(ສພຊ) ວັນທີ 8 ທັນວາຜ່ານມາ, ທີ່ສະພາແຫ່ງຊາດ ນະຄອນຫຼວງວຽງຈັນ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ໄດ້ຕ້ອນຮັບການເຂົ້າພົບປະຂອງທ່ານ ຈອງ ຢອງ ຊູ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ເກົາຫຼີ ປະຈໍາ ສປປລາວ ໃນໂອກາດທີ່ທ່ານໄດ້ຮັບຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ເກົາຫຼີ ປະຈໍາ ສປປລາວ ຄົນໃໝ່ ເຊິ່ງຈຸດປະສົງຂອງການເຂົ້າພົບປະຄັ້ງນີ້ ແມ່ນເພື່ອສະເໜີຕົວ ແລະ ປຶກສາຫາລືກ່ຽວກັບການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ດີງາມມາແຕ່ດົນນານ ລະຫວ່າງ ສປປລາວ ແລະ ສ.ເກົາຫຼີ ກໍຄືການພົວພັນຮ່ວມມື ລະຫວ່າງສະພາແຫ່ງຊາດລາວ ແລະ ສະຖານເອກອັກຄະລັດຖະທູດ ແຫ່ງ ສ.ເກົາຫຼີ ປະຈໍາ ສປປລາວ.
ໃນໂອກາດນີ້, ທ່ານປະທານກຳມາທິການການຕ່າງປະເທດ ໄດ້ສະແດງຄວາມຍິນດີຕ້ອນຮັບທ່ານ ຈອງ ຢອງ ຊູ ແລະ ຊົມເຊີຍທ່ານທີ່ໄດ້ຮັບການແຕ່ງຕັ້ງມາປະຕິບັດໜ້າທີ່ການທູດ ຢູ່ ສປປລາວ ແລະ ອວຍພອນໃຫ້ທ່ານປະສົບຜົນສຳເລັດໃນການປະຕິບັດໜ້າທີ່ວຽກງານການທູດຂອງທ່ານ ຢູ່ ສປປລາວ ເຊິ່ງເປັນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປລາວ ແລະ ສ.ເກົາຫຼີ, ລະຫວ່າງ 2 ອົງການນິຕິບັນຍັດຂອງ 2 ປະເທດ ໃຫ້ນັບມື້ນັບຂະຫຍາຍຕົວຍິ່ງຂຶ້ນ.
ຕະຫຼອດໄລຍະຜ່ານມາ ການພົວພັນຮ່ວມມື ລະຫວ່າງ ສອງປະເທດ ໄດ້ຮັບການເສີມຂະຫຍາຍເປັນກ້າວໆ ເຊິ່ງສະແດງອອກດ້ວຍການແລກປ່ຽນຄະນະຜູ້ແທນໄປ-ມາຫາສູ່ກັນໃນຫຼາຍຂັ້ນ-ຫຼາຍລະດັບ ແລະ ຮ່ວມມືໃນຂະແໜງການຕ່າງໆ ເປັນຕົ້ນແມ່ນການຮ່ວມມືດ້ານການພັດທະນາເສດຖະກິດ-ສັງຄົມ, ການສຶກສາ, ກະສິກຳ, ການທ່ອງທ່ຽວ, ແຮງງານ, ການຄ້າ-ການລົງທຶນ ແລະ ຂະແໜງການອື່ນໆ, ສອງຝ່າຍຍັງໄດ້ມີການຮ່ວມມື ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ; ສຳລັບການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດ ແຫ່ງ ສ.ເກົາຫຼີ ກໍໄດ້ຮັບການເສີມຂະຫຍາຍດີຂຶ້ນຢ່າງຕໍ່ເນື່ອງ, ການແລກປ່ຽນຢ້ຽມຢາມຄະນະຜູ້ແທນລະດັບສູງຂອງສອງສະພາ, ລະດັບຂັ້ນກຳມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາ ລາວ-ສ.ເກົາຫຼີ-ລາວ; ນອກນີ້, ສອງສະພາແຫ່ງຊາດ ກໍໄດ້ມີການສະໜັບສະໜູນ ເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ເປັນຕົ້ນແມ່ນໃນເວທີຂອງ IPU, ASEP, APPF, AIPA ແລະ ເວທີອື່ນໆ ເພື່ອປະກອບສ່ວນໃນການສົ່ງເສີມສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນໂລກ.
ໃນໂອກາດນີ້, ທ່ານປະທານກຳມາທິການການຕ່າງປະເທດ ຍັງໄດ້ແຈ້ງໃຫ້ຮູ້ຕື່ມວ່າ: ສະພາແຫ່ງຊາດລາວ ຊຸດທີ IX ເຊິ່ງມີສະມາຊິກສະພາແຫ່ງຊາດ ທັງໝົດ 164 ທ່ານ ຍິງ 36 ທ່ານ ກວມເອົາ 21,95% ຂອງຈໍານວນສະມາຊິກສະພາແຫ່ງຊາດທັງໝົດ; ສະພາປະຊາຊົນແຂວງ ຊຸດທີ II ມີສະມາຊິກທັງໝົດ 492 ທ່ານ ຍິງ 150 ທ່ານ ກວມເອົາ 30,48% ຂອງຈໍານວນສະມາຊິກສະພາປະຊາຊົນແຂວງທັງໝົດ ແລະ ປັດຈຸບັນ, ສະພາແຫ່ງຊາດ ພວມດຳເນີນກອງປະຊຸມສະໄໝສາມັນເທື່ອທີ 4.
ພ້ອມນັ້ນ, ທ່ານ ຈອງ ຢອງ ຊູ ໄດ້ສະແດງຄວາມດີໃຈທີ່ໄດ້ມີໂອກາດເຂົ້າພົບປະໃນຄັ້ງນີ້ ເຊິ່ງທ່ານໄດ້ສະແດງຄວາມປິຕິຍິນດີທີ່ໄດ້ມາປະຕິບັດໜ້າທີ່ຢູ່ ສປປລາວ, ໄດ້ຕີລາຄາສູງຜົນການພົວພັນຮ່ວມມື ລະຫວ່າງ 2 ຝ່າຍ ໃນໄລຍະຜ່ານມາ ແລະ ເນັ້ນເຖິງຄວາມສຳຄັນໃນການຈະສືບຕໍ່ຮ່ວມມືໃນຕໍ່ໜ້າ ໂດຍສະເພາະໃນດ້ານເສດຖະກິດ-ການລົງທຶນ, ແຮງງານ, ການສືບຕໍ່ແລກປ່ຽນການຢ້ຽມຢາມຂອງການນຳຂັ້ນສູງຂອງ 2 ປະເທດ ແລະ ຂອງ 2 ສະພາແຫ່ງຊາດ ແລະ ການຮ່ວມມືໃນຂົງເຂດຕ່າງໆທີ່ເຫັນວ່າ 2 ຝ່າຍມີຄວາມສົນໃຈນຳກັນ.
ໃນຕອນທ້າຍ, ທ່ານ ສັນຍາ ປຣະເສີດ ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອ ສປປລາວ ໃນຕະຫຼອດໄລຍະຜ່ານມາ.
(ພາບ: ນາງ ກຸກກິກ ບຸດດາໄຊ, ຂ່າວ: ນາງ ສຸພາວັນ ຫອມສະນິດ)