(ສພຊ) ໃນຕອນເຊົ້າຂອງວັນທີ 8 ກັນຍາ 2022 ທີ່ສະພາແຫ່ງຊາດ ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ລິວ ຊຸນ ລິນ (Leow Siu Lin) ເອກອັກຄະລັດຖະທູດ ແຫ່ງ ສ.ສິງກະໂປ ປະຈໍາ ສປປລາວ ພ້ອມດ້ວຍຄະນະ ເພື່ອປຶກສາຫາລື ຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ສ.ສິງກະໂປ ແລະ ປຶກສາຫາລືກ່ຽວກັບວຽກງານການສ້າງຄວາມເຂັ້ມແຂງໃນການເຄື່ອນໄຫວວຽກງານການຕ່າງປະເທດ ໃຫ້ແກ່ພະນັກງານລັດຖະກອນທີ່ເປັນເສນາທິການຮັບໃຊ້ວຽກງານການຕ່າງປະເທດ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ.
ໂອກາດດັ່ງກ່າວ ທ່ານ ສັນຍາ ປຣະເສີດ ໄດ້ສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ນາງ ລິວ ຊຸນ ລິນ ພ້ອມດ້ວຍຄະນະ ພ້ອມທັງຕີລາຄາສູງຕໍ່ການພົວພັນຮ່ວມມື ລະຫວ່າງ ສປປລາວ ແລະ ສ.ສິງກະໂປ ຕະຫຼອດໄລຍະຜ່ານມາ ເຫັນວ່າ ສອງປະເທດ ໄດ້ມີການແລກປ່ຽນຄະນະຜູ້ແທນຂັ້ນສູງນຳກັນ ຢ່າງເປັນປົກກະຕິ, ມີການຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ທັງໃນຂອບອາຊຽນ, ພາກພື້ນ ແລະ ສາກົນ ເປັນຕົ້ນການຮ່ວມມືທາງດ້ານເສດຖະກິດ, ການລົງທຶນ ແລະ ການພັດທະນາຊັບພະຍາກອນມະນຸດ ກໍໄດ້ຮັບການຂະຫຍາຍຕົວຂຶ້ນເປັນກ້າວໆ ສຳລັບອົງການນິຕິບັນຍັດຂອງສອງປະເທດ ແມ່ນໄດ້ມີການພົວພັນຮ່ວມມືນໍາກັນ ຢ່າງເປັນປົກກະຕິ ເປັນຕົ້ນການພົວພັນຮ່ວມມືໃນຂອບສອງຝ່າຍ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີສະມັດຊາລັດຖະສະພາລະຫວ່າງຊາດອາຊຽນ (AIPA), ເວທີລັດຖະສະພາ ອາຊີ-ປາຊີຟິກ (APPF), ຄູ່ຮ່ວມເຈລະຈາລັດຖະສະພາອາຊີ-ເອີຣົບ (ASEP), ສະຫະພັນລັດຖະສະພາສາກົນ (IPU) ແລະ ອື່ນໆ ນອກຈາກນີ້ ທ່ານປະທານກໍາມາທິການການຕ່າງປະເທດ ຍັງໄດ້ສະເໜີໃຫ້ທ່ານທູດສິງກະໂປ ຊ່ວຍພິຈາລະນາເປັນຕົ້ນແມ່ນກິດຈະກຳທັກສະການພົວພັນສື່ສານພາສາອັງກິດທີ່ມີປະສິດພາບ (EFFECTIVE ENGLISH COMMUNICATION SKILLS); ກິດຈະກຳການພັດທະນາ ວິທີອ່ານແບບວິເຄາະວິໄຈບັນຫາໃນບົດເລື່ອງ ແລະ ການຂີດຂຽນບົດຄວາມວິຊາການພາສາອັງກິດ (DEVELOPING ANALYTICAL READING AND ACADEMIC WRITING IN ENGLISH); ກິດຈະກຳສຳມະນາການເຈລະຈາໃນເວທີສາກົນ: ທັກສະ ແລະ ເຕັກນິກໃນພາກປະຕິບັດ (SEMINAR ON INTERNATIONAL NEGOTIATION: PRACTICAL SKILLS AND TECHNIQUES) ແລະ ກິດຈະກຳການຮ່າງເອກະສານ: ຮ່າງບົດຄຳເຫັນ, ບົດລາຍງານຕໍ່ກອງປະຊຸມ, ມະຕິ ແລະ ຖະແຫຼງການຮ່ວມ) (Drafting Documents: drafting an English conference speech, report of conference, resolution and joint communiques).
ທ່ານ ນາງ ລິວ ຊຸນ ລິນ ກໍໄດ້ສະແດງຄວາມຂອບໃຈທີ່ທ່ານ ສັນຍາ ປຣະເສີດ ໄດ້ເສຍສະຫລະ ເວລາອັນມີຄຸນຄ່າໃຫ້ການຕ້ອນຮັບ ພ້ອມທັງແຈ້ງຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ແລະ ຈະນໍາເອົາຂໍ້ສະເໜີຕ່າງໆ ທີ່ ສປປລາວ ສະເໜີ ນໍາໄປພິຈາລະນາ ແລະ ເປັນຂົວຕໍ່ປະສານງານຕໍ່ພາກສ່ວນກ່ຽວຂ້ອງ ເພື່ອຕອບສະໜອງຕາມຄວາມເໝາະສົມ.
(ພາບ ແລະ ຂ່າວ: ສອນສັກ ວັນວິໄຊ)