(ສພຊ) – ຕອນສວາຍວັນທີ 11 ເມສານີ້, ສະຫາຍ ສົມມາດ ພົລເສນາ ກຳມະການສູນກາງພັກ, ຮອງປະທານສະພາແຫ່ງຊາດ ໄດ້ຮັບການເຂົ້າຢ້ຽມຂ່ຳນັບຂອງສະຫາຍ ເຫີ ຕົງເຟິງ (He Dongfeng) ກຳມະການສຳຮອງສູນກາງ ພັກກອມມູນິດຈີນ, ປະທານກຸ່ມບໍລິສັດ COMAC ພ້ອມດ້ວຍຄະນະ ໃນໂອກາດນຳພາຄະນະຜູ້ແທນເດີນທາງມາຢ້ຽມຢາມ ແລະ ເຂົ້າຮ່ວມການປະຕິບັດຖ້ຽວບິນປະຖົມມະລືກຂອງເຮືອບິນ C909 ທີ່ລັດວິສາຫະກິດການບິນລາວ ໄດ້ຮັບເຂົ້າສູ່ຝູງບິນຢ່າງເປັນທາງການ; ສະຫາຍ ສົມມາດ ພົລເສນາ ໄດ້ສະແດງຄວາມປິຕິຍິນດີທີ່ໄດ້ພົບປະ ພ້ອມທັງຕີລາຄາສູງຕໍ່ການມາຢ້ຽມຢາມ ແລະ ເຄື່ອນໄຫວວຽກງານໃນຄັ້ງນີ້ ນອກຈາກຈະເປັນການສືບຕໍ່ຮັດແໜ້ນ ແລະ ປະກອບສ່ວນເພີ່ມທະວີສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ຍັງເປັນການຊຸກຍູ້ສົ່ງເສີມການບໍລິການດ້ານການບິນໂດຍສານລະຫວ່າງປະ ເທດຂອງ ສປປລາວ.
ສະຫາຍຮອງປະທານສະພາແຫ່ງຊາດ ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດກ່ຽວກັບອຸດສາຫະກຳການບິນຂອງ ສປຈີນ ທີ່ສາມາດຜະລິດເຮືອບິນໂດຍສານໂດຍໃຊ້ຫົວຈັກ Turbofan ທີ່ໄດ້ຄົ້ນຄວ້າຜະລິດດ້ວຍຕົນເອງຂຶ້ນມາ, ສາມາດເດີນທາງລະຫວ່າງ 2,225-3,700 ກິໂລແມັດ ເຊິ່ງເປັນການປະກອບສ່ວນໃນການພັດທະນາອຸດສາຫະກຳການບິນທົ່ວໂລກ; ໄດ້ສະແດງໃຫ້ເຫັນເຖິງຄວາມຮູ້, ຄວາມສາມາດ, ສະມັດຖະພາບທາງດ້ານເຕັກໂນໂລ ຊີ ແລະ ບົດບາດການບໍລິການດ້ານອຸດສາຫະກຳການບິນຂອງ ສປຈີນ ກ້າວເຂົ້າສູ່ລະດັບສາກົນ ແລະ ຍັງໄດ້ຮັບຄວາມນິຍົມຊົມຊອບຈາກຕະຫຼາດທັງພາຍໃນ ແລະ ຕ່າງປະເທດທົ່ວໂລກ.
ສະຫາຍ ເຫີ ຕົງເຟິງ ໄດ້ສະແດງຄວາມຂອບໃຈຕໍ່ຮອງປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບ ຈີນ-ລາວ ພ້ອມທັງແຈ້ງໃຫ້ຊາບສະພາບການທີ່ພົ້ນເດັ່ນຂອງ ສປຈີນ ໂດຍສະເພາະຂໍ້ມູນຂອງກຸ່ມບໍລິສັດ COMAC ໃນການພັດທະນາອຸດສາຫະກຳການບິນຂອງ ສປຈີນ ແລະ ການຮ່ວມມືລະຫວ່າງບໍລິສັດ COMAC ກັບ ລັດວິສາຫະກິດການບິນລາວ ເຊິ່ງເປັນຂີດໝາຍອັນສຳຄັນໃນການເພີ່ມທະວີການຮ່ວມມືດ້ານການຂົນສົ່ງທາງອາກາດໃນອະນາຄົດລະຫວ່າງສອງປະເທດໃຫ້ເຂົ້າສູ່ລວງເລິກ.
(ນາງ ໄຊໂສພາພອນ ມິ່ງມຸງຄຸນ)