ພຊ) ວັນທີ 28 ມັງກອນ 2022 ທີ່ຫ້ອງຮັບແຂກສະພາແຫ່ງຊາດ, ທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ທັງເປັນປະທານສະມາຄົມມິດຕະພາບລັດຖະສະພາລາວ-ຍີ່ປຸ່ນ ໄດ້ຕ້ອນຮັບການເຂົ້າຢ້ຽມຂໍາ່ນັບທ່ານ ໂຄບາຢາຊິ ເຄນອິຈິ (KOBAYASHI Kenichi)ເອກອັກຄະຣາຊະທູດ ແຫ່ງ ຍີ່ປຸ່ນ ປະຈຳ ສປປ ລາວ ໃນໂອກາດທີ່ທ່ານມາດຳລົງຕຳແໜ່ງເປັນເອກອັກຄະຣາຊະທູດ ແຫ່ງ ຍີ່ປຸ່ນ ປະຈຳ ສປປລາວ ຄົນໃໝ່.
ທ່ານ ນາງ ທຸມມາລີ ວົງພະຈັນ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ມູນເຊື້ອຄວາມສາມັກຄີອັນດີງາມ ແລະ ການພົວພັນຮ່ວມມືຂອງສອງປະເທດທີ່ມີມາແຕ່ດົນນານ, ເປັນຄຸ່ຮ່ວມມືຍຸດທະສາດທີ່ມີລັກສະນະຮອບດ້ານ ທັງດ້ານການເມືອງ ແລະ ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ ແລະ ຍີ່ປຸ່ນ ຍັງເປັນປະເທດອັນດັບທີ 1 ທີ່ໄດ້ໃຫ້ການຊ່ວຍເຫລືອລ້າແກ່ ສປປລາວ ເຊິ່ງມີມູນຄ່າສະເລ່ຍ 90-100 ລ້ານໂດລາ/ປີ ໂດຍສະເພາະການຊ່ວຍເຫລືອດ້ານການພັດທະນາຊັບພະຍາກອນມະນຸດ, ພື້ນຖານໂຄງລ່າງ, ການສຶກສາ, ສາທາລະນະສຸກ ແລະ ກະສິກຳ-ປ່າໄມ້. ພ້ອມນີ້, ການພົວພັນຮ່ວມມືຂອງສອງລັດຖະສະພາຍີ່ປຸ່ນ-ລາວ ກໍໄດ້ຮັບການເສີມຂະຫຍາຍໄປຄຽງຄູ່ກັນ ເຊິ່ງໄດ້ເຮັດໃຫ້ການພົວພັນຮ່ວມມື ນັບມື້ນັບແຕກດອກອອກຜົນ ແລະ ງອກງາມຍິ່ງໆຂຶ້ນ.
ຈາກນັ້ນ, ທ່ານ ໂຄບາຢາຊິ ເຄນອິຈິ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະ ແດງຄວາມຊົມເຊີຍຕໍ່ການພົວພັນຮ່ວມມືລະຫວ່າງສອງຊາດ ກໍຄືການຮ່ວມມືລະຫວ່າງສອງອົງການນິຕິບັນຍັດຍີ່ປຸ່ນ-ລາວ ທີ່ນັບມື້ເຕີບໃຫ່ຍເຂັ້ມແຂງ, ຍືນຍົງ ແລະ ໄດ້ຮັບຜົນສຳເລັດໃນຫລາຍດ້ານ; ແລະ ຍັງໄດ້ໃຫ້ຄຳໝັ້ນສັນຍາວ່າຈະຕັ້ງໜ້າປະຕິບັດໜ້າທີ່ຂອງຕົນໃນໄລຍະທີ່ປະຈຳຢູ່ ສປປລາວ ຢ່າງເຕັມທີ່ ເພື່ອນຳເອົາຜົນປະໂຫຍດສູງສຸດມາສູ່ສອງປະເທດ ກໍຄືປະຊາຊົນສອງຊາດລາວ-ຍີ່ປຸ່ນ.
(ພາບ ແລະ ຂ່າວ: ກົງທະນູຄຳ ພິພັດເສລີ)