ໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ເມື່ອວັນທີ 11 ມິຖຸນາຜ່ານມາ, ທ່ານ ປອ. ຫົງຄຳ ສຸວັນນະວົງ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 10 ແຂວງວຽງຈັນ ໄດ້ປະກອບຄໍາເຫັນຕໍ່ບົດລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ ໂດຍສະເພາະການປະຕິຮູບການສຶກສາ ເຊິ່ງມີບາງຕອນທ່ານໄດ້ກ່າວວ່າ: ການພັດທະນາປະເທດຊາດຈະປະສົບຜົນສໍາເລັດ, ປັດໄຈສໍາຄັນກໍຄືຊັບພະຍາກອນຕ້ອງໄດ້ຮັບການພັດທະນາ ທັງຊັບພະຍາກອນມະນຸດ ແລະ ຊັບພະຍາກອນທຳມະຊາດ; ການສຶກສາເປັນເຄື່ອງມືທີ່ສຳຄັນໃນການເສີມສ້າງຊັບພະຍາກອນມະນຸດໃຫ້ມີຄຸນນະພາບເພື່ອນໍາໄປສູ່ການພັດທະນາປະເທດທາງດ້ານເສດຖະກິດ-ສັງຄົມ, ການ ເມືອງ ແລະ ວັດທະນະທຳ ເຊິ່ງຫຼາຍປະເທດທີ່ກຳລັງພັດທະນາ ໄດ້ພະຍາຍາມປັບປຸງ, ສົ່ງເສີມ, ສະໜັບສະໜູນການສຶກສາ ທັງໃນລະບົບ, ນອກລະບົບ ແລະ ດ້ວຍຕົນເອງ ເຊັ່ນສິງກະໂປ ເປັນປະເທດໜຶ່ງທີ່ມີການສຶກສານຳໜ້າໃນໂລກ, ການສຶກສາຂອງປະເທດສິງກະໂປ ສ້າງໃຫ້ນັກສຶກສາມີຈິດສຳນຶກໃນ 4 ຄຸນລັກສະນະດັ່ງນີ້:
1) ເຊື່ອໝັ້ນ ແລະ ໝັ້ນໃຈໃນຕົນເອງ, ມີຄວາມຊັດເຈນ ຮູ້ຖືກຮູ້ຜິດ;
2) ຮູ້ຈັກຮັບຜິດຊອບ ແລະ ຮຽນຮູ້ດ້ວຍຕົນເອງ;
3) ສາມາດເຮັດວຽກເປັນທີມງານ;
4) ມີຈິດສຳນຶກຄວາມເປັນພົນລະເມືອງສິງກະໂປສູງ.
4 ຄຸນລັກສະນະນີ້ ຈະເປັນບົດຮຽນທີ່ດີໃນການນໍາມາໝູນໃຊ້ ເພື່ອເຮັດໃຫ້ການສຶກສາຂອງປະເທດເຮົາດີຂຶ້ນກວ່າເກົ່າ.
ຜ່ານມາປະເທດເຮົາ ໄດ້ມີການປະຕິຮູບການສຶກສາ 5 ຄັ້ງ; ເຖິງຢ່າງໃດກໍຕາມ, ການດໍາເນີນການປະຕິຮູບດັ່ງ ກ່າວ ຍັງບໍ່ທັນປະສົບຜົນສຳເລັດເທົ່າທີ່ຄວນ ເຊິ່ງສະແດງອອກການຂາດເຂີນຄູ, ຄຸນນະພາບການສຶກສາຍັງຕໍ່າ. ມາຮອດປັດຈຸບັນນີ້ ມີຄວາມຈຳເປັນຕ້ອງປະຕິຮູບການສຶກສາຂອງ ສປປລາວ ເພື່ອໃຫ້ແທດເໝາະກັບນະໂຍບາຍ ແລະ ສະພາບເສດຖະກິດ-ສັງຄົມໃນຍຸກໃໝ່ ໃຫ້ທັນກັບຍຸກດິຈິຕອນ 4.0 ຫຼືວ່າ AI ຈຶ່ງສະເໜີວ່າຄວນປະຕິຮູບໃນ 3 ຫຼັກການທີ່ສຳ ຄັນດັ່ງນີ້:
1) ປະຕິຮູບໂຄງສ້າງ, ລະບົບການບໍລິຫານຈັດການ;
2) ປະຕິຮູບຜູ້ບໍລິຫານ ເຊັ່ນ: ຄຸ-ອາຈານ ຕ້ອງໃຫ້ມີຄຸນນະພາບ;
3) ປະຕິຮູບຫຼັກສູດ, ວິທີການຮຽນ-ການສອນ ແລະ ການປະເມີນຜົນ.
ເຊິ່ງ 3 ຫຼັກການນີ້ ເປັນສິ່ງທີ່ສຳຄັນທີ່ຈະເຮັດໃຫ້ການສຶກສາຂອງປະເທດເຮົາມີຄວາມຈະເລີນກ້າວໜ້າຂຶ້ນຕື່ມ.