ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າວັນທີ 23 ມີນາ 2022 ນີ້ ທ່ານ ຮສ. ປອ. ລິນຄໍາ ດວງສະຫວັນ ຄະນະປະຈໍາສະພາແຫ່ງຊາດ ປະທານກໍາມາທິການ ເສດຖະກິດ, ເຕັກໂນໂລຊີ ແລະ ສິ່ງເວດລ້ອມພ້ອມຄະນະ ເຄື່ອນໄຫວ ເຮັດວຽກຮ່ວມກັບ ຄະນະປະຈໍາສະພາປະຊາຊົນແຂວງ, ໂດຍການຕ້ອນຮັບ ແລະ ເຂົ້າຮ່ວມເຮັດວຽກໃນຄັ້ງນີ້ມີ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ບັນດາທ່ານ ປະທານຄະນະກໍາມະການ ສພຂ, ບັນດາກົມກອງ, ພະແນກການທີ່ກ່ຽວຂ້ອງ, ຄະນະເລຂາທິການ, ຫົວໜ້າຂະແໝງທີ່ກ່ຽວຂ້ອງພາຍໃນສະພາປະຊາຊົນແຂວງ ເຂົ້າຮ່ວມ.

ທ່ານ ຄຳຜັນ ຄູນສະຫວັນ ຮອງປະທານຄະນະປະຈໍາ ຮອງປະທານສະພາປະຊາຊົນແຂວງ, ໄດ້ຜ່ານບົດລາຍງານ  ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປີ 2022 ແລະ ມະຕິຂອງສະພາແຫ່ງຊາດ ວ່າດ້ວຍການຮັບຮອງເອົາວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ,  ຮັບຟັງການລາຍງານໂດຍຫຍໍ້ຂອງພະແນກການເງິນແຂວງ ກ່ຽວກັບການຈັດຕັ້ງຜັນຂະຫຍາຍມະຕິຂອງສະພາແຫ່ງຊາດ; ຮັບຟັງການລາຍງານ ຂອງພະແນກກະສິກໍາ ແລະ ປ່າໄມ້ແຂວງ ກ່ຽວກັບການຈັດຕັ້ງປະຕິບັດໂຄງການກໍ່ສ້າງຊົນລະປະທານ ຫ້ວຍອາໄກ້ ເມືອງພີນ, ຊົນລະປະທານຫ້ວຍທ່າຍາວ ເມືອງອຸທຸມພອນ. ຜ່ານການຮັບຟັັງການລາຍງານຈາກພາກສ່ວນທີ່ກ່ຽວຂອງ ເຊິ່ງເຫັນໄດ້ເຖິງສະພາບລວມຈຸດພິເສດ ຂອງຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານຂອງແຕ່ລະພາກສ່ວນ ທີ່ຈະຕ້ອງໄດ້ສຶບຕໍ່ເອົາໃຈໃສ່ໃນການຈັດຕັ້ງປະຕິບັດໃຫ້ສໍາເລັດໃນຕໍ່ໜ້າ.

ຈາກນັ້ນ ທ່ານ  ຮສ. ປອ. ລິນຄໍາ ດວງສະຫວັນ ກໍ່ໄດ້ເຈາະຈິ້ມ ແລະ ເປີດໂອກາດໃຫ້ບັນດາທ່ານ ຄະນະກໍາມະການ,ພະແນກການ ທີ່ເຂົ້າຮ່ວມກອງປະຊຸມມີຄໍາຄິດເຫັນ ແລກປ່ຽນເຊິ່ງກັນແລະກັນ ເພື່ອເປັນຂໍ້ມູນ ໃນການປັບປຸງຕໍ່ກັບວຽກງານທີ່ຍັງຄົງຄ້າງໃຫ້ດີຂຶ້ນກວ່າເກົ່າ ແລະ ສ້າງຄວາມເຂັ້ມແຂງໃຫ້ແກ່ຄະນະກໍາມະການ ແຜນການ ເສດຖະກິດ ແລະ ການເງິນ ຂອງສະພາປະຊາຊົນແຂວງ, ໃນການປະຕິບັດພາລະບົດບາດໜ້າທີ່ຕາມກົດໝາຍກໍາໜົດໄວ້.

ໃນຕອນທ້າຍ, ປະທານກອງປະຊຸມ ໄດ້ມີຄໍາເຫັນໂອ້ລົມ ໂດຍໄດ້ສະຫຼຸບຕີລາຄາສູງຕໍ່ຜົນງານທີ່ທຸກພາກສ່ວນຍາດມາໄດ້​ ແລະ ​ຂໍໃຫ້ທຸກພາກສ່ວນຈົ່ງຕັ້ງໜ້າປະຕິບັດພາລະບົດບາດຂອງຕົນ ໃຫ້ສຳເລັດຕາມລະດັບຄາດໝາຍ ທີ່ພັກ-ລັດ​ໄດ້ມອບໝາຍໃຫ້. ເຊິ່ງການລົງເຄື່ອນໄຫວຕິດຕາມກວດກາ  ຂອງກໍາມາທິການ ເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ເປັນການລົງເກັບຂໍ້ມູນອັນສໍາຄັນໃນການນໍາໄປຄົ້ນຄວ້າປຶກສາຫາລື ແລະ ນໍາສະເໜີຕໍ່ຄະນະປະຈໍາສະພາແຫ່ງຊາດ.