ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ປະທານກໍາມາທິການການຕ່າງປະເທດ ຕ້ອນຮັບການເຂົ້າຢ້ຽມຂໍ່ານັບຂອງທ່ານເອກອັກຄະລັດຖະທູດເຢຍລະມັນ

ກ.ຍ. 27, 2022 | SlideMobile

(ສພຊ) ໃນຕອນເຊົ້າຂອງວັນທີ 21 ກັນຍາ 2022 ທີ່ສະພາແຫ່ງຊາດ, ທ່ານ ສັນຍາ ປຣະເສີດ ກໍາມະການຄະ ນະປະຈໍາສະພາແຫ່ງຊາດ, ປະທານກຳມາທິການການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ Annette KNOBLOCH ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງສາທາລະນະລັດ ສະຫະພັນເຢຍລະມັນ ປະຈຳ ສປປລາວ.
ໃນການພົບປະຄັ້ງນີ້ ທ່ານ ສັນຍາ ປຣະເສີດ ໄດ້ກ່າວສະແດງຄວາມຕ້ອນຮັບ ທ່ານ ນາງ Annette KNOBLOCH ເອກອັກຄະລັດຖະທູດເຢຍລະມັນ ແລະ ຕີລາຄາສູງຕໍ່ສາຍພົວພັນ ແລະ ການຮ່ວມມື ທີ່ດີມາຍາວນານ ລະຫວ່າງ ລາວ-ເຢຍລະມັນ ເວົ້າລວມ, ເວົ້າສະເພາະ ແມ່ນສອງອົງການນິຕິບັນຍັດ ລາວ-ເຢຍລະມັນ. ທ່ານ ເອກອັກຄະລັດຖະທູດ ໄດ້ລາຍງານການພົວພັນຮ່ວມມື ລະຫວ່າງ ສປປລາວ ແລະ ເຢຍລະມັນ ໃນໄລຍະຜ່ານມາ ແລະ ໄດ້ຍົກໃຫ້ເຫັນຜົນສຳເລັດການຮ່ວມມືໃນຫຼາຍດ້ານ ເປັນຕົ້ນ: ການຮ່ວມມືໂຄງການ (GIZ) ແລະ ການຮ່ວມມືທາງດ້ານການເງິນ ຜ່ານທະນາຄານສິນເຊື່ອ ເພື່ອການພັດທະນາເຢຍລະມັນ (KFW), ການຊ່ວຍເຫຼືອ ເພື່ອການພັດທະນາຊົນນະບົດ, ວຽກງານອາຊີວະສຶກສາ, ການພັດທະນາຍຸດທະສາດການເຕີບໂຕສີຂຽວ (Green growth) ແລະ ສົ່ງເສີມທຸລະກິດພາກເອກະຊົນ ລວມທັງການຊຸກຍູ້ ແລະ ສົ່ງເສີມທຸລະກິດຂະໜາດກາງ ແລະ ຂະໜາດນ້ອຍ (SME) ແລະ ຈຸນລະວິສາຫະກິດ (MSME). ໃນລະຫວ່າງປີ 2018-2020, ເຢຍລະມັນ ໄດ້ຊ່ວຍເຫຼືອງົບປະມານ 50 ລ້ານເອີໂຣ ໃຫ້ແກ່ ສປປລາວ. ໃນນັ້ນ, ຈຳນວນ 10 ລ້ານເອີໂຣ ແມ່ນຊ່ວຍເຫຼືອປະຊາຊົນຜູ້ປະສົບໄພນໍ້າຖ້ວມຢູ່ແຂວງອັດຕະປື.
ທ່ານປະທານກຳມາທິການການຕ່າງປະເທດ ໄດ້ສະແດງຄວາມຍ້ອງຍໍຊົມເຊີຍ ຕໍ່ທ່ານເອກອັກຄະລັດຖະທູດເຢຍລະມັນ ທີ່ມີຜົນສຳເລັດຫຼາຍດ້ານໃນການປະຕິບັດໜ້າທີ່ວຽກງານຂອງຕົນ ເຊິ່ງເປັນການປະກອບສ່ວນເສີມສ້າງສາຍພົວພັນ ແລະ ການຮ່ວມມືທີ່ດີມາຍາວນານ ລະຫວ່າງ ລາວ-ເຢຍລະມັນ. ນອກຈາກນີ້, ທ່ານປະທານກຳມາທິການການຕ່າງປະເທດ ຍັງໄດ້ແຈ້ງໃຫ້ຊາບ ກ່ຽວກັບການເຄື່ອນໄຫວຂອງສະພາແຫ່ງຊາດ, ສະມາຊິກສະພາແຫ່ງຊາດ ແລະ ຄະນະມິດຕະພາບ ລັດຖະສະພາ ລາວ-ເຢຍລະມັນ ໃຫ້ທ່ານທູດຊາບ. ສອງຝ່າຍ ໄດ້ເຫັນດີຈະປະສານສົມທົບນຳກັນ ເພື່ອໃຫ້ສອງອົງການນິຕິບັນຍັດ ມີການແລກປ່ຽນການຢ້ຽມຢາມ ຂອງຄະນະຜູ້ແທນຂັ້ນຕ່າງໆເປັນປົກກະຕິ ແລະ ຮ່ວມມືໃນຂະແໜງການຕ່າງໆທີ່ສອງຝ່າຍໄດ້ປະຕິບັດມາແລ້ວໃຫ້ມີປະສິດທິຜົນຂຶ້ນຕື່ມ ເປັນຕົ້ນແມ່ນບັນດາໂຄງການຊ່ວຍເຫຼືອຂອງເຢຍລະມັນ ແລະ ພ້ອມທີ່ຈະຂະຫຍາຍການຮ່ວມມືໃນຂົງເຂດອື່ນໆ ເພື່ອເສີມຂະຫຍາຍສາຍພົວພັນ ແລະ ການຮ່ວມມືທີ່ດີມາຍາວນານ ລະຫວ່າງ ລາວ-ເຢຍລະມັນ ເວົ້າລວມ, ເວົ້າສະເພາະແມ່ນສອງອົງການນິຕິບັນຍັດ ລາວ-ເຢຍລະມັນ ໃຫ້ໄດ້ຮັບການເສີມຂະຫຍາຍຍິ່ງຂຶ້ນ ແລະ ນຳເອົາຜົນປະໂຫຍດອັນແທ້ຈິງ ມາສູ່ປະຊາຊົນຂອງສອງຊາດລາວ-ເຢຍລະມັນອີກດ້ວຍ.