ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ປະທານຄະນະປະຈໍາສະພາປະຊາຊົນແຂວງຄໍາມ່ວນ ພ້ອມດ້ວຍຄະນະເຄື່ອນໄຫວຈັດຕັ້ງປະຕິບັດວຽກງານ ຢູ່ເມືອງໄຊບົວທອງ ແລະ ເມືອງເຊບັ້ງໄຟ.

​ພ.ຈ. 21, 2022 | ເຂດ 12 ຄຳມ່ວນ

ໂດຍປະຕິບັດຕາມກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນແຂວງ( ສະບັບປຸງ) ປີ 2016 ສະບັບເລກທີ 12/ສພຊ ລົງວັນທີ 15 ພະຈິກ 2016.
ໃນລະຫວ່າງວັນທີ 15-16 ພະຈິກ 2022 ທ່ານ ບຸນມີ ພິມມະສອນ ປະທານຄະນະປະຈໍາສະພາປະຊາຊົນແຂວງ ປະທານສະພາປະຊາຊົນແຂວງຄໍາມ່ວນ ພ້ອມດ້ວຍ ກຳມະການຄະນະປະຈໍາສະພາປະຊາຊົນແຂວງ, ມີບັນດາທ່ານ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ແລະ ຄະນະທີມງານຕິດຕາມໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້, ເກັບກຳຂໍ້ມູນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍຢູ່ ເມືອງໄຊບົວທອງ ແລະ ເມືອງເຊບັ້ງໄຟ ໂດຍການຕ້ອນຮັບ ແລະ ເຂົ້າຮ່ວມເຮັດວຽກຂອງທ່ານ ນວນຕາ ແກ້ວນະວົງ ເຈົ້າເມືອງໄຊບົວທອງ ແລະ ທ່ານ ທອງໄຊ ມັງໜໍ່ເມກ ເຈົ້າເມືອງເຊບັ້ງໄຟ ພ້ອມດ້ວຍ ບັນດາທ່ານຄະນະປະຈໍາພັກເມືອງ ແລະ ຫົວໜ້າ-ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງການເຄື່ອນໄຫວຕິດຕາມກວດກາຄັ້ງນີ້:
1. ເພື່ອຕິດຕາມກວດກາການຈັດຕັ້ງປະຕິບັດ ມະຕິກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຄໍາມ່ວນ ຊຸດທີ II;
2. ເພື່ອເປັນຂໍ້ມູນສັງລວມ ໃຫ້ແກ່ຄະນະປະຈໍາສະພາປະຊາຊົນແຂວງຄໍາມ່ວນ ລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງຄໍາມ່ວນ ຊຸດທີ II ພິຈາລະນາ;
3. ເພື່ອຕິດຕາມກວດກາ ການເຄົາລົບ ແລະ ຈັດຕັ້ງປະຕິບັດ ລັດຖະທຳມະນູນ, ກົດໝາຍ ແລະ ບັນດານິຕິກຳໃຕ້ກົດໝາຍ ຂອງບັນດາອົງການອຳນາດລັດຢູ່ຂັ້ນເມືອງ ພາຍໃນແຂວງ;
4. ເພື່ອເປັນການສ້າງຄວາມເຂັ້ມແຂງ ປະຈໍາເຂດເລືອກຕັ້ງ ຢູ່ບັນດາເມືອງ ໃນການຈັດຕັ້ງປະຕິບັດພາລະບົດບາດ ຕິດຕາມກວດກາ ຂອງສະພາປະຊາຊົນຂັ້ນແຂວງ.
ພ້ອມນັ້ນ, ທ່ານ ປະທານ ພ້ອມດ້ວຍຄະນະຍັງຈະໄດ້ສືບຕໍ່ຕິດຕາມກວດກາ ແລະຊຸກຍູ້ອີກສອງເມືອງຄື: ເມືອງໜອງບົກ ແລະ ເມືອງທ່າແຂກ.
ໂດຍ: ເອື້ອ ມະໂນສິງ ( ອາລີ )
+7