ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ວັນທີ 31 ສິງຫາ 2022 ທ່ານ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະ ໄໝສາມັນເທື່ອທີ 3 ຂອງສະພາປະຊາຊົນນະຄອນຫຼວງ ຊຸດທີ II ຢູ່ສະໂມສອນ ຫ້ອງວ່າການປົກຄອງເມືອງໄຊເສດຖາ ໂດຍມີ ເລຂາ, ຮອງເລຂາ, ບັນດາຄະນະປະຈຳພັກ ແລະ ກຳມະການຄະນະພັກເມືອງ ພ້ອມດ້ວຍພະນັກງານຂອງແຕ່ລະຫ້ອງການ 25 ຫ້ອງການຂອງເມືອງເຂົ້າຮ່ວມ.
ໂອກາດດັ່ງກ່າວ ຄະນະຜູ້ແທນ ໄດ້ເຜີຍແຜ່ຜົນຂອງກອງປະຊຸມ ປະກອບມີ: ບັນດາມະຕິ, ກົດໝາຍ ແລະ ເນື້ອໃນບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ແລະ ບັນດາເນື້ອໃນເອກະສານ ບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນນະຄອນຫຼວງ ຊຸດທີ II. ຈາກນັ້ນ, ກອງປະຊຸມ ກໍໄດ້ມີການແລກປ່ຽນຄຳຄິດເຫັນ ແລະ ຮັບຟັງຄຳສະເໜີຈາກຜູ້ມີສິດເລືອກຕັ້ງ ແລະ ພາກສ່ວນກ່ຽວຂ້ອງ.
ກ່ອນໜ້ານັ້ນ, ໃນວັນທີ 29 ສິງຫາ 2022 ຄະນະ ໄດ້ພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະ ໄໝສາມັນເທື່ອທີ 3 ຂອງສະພາປະຊາຊົນນະຄອນຫຼວງ ຊຸດທີ II ປະກອບມີ: ບັນດາມະຕິ, ກົດໝາຍ ແລະ ເນື້ອໃນບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນສອງກອງປະຊຸມດັ່ງກ່າວ ຢູ່ວັດບ້ານຊຽງດາ ໂດຍມີ ຄະນະບ້ານ ແລະ ພໍ່ແມ່ປະຊາຊົນທັງ 3 ບ້ານຄື: ບ້ານຊຽງດາ, ບ້ານໂນນຫວາຍ ແລະ ບ້ານເມືອງນ້ອຍ ເຂົ້າຮ່ວມຢ່າງພ້ອມພຽງ. ຈາກນັ້ນ, ກອງປະຊຸມ ກໍໄດ້ມີການແລກປ່ຽນຄຳຄິດເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ ແລະ ພາກສ່ວນກ່ຽວຂ້ອງ.
ໃນໂອກາດດັ່ງກ່າວ ທ່ານ ຮສ. ປອ. ລິນຄຳ ດວງສະຫວັນ ພ້ອມດ້ວຍຄະນະ ກໍໄດ້ມອບເຄື່ອງ ຈາກກອງທຶນຊ່ວຍເຫຼືອສັງຄົມ ສະພາແຫ່ງຊາດ ປະກອບມີ: ເສື້ອ ຈໍານວນ 100 ຜືນ, ຜ້າອັດປາກ 50 ກັບ ແລະ ສະເປເຫຼົ້າ 90 ປ້ອງກັນພະຍາດໂຄວິດ-19 ຈຳນວນ 50 ກ່ອງ ໃຫ້ 3 ບ້ານດັ່ງກ່າວ ເພື່ອນຳໄປແຈກຢາຍໃຫ້ຄອບຄົວທີ່ຂາດເຂີນ ແລະ ນຳໃຊ້ຢູ່ຫ້ອງການບ້ານຂອງຕົນ.