ໂດຍຫຍໍ້, ລາຍງານການຈັດຕັ້ງປະຕິບັດວຽກງານຂອງສະພາປະຊາຊົນແຂວງໃນຜ່ານມາ, ທ່ານ ນາງ ອິນແປງ ຊາມົນຕີ ກໍໄດ້ລາຍງານສະພາບການຊື້ຂາຍມັນຕົ້ນພາຍໃນແຂວງ ເຊິ່ງເນື້ອທີ່ການຜະລິດມັນຕົ້ນທົ່ວແຂວງ ປີ 2021 ຈໍານວນ 35.343 ເຮັກຕາ, ສະເພາະເມືອງເລົ່າງາມ 14.000 ເຮັກຕາ; ໃນທົ່ວແຂວງ ມີລານຮັບເກັບຊື້ມັນຕົ້ນທັງໝົດ 187 ລານ ສະເພາະເມືອງເລົ່າງາມ 75 ລານ ພ້ອມນັ້ນກໍຂໍທິດຊີ້ນໍາໃນການຈັດຕັ້ງປະຕິບັດກ່ຽວກັບຄວາມຫຍຸ້ງຍາກຈາໍນວນໜຶ່ງ ໃນການສົ່ງອອກມັນຕົ້ນໄປປະເທດໃກ້ຄຽງ…
ຈາກນັ້ນ ທ່ານຮອງປະທານ ສະພາແຫ່ງຊາດ, ທ່ານປະທານສະພາປະຊາຊົນແຂວງ ແລະ ຄະນະ ໄດ້ໄປຢ້ຽມຢາມລານຮັບເກັບຊື້ມັນຕົ້ນດິບ, ມັນຕົ້ນແຫ້ງ ທີ່ບ້ານເຕເມແບ່ງເມືອງເລົ່າງາມ; ໄດ້ໄປຊົມສວນກ້າເບ້ຍມັນຕົ້ນ ຂອງບໍລິສັດສາລະວັນ ພັດທະນາຂາອອກ-ຂາເຂົ້າ ຈໍາກັດຜູ້ດຽວ ເຊິ່ງໃນແຕ່ລະຈຸດກໍໄດ້ຟັງການລາຍງານໃນການເຄື່ອນ ໄຫວແຕ່ລະກິດຈະກໍາການຊື້-ຂາຍມັນຕົ້ນຂອງບໍລິສັດ ໂດຍລວມແລ້ວຖືວ່າບໍລິສັດໄດ້ເຮັດຖືກຕ້ອງຕາມກົດໝາຍ ລະບຽບການທີ່ວາງອອກລວມເຖິງຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດ. ພ້ອມນີ້ ຮອງປະທານສະພາແຫ່ງຊາດ ກໍໄດ້ມີຄຳເຫັນຊີ້ນຳໂດຍທ່ານໄດ້ຊົມເຊີຍຕໍ່ກັບບໍລິສັດທີ່ໄດ້ສ້າງລາຍຮັບ ໃຫ້ແກ່ພໍ່ປະຊາຊົນເຮັດໃຫ້ເສດຖະກິດມີການຂະ ຫຍາຍຕົວຢ່າງຕໍ່ເນື່ອງ. ພ້ອມນັ້ນກໍເນັ້ນໃຫ້ບໍລິສັດຊ່ວຍສົ່ງເສີມ ແລະ ເສີມຂະຫຍາຍທ່າແຮງບົ່ມຊ້ອນຂອງແຂວງ ໃຫ້ມີປະສິດທິຜົນ ເພື່ອການພັດທະນາທາງດ້ານກະສິກຳ, ອຸດສາຫະກຳ; ເປັນເຈົ້າການຊຸກຍູ້ ແລະ ຊ່ວຍເຫຼືອປະຊາ ຊົນໃນການຜະລິດເປັນສິນຄ້າ ແລະ ສ້າງເປັນຄອບຄົວຕົວແບບ.(ໂດຍ ນາງ ຄັດສອນ ຮຸ່ງສະຫວ່າງ)
