ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

      ລະຫວ່າງວັນທີ 14-17 ກຸມພາ 2022 ນີ້. ກຳມາທິການ ປກຊ-ປກສ (ສພຊ) ນຳໂດຍ ທ່ານ ພົຕ.ປອ ວົງສັກ ພັນທະວົງ ຄະນະປະຈຳສະພາແຫ່ງຊາດ ປະທານ ກຳມາທິການ ປກຊ-ປກສ ພ້ອມດ້ວຍຄະນະ ໄດລົງເຄື່ອນໄຫວເຮັດວຽກຕິດຕາມກວດກາ ແລະ ຊຸກຍູ້ການຈັດຕັ່ງປະຕິບັດລັດຖະທຳມະນູນ, ກົດຫມາຍ ແລະ ນິຕິກຳໃຕ້ກົດຫມາຍໃນຂົງເຂດ ປກຊ-ປກສ ຢູ່ແຂວງອັດຕະປື ໂດຍການຕ້ອນຮັບ ແລະ ຮ່ວມເຄື່ອນໄຫວຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ ອັດຕະປື (ສພຂ), ມີທ່ານ ນາງ ຈັນທະລີ ສີສຸວົງ ປະທານຄະນະກຳມະການຍຸຕິທຳ ແລະ ປກຊ-ປກສ (ຄຍປປ), ຄະນະເລຂາທິການ ແລະ ວິຊາການຊ່ວຍວຽກຈຳນວນໜຶ່ງ.

ການເຄື່ອນໄຫວຄັ້ງນີ້ໄດ້ຊຸກຍູ້ບາງວຽກງານພາຍໃນສະພາປະຊາຊົນແຂວງ ອັດຕະປື ແລະໄດ້ເຮັດວຽກຮ່ວມກັບພະແນກແຜນການ ແລະ ການລົງທຶນແຂວງ, ກອງບັນຊາການທະຫານແຂວງ, ກອງບັນຊາການ ປກສ ແຂວງ ແລະ ສະຫະພັນນັກຮັບເກົ່າ ພ້ອມທັງໄດ້ລົງຢ້ຽຢາມເຮັດວຽກ ຢູ່ກອງຮ້ອຍທະຫານຊາຍແດນ 541 ຢູ່ເມືອງຊານໄຊ, ກອງຮ້ອຍທະຫານຊາຍແດນ 543, ກອງພັນ 21 ເມືອງສະຫນາມໄຊ. ນອກນີ້ຍັງໄດ້ຢ້ຽມຊົມພື້ນຖານການຜະລິດກະສິກຳຂອງປະຊາຊົນ ເຂດຊົນລະປະທານເຊປຽນ ບ້ານດອນບົກໃໝ່ທ່າແສງຈັນ ຢູ່ເມືອງສະໜາມໄຊ ແລະ ໄດ້ຢ້ຽມຊົມຫລັກໝາຍຊາຍແດນ ລາວ-ຫວຽດນາມ-ກຳປູເຈຍ(ເຂດພັດທະນາສາມຫລ່ຽມ CLV). ໃນໂອກາດດັ່ງກ່າວ ປະທານກຳມາທິການ ປກຊ-ປກສ ຮ່ວມກັບ ປະທານສະພາປະຊາຊົນແຂວງ ມອບຂອງຕ້ອນຈຳນວດໜຶ່ງປະເພດ ອຸປະກອນກິລາ, ມີ່ ແລະ ນ້ຳດື່ມ ໃຫ້ແກ່ສອງ ກອງຮ້ອຍທະຫານຊາຍແດນ ອີກດ້ວຍ.

ການເຄື່ອນໄຫວເຮັດວຽກເທື່ອນີ້ ນອກຈາກຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດຫມາຍ ໃນຂົງເຂດປກຊ-ປກສ ຍັງໄດ້ເນັ້ນຫນັກກ່ຽວກັບກົນໄກການພົວພັນປະສານງານ ເຊິ່ງກັນ ແລະ ກັນລະຫວ່າງ ສະພາປະຊາຊົນແຂວງ ກັບ ຂົງເຂດ ປກຊ-ປກສ ແລະ ສະຫະພັນນັກຮົບເກົ່າ ພ້ອມທັງຊຸກຍູ້ການຈັດຕັ້ງປະຕິບັດສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງີນ ແລະ ແກ້ໄຂບັນຫາຢາເສດຕິດໃຫ້ໄດ້ຮັບຜົນສຳເລັດ.

(ພາບ-ຂ່າວ:ວິນັດ ສພຂ )