ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

         ວັນທີ 22 ມີນາ 2022 ນີ້, ທີ່ສະໂມສອນສະພາປະຊາຊົນແຂວງ ເຊກອງ ໄດ້ມີກອງປະຊຸມຮ່ວມ ລະຫວ່າງ ກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ (ສພຊ) ກັບສະພາປະຊາຊົນແຂວງ ແລະ ບັນດາພະແນກການທີ່ກ່ຽວຂ້ອງຂອງແຂວງ ເຊກອງ ເພື່ອຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ການປະຕິບັດບັນດາມະຕິຕ່າງໆທີ່ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ຕິດພັນກັບການຕິດຕາມກວດກາການປະຕິບັດມະຕິ 2 ວາລະແຫ່ງຊາດ ຢູ່ແຂວງ ເຊກອງ ໂດຍການເຂົ້າຮ່ວມເປັນປະທານ ຂອງທ່ານ ປອ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ແລະ ທ່ານ ປອ ແພງສີ ສີລາວີ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16, ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ພ້ອມດ້ວຍພະແນກການທີ່ກ່ຽວຂ້ອງຂອງແຂວງ ເຂົ້າຮ່ວມ.
          ໃນກອງປະຊຸມ, ທ່ານ ປອ ແພງສີ ສີລາວີ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງ ເຊກອງ, ຮອງປະທານສະພາປະຊາຊົນແຂວງ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດວຽກງານຂອງສະພາປະຊາຊົນແຂວງ ເຊກອງ ເຊິ່ງຜ່ານມາມີທັງຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ ເປັນຕົ້ນແມ່ນການປະຕິບັດ 3 ພາລະບົດບາດ ຕາມສິດ ແລະ ໜ້າທີ່ຂອງຕົນ, ການຈັດຕັ້ງປະຕິບັດບັນດາມະຕິຕ່າງໆຂອງສະພາແຫ່ງຊາດ ແລະ ສະພາປະຊາຊົນແຂວງໄດ້ຮັບຮອງໃນກອງປະຊຸມສະພາ 2 ຂັ້ນ ຕິດພັນກັບການປະຕິບັດ 2 ວາລະແຫ່ງຊາດ ແລະ ວຽກງານອື່ນໆ ແລະ ຮັບຟັງການລາຍງານກ່ຽວກັບສະພາບການເຄື່ອນໄຫວວຽກງານໃນໄລຍະຜ່ານມາ ຈາກບັນດາພະແນກການທີ່ກ່ຽວຂ້ອງ ເປັນຕົ້ນ: ພະແນກແຜນການ ແລະ ການລົງທຶນ, ພະແນກໂຍທາທິການ ແລະ ຂົນສົ່ງ, ພະແນກການເງິນແຂວງ. ພ້ອມນັ້ນ, ກໍໄດ້ມີການແລກປ່ຽນຄຳຄິດຄຳເຫັນເຊິ່ງກັນ ແລະ ກັນຢ່າງກົງໄປກົງມາ ພ້ອມທັງສະເໜີບັນຫາທີ່ພົບຄວາມຫຍຸ້ງຍາກຂອງແຕ່ລະຂະແໜງການໃນຂັ້ນທ້ອງຖິ່ນ ເພື່ອເປັນຂໍ້ມູນໃຫ້ນຳໄປປະສານສົມທົບກັບພາກສ່ວນທີ່ກ່ຽວຂ້ອງໃນຂັ້ນສູນກາງຊ່ວຍຊຸກຍູ້ ແລະ ພ້ອມກັນປັບປຸງແກ້ໄຂໃນຕໍ່ໜ້າ.
       ໂອກາດດັ່ງກ່າວ ທ່ານ ປອ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບສະພາແຫ່ງຊາດ ຍັງໄດ້ຍ້ອງຍໍຊົມເຊີຍມາຍັງສະພາປະຊາຊົນແຂວງ ກໍຄືບັນດາພະແນກການຕ່າງໆທີ່ກ່ຽວຂ້ອງ ຂອງແຂວງ ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຈົນໄດ້ຮັບຜົນສຳເລັດເປັນກ້າວໆມາ ແລະ ຈົ່ງພ້ອມກັນເອົາໃຈໃສ່ຊຸກຍູ້ສົ່ງເສີມການຈັດຕັ້ງປະຕິບັດວຽກງານ ກໍຄືແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022 ແລະ ການປະຕິບັດ 2 ວາລະແຫ່ງຊາດ ໃຫ້ປະສົບຜົນສໍາເລັດຕາມແຜນການທີ່ວາງໄວ້.
                    ຈາກນັ້ນ, ກໍໄດ້ລົງຕິດຕາມກວດກາການຈັດຕັ້ງປະຕິບັດຕົວຈິງຂອງບັນດາໂຄງການກໍ່ສ້າງຕ່າງໆຢູ່ພາຍໃນແຂວງເຊກອງ ເປັນຕົ້ນ: ໂຄງການກໍ່ສ້າງເສັ້ນທາງ ແລະ ຂົວ 04 ແຫ່ງ ນັບແຕ່ ບ້ານ ໂພນ ເມືອງ ລະມາມ ຫາ ເມືອງ ກະລຶມເກົ່າ.