ໃນວັນທີ 21 ມີນາ 2023, ຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງ ອັດຕະປື. ນໍາໂດຍ:ທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ ປະທານຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງ ອັດຕະປື ພ້ອມດ້ວຍຄະນະ ເດີນທາງເຂົ້າຢ້ຽມຢາມ ການນໍາຂັ້ນສູງ ແຂວງຊຽງແຕງ ແຫ່ງຣາຊະອານາຈັກກໍາປູເຈຍ ນໍາໂດຍ: ທ່ານ ຊຽງລັກ ຮອງເລຂາພັກແຂວງ ປະທານສະພາປະຊາຊົນແຂວງ ຊຽງແຕງ ພ້ອມດ້ວຍຄະນະ.
ໃນໂອກາດດັ່ງກ່າວ ທ່ານ ຊຽງລັກ ໄດ້ສະແດງຄວາມຍີນດີຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການຢ້ຽມຢາມຂອງຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງ ອັດຕະປື ໃນຄັ້ງນີ້ ແລະ ລາຍງານສະພາບທີ່ພົ້ນເດັ່ນໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ລວມທັງຜົນສຳເລັດໃນການຈັດຕັ້ງປະຕິບັດວຽກງານແຜນພັດທະນາເສດຖະກິດ-ສັງຄົມໂດຍຫຍໍ້ ແລະ ຈະເພີ່ມທະວີການພົວພັນຮ່ວມມື ມິດຕະພາບ,ສາມັກຄີ ຖານບ້ານໃກ້ເຮືອນຄຽງລະຫວ່າງສອງແຂວງ ຊຽງແຕງ ແລະ ແຂວງອັດຕະປື ໃຫ້ຮັດແໜ້ນ ແລະ ມີປະສິດທິຜົນດີກວ່າເກົ່າ.
ຂະນະດ່ຽວກັນ ທ່ານ ນາງ ມີນາພອນ ໄຊສົມພູ ໄດ້ສະແດງຄວາມຂອບໃຈເປັນຢ່າງຍິ່ງ ແລະ ເປັນກຽດຢ່າງສູງ ທີ່ທ່ານປະທານສະພາປະຊາຊົນແຂວງ ພ້ອມຄະນະ ໄດ້ສະລະເວລາ ແລະ ຕ້ອນຮັບ ຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງອັດຕະປື ຢ່າງອົບອຸ່ນ ໃນການເຂົ້າຢ້ຽມຢາມ ແລະ ທັງເປັນການ ສະເໜີໂຕ ເນື່ອງຈາກ ສະມາຄົມມິດຕະພາບລາວ-ກຳປູເຈຍ ແຂວງອັດຕະປື ຫາກໍ່ໄດ້ຮັບການສ້າງຕັ້ງຂື້ນໃນວັນທີ 30 ມິຖຸນາ 2022 ຜ່ານມານີ້, ເຊິ່ງເປັນການນໍາເອົາໄມຕີຈິດມິດຕະພາບທີ່ສະໜິດສະໜົມ ແລະ ການເສີມຂະຫຍາຍສາຍພົວພັນການຮ່ວມມືຮອບດ້ານລະຫວ່າງແຂວງອັດຕະປື ແລະ ແຂວງຊຽງແຕງ ທັງເປັນການປະກອບສ່ວນສຳຄັນເຂົ້າໃນການຮັດແໜ້ນ ມູນເຊື້ອຄວາມສາມັກຄີ ທີ່ມີຊາຍແດນຕິດຈອດລະຫວ່າງແຂວງ,ເມືອງ ໃຫ້ປະຊາຊົນສອງແຂວງໄປມາຫາສູ່,ຖານບ້ານໃກ້ເຮືອນຄຽງ, ບ້ານແກ່ວເມືອງດອງທີ່ດີ ໃຫ້ມີຄວາມໝັ້ນຄົງຍາວນານ ລະຫວ່າງສອງປະເທດ ກໍຄື ສອງແຂວງໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ໃນຕອນຄໍ່າຂອງວັນດຽວກັນ ການນໍາຂັ້ນສູງແຂວງ ຊຽງແຕງ ກໍໄດ້ເປັນເຈົ້າພາບຈັດງານລ້ຽງຕ້ອນຮັບ ເພື່ອເປັນກຽດແກ່ ຄະນະບໍລິຫານງານສະມາຄົມມິດຕະພາບ ລາວ-ກໍາປູເຈຍ ແຂວງ ອັດຕະປື ເຊິ່ງດໍາເນີນໄປດ້ວຍບັນຍາກາດໄມຕີຈິດມິດຕະພາບ, ອົບອຸ່ນ ແລະ ຄວາມສາມັກຄີຮັກແພງ ສະໜິດສະໜົມແຕ່ຕົ້ນຕະຫຼອດປາຍ.
(ນັກຂ່າວ: ສພຂ ອັດຕະປື)