(ສພຊ) ເພື່ອຕິດຕາມກວດກາ ແລະ ປະເມີນຜົນການປະຕິບັດໜ້າທີ່ການເມືອງ ຂອງກຳລັງປ້ອງກັນຊາດ-ປ້ອງກັນຄວາມສະຫງົບ ຢູ່ບັນດາກົມກອງຮາກຖານ ພ້ອມທັງລົງຊຸກຍູ້, ປຸກລະດົມ ການຈັດຕັ້ງປະຕິບັດແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ຕິດພັນກັບການເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II. ໃນວັນທີ 18 ພະຈິກ 2022 ທີ່ວິທະຍາຄານທະຫານບົກກົມມະດຳກອງທັບ (ນໍ້າຊວງ) ໄດ້ຈັດກອງປະຊຸມຍົກສູງພາລະບົດບາດການເຄື່ອນໄຫວຂອງ ສະພາແຫ່ງຊາດ ແລະ ສະພາປະຊາຊົນແຂວງ ໂດຍການເປັນປະທານຂອງທ່ານ ພົຕ. ປອ. ວົງສັກ ພັນທະວົງ ປະທານກຳມາທິການ ປ້ອງກັນຊາດ-ປ້ອງກັນຄວາມສະຫງົບ ພ້ອມດ້ວຍຄະນະ ມີທ່ານ ບຸນສອນ ເພັດດາວັນ ປະທານສະພາປະຊາຊົນແຂວງວຽງຈັນ ແລະ ທ່ານ ພົ.ວ ຖາວອນ ແກ້ວອິນທະວົງ ຫົວໜ້າການເມືອງວິທະຍາຄານທະຫານບົກກົມມະດຳກອງທັບ ພ້ອມດ້ວຍພະນັກງານຫຼັກແຫຼ່ງ, ນາຍ ແລະ ພົນທະຫານ ເຂົ້າຮ່ວມທັງໝົດ 276 ຄົນ ຍິງ 57 ຄົນ.

ໃນກອງປະຊຸຸມ ຜູ້ເຂົ້າຮ່ວມໄດ້ຮັບຟັງບົດກ່ຽວກັບທີ່ຕັ້ງ, ພາລະບົດບາດ, ສິດ, ໜ້າທີ່, ການຈັດຕັ້ງ ແລະ ການເຄື່ອນໄຫວ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II; ເອກະສານກ່ຽວກັບສະພາບຄວາມເປັນມາ, ທີ່ຕັ້ງ, ພາລະບົດບາດ, ສິດ, ໜ້າທີ່, ການຈັດຕັ້ງ ແລະ ການເຄື່ອນໄຫວ ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ; ການປະຕິບັດນະໂຍບາຍຕໍ່ພະນັກງານ-ນັກຮົບ ໃນກຳລັງປ້ອງກັນຊາດ-ປ້ອງກັນຄວາມສະຫງົບ ປະຕິບັດໜ້າທີ່ຢູ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

ໂອກາດນີ້, ທ່ານ ພົຕ. ວົງສັກ ພັນທະວົງ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງທ່ານໄດ້ເນັ້ນ ໃຫ້ນາຍ ແລະ ພົນທະຫານ ເອົາໃຈໃສ່ 7 ຂໍ້ດັ່ງນີ້:

1. ສືບຕໍ່ເຝິກຝົນທາດແທ້ປະຕິວັດ, ຄວາມຈົງຮັກພັກດີຕໍ່ປະເທດຊາດ, ຍອມເສຍສະຫຼະ ເພື່ອຊາດ ເພື່ອປະຊາຊົນ ຂອງນາຍ ແລະ ພົນທະຫານໃຫ້ຖືເປັນບັນຫາສຳຄັນໃຈກາງ ແລະ ບໍ່ສາ ມາດ ຖືເບົາໄດ້;

2. ສ້າງຄວາມເປັນເອກະພາບສູງ ກັບແນວທາງນະໂຍບາຍຂອງພັກ, ກົດໝາຍຂອງລັດຢ່າງ ໜັກແໜ້ນພາຍໃນຖັນແຖວກໍາລັງປະກອບອາວຸດ, ຂໍໃຫ້ກຳລັງປະກອບອາວຸດ ເປັນກຳລັງແຖວ ໜ້າ ໃນການກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ ຈັັດຕັ້ງຜັນຂະຫຍາຍອອກມາ ເປັນແຜນການອັນລະອຽດ ຂອງກຳລັງປະກອບອາວຸດ;

3. ກອງທັບ, ນາຍ ແລະ ພົນທະຫານ ຕ້ອງສືບຕໍ່ເຝິກຝົນຄວາມມີລະບຽບວິໄນ, ຖືສິ່ງນີ້ທັງ ເປັນທາດແທ້, ເປັນຊີວິດຈິດໃຈຂອງຕົນ, ທັງເປັນຄຸນລັກສະນະທີ່ຂາດບໍ່ໄດ້ ເພື່ອເປັນອາວຸດ ອັນ ແຫຼມຄົມ ຕັດສິນໄຊຊະນະ ຫຼື ປະລາໄຊກັບສັດຕູຂອງຊາດ;

4. ໃນສະພາບປັດຈຸບັນ ແລະ ໃນຕໍ່ໜ້າ ສຸດທີ່ມີຄວາມຈຳເປັນ ຕ້ອງໄດ້ພັດທະນາກອງທັບໃຫ້ ເຂັ້ມແຂງ, ມີແບບແຜນ ແລະ ທັນສະໄໝເປັນກ້າວໆ, ຮູ້ຈຸດໃດ, ຂົງເຂດໃດ, ກຳລັງປະເພດໃດ ທີ່ຕ້ອງເນັ້ນການພັດ ທະນາ, ເນັ້ນການປັບປຸງ ເນັ້ນການນຳໃຊ້… ກຳລັງໃດ, ປະເພດໃດ ທີ່ຕ້ອງສ້າງ, ປັບປຸງໂລດໃນສະ ເພາະໜ້າ ແລະ ກຳລັງປະເພດໃດ ຕ້ອງພັດທະນາໄລຍະຍາວ;

5. ກອງທັບເຮົາຕ້ອງສືບຕໍ່ເອົາໃຈໃສ່ຊ່ວຍລັດຖະບານແກ້ໄຂບັນຫາເສດຖະກິດ, ຕ້ອງສ້າງ ຄວາມເຂັ້ມແຂງ ທາງດ້ານການສ້າງພະລາທິການກັບທີ່ ເພື່ອຊ່ວຍຫຼຸດຜ່ອນການແບກຫາບຂອງລັດຖະບານ ໃນບັນຫາຍຸດທະສາດໃຫຍ່ໆ. ດຳເນີນການປະຢັດ, ການໃຊ້ຈ່າຍ ຢ່າງມີປະສິດທິຜົນ ດັ່ງທາດແທ້ມູນເຊື້ອຂອງກອງທັບເຮົາໄດ້ມີມາແລ້ວ;

6. ກອງທັບເຮົາ, ກຳລັງປະກອບອາວຸດເຮົາ ໃຫ້ສືບຕໍ່ຮັກສາມູນເຊື້ອອັນດີງາມ ໃນການຊ່ວຍ ເຫຼືອປະຊາຊົນ, ຊ່ວຍເຫຼືອດ້ານການລົບລ້າງຄວາມທຸກຍາກ, ຊ່ວຍບັນເທົາທຸກໃນຍາມມີໄພທີ່ກະ ທົບເຖິງປະຊາຊົນ ດັ່ງທີ່ເຄີຍປະຕິບັດມາ, ເຊິ່ງກອງທັບເຮົາໄດ້ເປັນທີ່ໄວ້ວາງໃຈໄດ້ຂອງປະຊາຊົນ ຢ່າງແທ້ຈິງໃນໄລຍະຜ່ານມາ;

7. ກອງທັບເຮົາ ຈະຕ້ອງສືບຕໍ່ໃຫ້ຄວາມສຳຄັນກັບການພົວພັນທີ່ມີມູນເຊື້ອກັບກອງທັບ ຂອງປະເທດເພື່ອນມິດ ທັງຢູ່ໃກ້ ແລະ ໄກ ໂດຍສະເພາະເພື່ອນມິດຍຸດທະສາດ, ຮູ້ຍາດແຍ່ງ, ຮູ້ຮໍ່າ ຮຽນ ແລະ ຮູ້ຮັບເອົາການຮ່ວມມື ຢ່າງມີການເລືອກເຟັ້ນ ດ້ວຍສະຕິປັນຍາ ທີ່ແຫຼມຄົມ.

(ພາບ ແລະ ຂ່າວ: ກົງທະນູຄໍາ ພິພັດເສລີ)