ວັນທີ 21 ມີນາ 2022 ນີ້. ທ່ານ ປອ ລີເບີ ລີບົວປາວ ກຳມະການສູນກາງພັກ ປະທານກຳມາທິການແຜນການ, ການເງີນ ແລະ ການກວດສອບ ສະພາແຫ່ງຊາດ ພ້ອມຄະນະ ໄດ້ເຄື່ອນໄຫວເຮັດວຽກ ຕິດຕາມກວດກາ ຢູ່ແຂວງອັດຕະປື. ໂດຍການຕ້ອນຮັບ ແລະ ຮ່ວມເຮັດວຽກຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ປະທານສະພາປະຊາຊົນແຂວງ ພ້ອມຄະນະ.

ໃນໂອກາດນີ້, ໄດ້ເຂົ້າພົບ ທ່ານ ເລັດ ໄຊຍະພອນ ເລຂາພັກແຂວງ ເຈົ້າແຂວງອັດຕະປື ທີ່ຫ້ອງວ່າການປົກຄອງແຂວງ ເພື່ອກ່າວຈຸດປະສົງໃນການເຄື່ອນໄຫວເຮັດວຽກ ຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022, ວາລະແຫ່ງຊາດ ກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງີນ ທີ່ສະພາໄດ້ຮັບຮອງໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX. ໂອກາດດັ່ງກ່າວ ທ່ານ ເຈົ້າແຂວງ ໄດ້ລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022 ແລະ ການປະຕິບັດວາລະແຫ່ງຊາດ ພາຍໃນແຂວງ ເຊິ່ງທ່ານໄດ້ຍົກໃຫ້ເຫັນບັນດາຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ຄົງຄ້າງ ທີ່ຈະຕ້ອງໄດ້ພ້ອມກັນສືບຕໍ່ຈັດຕັ້ງປະຕິບັດໃຫ້ບັນລຸຕາມຈຸດປະສົງ ແລະ ລະດັບຄາດໝາຍ.

ຈາກນັ້ນ, ທ່ານປະທານກຳມາທິການແຜນການ, ການເງີນ ແລະ ການກວດສອບ ພ້ອມຄະນະ ໄດ້ເຂົ້າຮ່ວມເຮັດວຽກກັບ ສະພາປະຊາຊົນແຂວງ ແລະ ພະແນກການທີ່ກ່ຽວຂ້ອງ ທີ່ຫ້ອງປະຊຸມ ສະພາປະຊາຊົນແຂວງ ໂດຍມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ທ່ານຮອງເຈົ້າແຂວງ, ຄະນະປະຈໍາສະພາປະຊາຊົນແຂວງ, ຄະນະກຳມະການ, ຄະນະເລຂາທິການ, ຕາງໜ້າຈາກຫ້ອງວ່າການປົກຄອງແຂວງ,ພະແນກການເງີນ, ພະແນກແຜນການ ແລະ ການລົງທຶນ ພ້ອມດ້ວມພະນັກງານວີຊາການທີ່ກ່ຽວຂ້ອງພາຍໃນສະພາປະຊາຊົນແຂວງເຂົ້າຮ່ວມ. ໃນນັ້ນ ທ່ານປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17 ໄດ້ລາຍງານໂດຍຫຍໍ້ ການຈັດຕັ້ງຜັນຂະຫຍາຍ ມະຕິຂອງສະພາແຫ່ງຊາດ ວ່າດ້ວຍການຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2022 ແລະ ມະຕິກ່ຽວກັບການແກ້ໄຂຂໍ້ຫຍຸ້ງຍາກດ້ານເສດຖະກິດ-ການເງີນ ແລະ ທ່ານຮອງເຈົ້າແຂວງ ໄດ້ລາຍງານກ່ຽວກັບໂຄງການຊົດເຊີຍ ແລະ ຟື້ນຟູ ທີ່ໄດ້ຮັບຜົນກະທົບຈາກໄພພິບັດນ້ໍາຖ້ວມ ຢູ່ເມືອງສະໜາມໄຊ. ຕອນບ່າຍຂອງວັນດ່ຽວກັນ, ກໍໄດ້ເຄື່ອນໄຫວຢ້ຽມຊົມພື້ນທີ່ຕົວຈິງໂຄງການຊົດເຊີຍ (ເຮືອນພັກຖາວອນ) ຢູ່ເມືອງສະໜາມໄຊ.

(ວິນັດ ສີສຸລາດ)