(ສພຊ) ໃນຕອນບ່າຍຂອງວັນທີ 8 ກັນຍາ 2022 ທີ່ຫ້ອງຮັບແຂກສະພາແຫ່ງຊາດ ທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທຳ-ສັງຄົມ, ປະທານຄະນະມິດຕະພາບລັດຖະສະພາ ລະຫວ່າງ ລາວ-ຍີ່ປຸ່ນ ໄດ້ຕ້ອນຮັບທ່ານ ມາຊາຮິໂຣ ໂຄມູລະ (Masahiro Komura) ຜູ້ບໍລິຫານຄະນະສະຫະພັນລັດຖະສະພາອົງການອາຫານໂລກ, ສະມາຊິກສະພາຜູ້ແທນຣາຊະດອນຍີ່ປຸ່ນ.

ໂອກາດດັ່ງກ່າວ, ທ່ານ ນາງ ທຸມມາລີ ວົງພະຈັນ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ມາຊາຮິໂຣ ໂຄມູລະ ພ້ອມດ້ວຍຄະນະ ທີ່ໄດ້ເຂົ້າຢ້ຽມຂໍ່ານັບໃນຄັ້ງນີ້ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອອັນດີງາມ ແລະ ຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ ແລະ ຍີ່ປຸ່ນ ກໍຄືສອງອົງການນິຕິບັນຍັດ ໃຫ້ເປັນຮູບປະທໍາຍິ່ງໆຂຶ້ນ, ເປັນໂອກາດດີໃຫ້ແກ່ການປຶກສາຫາລື ກ່ຽວກັບວຽກງານອາຫານ ວຽກງານການຊຸກຍູ້ການພົວພັນຮ່ວມມືລະຫວ່າງສອງປະເທດ ກໍຄືສອງສະພາ; ຕີລາຄາສູງ ຕໍ່ຜົນສໍາເລັດ ແລະ ການເຄື່ອນໄຫວຂອງ ທ່ານ ມາຊາຮິໂຣ ໂຄມູລະ, ໂດຍສະເພາະແມ່ນຜົນງານໃນວຽກງານຮັບປະກັນດ້ານສະບຽງອາຫານຂອງໂລກ, ວຽກງານມະນຸດສະທຳ ແລະ ບັນເທົາທຸກ ກໍຄືການເຄື່ອນໄຫວວຽກງານຂອງອົງການນິຕິບັນຍັດ ຂອງທ່ານ ແລະ ການພົວພັນຮ່ວມມື ລະຫວ່າງ ສອງປະເທດ ກໍຄື ລະຫວ່າງ ສອງອົງການນິຕິບັນຍັດໃນໄລຍະຜ່ານມາ ແມ່ນໄດ້ຮັບການເສີມຂະຫຍາຍຢ່າງຕໍ່ເນື່ອງ ໂດຍສະເພາະໄດ້ມີການຍົກລະດັບ ການພົວພັນຮ່ວມມື ຈາກຄູ່ຮ່ວມມືຮອບດ້ານ ມາເປັນຄູ່ຮ່ວມມືຍຸດທະສາດ ໃນປີ 2015 ເຊິ່ງສະແດງອອກສອງປະເທດໄດ້ມີການແລກປ່ຽນຢ້ຽມຢາມ ຂອງຄະນະຜູ້ແທນຂັ້ນສູງ ຈົນຕະຫຼອດຮອດການຢ້ຽມຢາມແລກປ່ຽນບົດຮຽນຂອງວິຊາການນັບແຕ່ສູນກາງ ແລະ ທ້ອງຖິ່ນນຳກັນຢ່າງເປັນປົກກະຕິ ແລະ ຕີລາຄາສູງທີ່ລັດຖະບານຍີ່ປຸ່ນ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປລາວ ໃນການພັດທະນາດ້ານພື້ນຖານໂຄງລ່າງ, ດ້ານເສດຖະກິດ, ວັດທະນະທໍາ, ການສຶກສາ, ສາທາລະນະສຸກ, ແຮງງານ, ການສົ່ງນັກກົດໝາຍໄປຊ່ວຍສ້າງປະມວນກົດໝາຍອາຍາ ແລະ ກົດໝາຍແພ່ງ, ການສົ່ງອາສາສະໝັກ ແລະ ຊ່ຽວຊານຍີ່ປຸ່ນ ມາເຮັດວຽກຢູ່ລາວ ແລະ ສະໜອງທຶນການສຶກສາໃຫ້ແກ່ ສປປລາວ ໃນແຕ່ລະປີ ລວມທັງໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ. ພິເສດ, ການຊ່ວຍເຫຼືອອັນລໍ້າຄ່າໃນການປ້ອງກັນ, ສະກັດກັ້ນການແຜ່ລະບາດຂອງໂຄວິດ-19 ພ້ອມທັງຂໍສະເໜີໃຫ້ທ່ານ ມາຊາຮິໂຣ ໂຄມູລະ ແລະ ຄະນະ ຈົ່ງສືບຕໍ່ຊ່ວຍເຫຼືອ, ສະໜັບສະໜູນ ສປປລາວ ໃນວຽກງານອາຫານ, ວຽກງານມະນຸດສະທຳ ແລະ ອື່ນໆ; ສະເໜີໃຫ້ສືບຕໍ່ພົວພັນຮ່ວມມື ແລກປ່ຽນຄໍາຄິດຄໍາເຫັນ, ຂໍ້ມູນຂ່າວສານ ລະຫວ່າງອົງການນິຕິບັນຍັດ ລາວ-ຍີ່ປຸ່ນ ເວົ້າລວມ, ເວົ້າສະເພາະ ການພົວພັນຮ່ວມມືລະຫວ່າງ ຄະນະມິດຕະພາບ ລັດຖະສະພາ ລາວ-ຍີ່ປຸ່ນ, ຍີ່ປຸ່ນ-ລາວ ໃຫ້ເຕີບໃຫຍ່ເຂັ້ມແຂງ; ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອ ແກ່ ສປປລາວ ໃນໄລຍະຜ່ານມາ ເຊິ່ງເປັນການປະກອບສ່ວນອັນສຳຄັນ ເຂົ້າໃນການພັດທະນາ ແລະ ສ້າງສາປະເທດຊາດ.

ທ່ານ ມາຊາຮິໂຣ ໂຄມູລະ ກໍໄດ້ກ່າວສະແດງຄວາມຂອບໃຈຕໍ່ທ່ານ ນາງ ທຸມມາລີ ວົງພະຈັນ ທີ່ໄດ້ເສຍສະຫຼະເວລາອັນມີຄຸນຄ່າໃຫ້ການຕ້ອນຮັບໃນຄັ້ງນີ້ ແລະ ຜົນງານການເຄື່ອນໄຫວຂອງຕົນ ພ້ອມດ້ວຍຄະນະ ແລະ ໃຫ້ຮູ້ກ່ຽວກັບທິດທາງແຜນການການເສີມຂະຫຍາຍການພົວພັນຮ່ວມມືລະຫວ່າງ ຄະນະມິດຕະພາບ ລັດຖະສະພາ ລາວ-ຍີ່ປຸ່ນ, ຍີ່ປຸ່ນ-ລາວ ໃນຕໍ່ໜ້າ ແລະ ຈະນໍາເອົາຂໍ້ສະເໜີດັ່ງກ່າວ ໄປສືບຕໍ່ປະຕິບັດ ແລະ ປະສານສົມທົບກັບພາກສ່ວນກ່ຽວຂ້ອງ ເພື່ອນໍາໄປພິຈາລະນາຕອບສະໜອງແກ້ໄຂຕາມສະພາບຄວາມເປັນຈິງ.

(ພາບ ແລະ ຂ່າວ: ສອນສັກ ວັນວິໄຊ)