ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


ໃນຕອນບ່າຍຂອງວັນທີ 14 ກັນຍາ 2022 ທີ່ຫ້ອງປະຊຸມສະພາປະຊາຊົນແຂວງ​ (ສພຂ)​ອັດຕະປື ໂດຍການເປັນປະທານຂອງທ່ານ ນາງ ທຸມມາລີ ວົງພະຈັນ ກຳມະການຄະນະປະຈຳສະພາແຫ່ງຊາດ, ປະທານກຳມາທິການວັດທະນະທຳ-ສັງຄົມ ຮ່ວມກັບທ່ານ ນາງ ມິນາພອນ ໄຊສົມພູ ປະທານ​ ສພຂ​ ອັດຕະປື ແລະ ທ່ານ ບຸນເສີດ ເສດທິລາດ ຮອງເຈົ້າແຂວງແຂວງອັດຕະປື ມີບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງ 7 ແຂວງ (ພາກກາງ-ພາຍໃຕ້), ຮອງປະທານ,​ ຄະນະກໍາມະການ, ຄະນະເລຂາທິການ, ສະມາຊິກ​ ສພຂ, ຕາງໜ້າທູດດ້ານການສຶກສາ ແລະ ການປົກຄອງ ສະຖານທູດອົດສະຕາລີ ປະຈຳ ສປປລາວ, ຕາງໜ້າອົງການຢູນິເຊັບ ປະຈຳ ສປປລາວ, ຕາງໜ້າໂຄງການປົກປ້ອງສັງຄົມ ອັງການແຮງງານສາກົນ, ຊ່ຽວຊານໂຄງການປົກປ້ອງສົງຄົມ ປະຈຳອົງການຢູນິເຊັບ ພ້ອມດ້ວຍຫົວໜ້າ-ຮອງຫົວໜ້າກົມ, ພະນັກງານກ່ຽວຂ້ອງ ແລະ ພະແນກການອ້ອມຂ້າງແຂວງ​ ໃນຂົງເຂດວັດທະນະທໍາ-ສັງຄົມ.

ກອງປະຊຸມ ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດໂຄງການປົກປ້ອງສັງຄົມ (ວຽກອຸດໜູນແມ່ຍິງຖືພາ ແລະ ເດັກກ່ອນໄວຮຽນ) ໃນ 2 ເມືອງ ຄື: ເມືອງພູວົງ ແລະ ເມືອງສະໜາມໄຊ ແຂວງອັດຕະປື ຈາກທ່ານ ບຸນເສີດ ເສດທິລາດ ຮອງເຈົ້າແຂວງແຂວງອັດຕະປື, ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ ວ່າ: ການຈັດຕັ້ງປະຕິບັດການທົດລອງການໃຫ້ອຸດໜູນແມ່ຍິງຖືພາ ແລະ ເດັກ ກ່ອນໄວຮຽນ ແມ່ນໄດ້ເປີດໂຕເປັນທາງການ ໃນວັນທີ 18 ມີຖຸນາ 2021 ໂດຍກະຊວງແຮງງານ ແລະ ສະຫວັດດີການສັງຄົມ ແລະ ບໍລິສັດສະຕາວິນເທັກ ເຊິ່ງອົງການ (UNICEF) ເປັນຜູ້ໃຫ້ທຶນ, ໂຄງການຈັດຕັ້ງປະຕິບັດ ຢູ່ 2 ແຂວງຄື: ສະຫວັນນະເຂດ ແມ່ນເມືອງນອງ ແລະ ອັດຕະປື ແມ່ນເມືອງສະໜາມໄຊ ໄດ້ມີຜູ້ທີ່ລົງທະບຽນທັງໝົດແມ່ນ 1,114 ຄົນບໍ່ຄົບຕາມການວາງເປົ້າໝາຍຂອງໂຄງການ ຈຶ່ງໄດ້ຮັບຮອງເອົາອີກເມືອງ 1 ຄືເມືອງພູວົງ ຂອງແຂວງອັດຕະປືຕື່ມອີກ ການຈັດຕັ້ງປະຕິບັດຂອງແຂວງອັດຕະປື ຍັງໄດ້ມີການແຕ່ງຕັ້ງຄະນະຮັບຜິດຊອບໂດຍແມ່ນທ່ານຫົວໜ້າພະແນກແຮງງານ ແລະ ສະຫວັດດີການ (ຮສສ) ແຂວງ, ສ່ວນເມືອງແມ່ນທ່ານຮອງເຈົ້າເມືອງເປັນຜູ້ຮັບຜີດຊອບ ພາຍຫລັງມີຄະນະດັ່ງກ່າວທາງໂຄງການກໍໄດ້ສົມທົບກັບພາກລັດດຳເນີນກິດຈະກຳດ້ວຍການເຝິກອົບຮົມໃຫ້ພະນັກງານທີ່ກ່ຽວຂ້ອງ ເຊິ່ງມີຂັ້ນແຂວງ, ຂັ້ນເມືອງ, ໂຮງໝໍເມືອງສະໜາມໄຊ ແລະ ໂຮງໝໍເມືອງພູວົງ ພ້ອມໂຮງໝໍນ້ອຍທີ່ຂຶ້ນກັບ 2 ເມືອງ 16 ແຫ່ງ; ຈາກນັ້ນ, ບັນດາຜູ້ທີ່ເຂົ້າຮ່ວມກອງປະຊຸມໄດ້ແລກປ່ຽນບົດຮຽນ ແລະ ຂໍ້ສະດວກ-ຂໍ້ຫຍຸ້ງຍາກ ເຊິ່ງກັນແລະກັນ.
(ຂ່າວ: ກຸກກິກ​ ສພຊ, ພາບ:ວິນັດ​ ສພຂ)