ໃນວັນທີ 22 ສິງຫາ 2023 ທ່ານ ຮສ ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ຄະນະປະຈຳສະພາແຫ່ງຊາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມສະພາບກວດກາກ່ຽວກັບການຄຸ້ມຄອງ ແລະ ກວດກາການນຳເຂົ້າ ແລະ ສົ່ງອອກສິນຄ້າ ຢູ່ດ່ານສາກົນບໍ່ເຕ່ນ ໂດຍການໃຫ້ກຽດເຂົ້າຮ່ວມຂອງ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫຼວງນໍ້າທາ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ, ເກັບກຳຂໍ້ມູນ ແລະ ເບີ່ງສະຖານທີີ່ຕົວຈິງ ພ້ອມທັງ ເປີດກອງປະຊຸມຮ່ວມກັບຄະນະຄຸ້ມຄອງເຂດເສດຖະກິດພິເສດບໍ່ເຕ່ນ ແຂວງຫລວງນ້ຳທາ ໂດຍການເຂົ້າຮ່ວມຂອງ ທ່ານ ທອງສີ ກັນທະຈັກ ຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ, ທ່ານ ວິລະກອນ ເກດຕະວົງ ຫົວໜ້າດ່ານພາສີສາກົນບໍເຕ່ນ,  ພ້ອມດ້ວຍຮອງຫົວໜ້າພະແນກໂຍທາທິການ ແລະ ຂົນສົ່ງ, ພະແນກອຸດສາຫະກຳ ແລະ ການຄ້າແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ 29 ກວ່າທ່ານ.

ໃນກອງປະຊຸມໄດ້ຮັບຟັງການລາຍງານຈາກຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ເປັນຕົ້ນແມ່ນທີ່ຕັ້ງ, ຈຸດພິເສດ, ຈຸດກວດກາຄົນເຂົ້າ-ອອກເມືອງ ແລະ ຈຸດກວດກາລົດບັນທຸກສີນຄ້າເຂົ້າ-ອອກ, ສະພາບການຈັດຕັ້ງປະຕິບັດໜ້າທີວຽກງານ 6 ເດືອນຕົ້ນປີ 2023 ເປັນຕົ້ນແມ່ນລາຍຮັບຈາກການເກັບພາສີ-ອາກອນສິນຄ້າ, ພາຫະນະເຂົ້າ-ອອກດ່ານ, ການເກັບຄ່າຈົດທະບຽນສິນຄ້າ, ການເກັບຄ່າທຳນຽມ ແລະ ຄ່າບໍລິການຕ່າງໆ ແລະ ຂໍ້ສະດວກ, ຂໍ້ຫຍຸ້ງຍາກຕ່າງໆ. ພ້ອມທັງຮັບຟັງການລາຍງານກ່ຽວກັບວຽກງານການຄຸ້ມຄອງດ່ານສາກົນບໍ່ເຕ່ນກ່ຽວກັບການເຄື່ອນໄຫວວຽກງານຂອງດ່ານພາສີບໍ່ເຕ່ນໃນໄລຍະຜ່ານມາເປັນຕົ້ນແມ່ນການຈັດຕັ້ງປະຕິບັດວຽກງານວິຊາສະເພາະ, ການຄຸ້ມຄອງສາງ, ວຽກງານບໍລິການ ແລະ ອື່ນໆ.

ພ້ອມນັ້ນ ຜູ້ແທນກອງປະຊຸມຍັງໄດ້ແລກປ່ຽນປະກອບຄຳຄິດເຫັນຕາມຄຳຖາມເຈາະຈີ້ມຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ເປັນຕົ້ນແມ່ນ ການຄຸ້ມຄອງ ແລະ ກວດກາການນຳເຂົ້າ ແລະ ສົ່ງອອກສິນຄ້າ, ການຈັດຕັ້ງປະຕິບັດກົນໄກການຄຸ້ມຄອງຕິດຕາມ, ກວດກາ ລົດບັນທຸກສິນຄ້າ ແລະ ຕູ້ບັນທຸກສິນຄ້າທາງລົດໂຟລາວ-ຈີນ ທີ່ເຂົ້າ-ອອກດ່ານສາກົນບໍເຕ່ນ,ການສ້າງສິ່ງອຳນວຍຄວາມສະດວກດ້ານຕ່າງໆພາຍໃນດ່ານຂອງຂະແໜງການທີ່ກ່ຽວຂ້ອງ ທັງພາກລັດ ແລະ ເອກະຊົນ, ບໍລິສັດແຈ້ງພາສີ ເພື່ອສ້າງເງື່ອນໄຂການບໍລິການທີ່ດີໃຫ້ແກ່ຜູ້ປະກອບການໃນການນຳເຂົ້າ ແລະ ສົ່ງອອກສິນຄ້າ  , ການຄຸ້ມຄອງ, ຕິດຕາມ ແລະ ກວດກາຕູ້ບັນທຸກສິນຄ້າເປົ່າທາງລົດໂຟລາວ-ຈີນ. ຢ່າງກົງໄປກົງມາເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ໃຫ້ມີຄວາມຖຶກຕ້ອງ, ສາມາດຈັດຕັ້ງປະຕິບັດໄດ້ດີຂື້ນກວ່າເກົ່າ ແລະ ເຮັດໃຫ້ການຕິດຕາມກວດກາ, ເກັບກຳຂໍ້ມູນ ຂອງກຳມາທິການທີ່ກ່ຽວຂ້ອງຂອງສະພາແຫ່ງຊາດ ໃຫ້ໄດ້ຂໍ້ມູນແຈ້ງຄົບຖ້ວນນຳໄປສະເໜີຕໍ່ຂັ້ນເທີງ ເພື່ອປັບປຸງແກ້ໄຂໃຫ້ມີຄຸນນະພາບ ແລະ ໄດ້ມາດຕະຖານສາກົນ.

ໃນໂອກາດດັ່ງກ່າວ,  ທ່ານ ຮສ ປອ ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ພ້ອມດ້ວຍ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງຫຼວງນໍ້າທາ ກໍໄດ້ເຂົ້າພົບທ່ານ ວຽງສະຫວັດ ສີພັນດອນ ກຳມະການສູນກາງພັກ ເລຂາພັກແຂວງ ເຈົ້າແຂວງແຂວງຫຼວງນໍໍ້າທາ ເພື່ອແຈ້ງຈຸດປະສົງ ແລະ ລາຍງານຜົນການລົງເຄື່ອນໄຫວຕິດຕາມກວດກາຄັ້ງນີ້.

ໂດຍ ນາງ ອຳພອນ ສີປະເສີດ