ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

       ຕອນເຊົ້າວັນທີ 02 ກຸມພາ 2022 ນີ້, ທີ່ສະໂມສອນ ສະພາປະຊາຊົນ ແຂວງ ເຊກອງ (ສພຂ) ໄດ້ມີພິທີປະກາດການສ້າງຕັ້ງຄະນະພັກຮາກຖານ ແລະ ໜວຍພັກຂຶ້ນກັບຄະນະພັກຮາກຖານ ໂດຍການເຂົ້າຮ່ວມເປັນປະທານຂອງ ສະຫາຍ ດົງເພັດ ພະຍົນ ຮອງເລຂາພັກແຂວງ, ມີສະຫາຍ ບຸນຫຼາຍ ບຸດທິ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ນາງ ຄໍາເສັງ ທຸມມະວົງສາ ເລຂາຄະນະພັກຮາກຖານ ສພຂ ຮອງປະທານ ສພຂ, ມີທ່ານບັນດາທ່ານຕາງໜ້າຈາກຄະນະກວດກາພັກ-ລັດແຂວງ, ຄະນະໜ່ວຍພັກອ້ອມຂ້າງ, ຄະນະພັກຮາກຖານ, ຄະນະໜ່ວຍພັກ, ບັນດາອົງການຈັດຕັ້ງມະຫາຊົນ, ສະມາຊິກພັກສົມບູນ-ສໍາຮອງພາຍໃນໜ່ວຍພັກຮາກຖານເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ບຸນຫຼາຍ ບຸດທິ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະບໍລິຫານງານພັກແຂວງ ສະບັບເລກທີ 01, 02,​ 03, 04, 22 ແລະ 24/ຄປພຂ, ລົງວັນທີ 24 ມັງກອນ 2022 ວ່າດ້ວຍອະນຸມັດໃຫ້ໜ່ວຍພັກຮາກຖານ ສພຂ ສ້າງຕັ້ງເປັນຄະນະພັກຮາກຖານ ແລະ ອະນຸມັດສ້າງຕັ້ງໜ່ວຍພັກຂຶ້ນກັບຄະນະພັກຮາກຖານ ສພຂ ຈໍານວນ 03 ໜ່ວຍພັກຄື: ໜ່ວຍພັກຄະນະເລຂາທິການ ສພຂ, ໜ່ວຍພັກຄະນະກໍາມະການຍຸກຕິທໍາ ແລະ ປກຊ-ປກສ ແລະ ໜ່ວຍພັກຄະນະກໍາມະການເສດຖະກິດ ແລະ ວັດທະນະທໍາ-ສັງຄົມ. ພ້ອມທັງບົ່ງຕົວແຕ່ງຕັ້ງຄະນະພັກຮາກຖານ ສພຂ, ຄະນະໜ່ວຍພັກ ເຊິ່ງປະກອບມີສະຫາຍເລຂາ, ຮອງເລຂາ, ປະທານກວດກາ ແລະ ຮອງປະທານກວດກາຄະນະພັກຮາກຖານ ສພຂ.

ນອກຈາກນີ້, ກອງປະຊຸມຍັງໄດ້ຮັບຟັງກ່ຽວກັບຮ່າງບົດສະຫຼຸບການເຄື່ອນໄຫວວຽກງານ 05 ປີ 2016-2020 ຂອງໜ່ວຍພັກຮາກຖານ ສພຂ ແລະ ທິດທາງແຜນການ 05 ປີ 2021-2025 ຂອງຄະນະພັກຮາກຖານ ສພຂ ແລະ ຮ່າງບົດສະຫຼຸບການເຄື່ອນໄຫວວຽກງານປະຈໍາປີ 2021 ແລະ ທິດທາງແຜນການເຄື່ອນໄຫວ ປະຈໍາປີ 2022 ຂອງຄະນະພັກຮາກຖານ ສພຂ. ຈາກນັ້ນ, ບັນດາຜູ້ແທນກອງປະຊຸມຍັງພ້ອມກັນປະກອບຄໍາຄິດເຫັນໃສ່ຮ່າງບົດສະຫຼຸບຢ່າງມີຈຸດສຸມ.

ໂອກາດດັ່ງກ່າວ ສະຫາຍ ດົງເພັດ ພະຍົນ ຮອງເລຂາພັກແຂວງ ໄດ້ໃຫ້ກຽດໂອ້ລົມຕໍ່ພິທີ ເຊິ່ງສະຫາຍໄດ້ຍົກໃຫ້ເຫັນພາລະບົດບາດ ແລະ ຄວາມສໍາຄັນຂອງການສ້າງຕັ້ງຄະນະພັກຮາກຖານ ກໍຄືບັນດາໜ່ວຍພັກທີ່ຂຶ້ນກັບຄະນະພັກຮາກຖານ ສພຂ ພ້ອມທັງເນັ້ນໜັກໃຫ້ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກທຸກສະຫາຍ ຈົ່ງພ້ອມກັນເປັນເຈົ້າການຈັດຕັ້ງເຄື່ອນໄຫວຕາມລະບຽບການຂອງພັກຢ່າງເຂັ້ມງວດ ໂດຍຢຶດໝັ້ນຕາມ 03 ທິດຊີ້ນໍາ ແລະ 05 ຫຼັກການຂອງພັກເປັນສໍາຄັນ.

ພ້ອມກັນນັ້ນ, ກໍສືບຕໍ່ຕິດຕາມກວດກາບັນດາຄາດໝາຍທີ່ມະຕິກອງປະຊຸມໃຫຍ່ຄັ້ງທີ XI ຂອງພັກ ກໍຄື ມະຕິຄັ້ງທີ X ຂອງອົງຄະນະພັກແຂວງ ວາງອອກ ໄປຄຽງຄູ່ກັບວຽກງານຂະບວນການ ໂດຍເຍືອງໃສ່ການຈັດຕັ້ງປະຕິບັດ 04 ບຸກທະລຸ, ສືບຕໍ່ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ເພື່ອຊຸກຍູ້ວຽກງານອື່ນໆທີ່ກ່ຽວຂ້ອງກັບພາລະບົດບາດ, ສິດ ແລະ ໜ້າທີ່ ແລະ ຄວາມຮັບຜິດຊອບຂອງສະພາປະຊາຊົນແຂວງໃຫ້ໄດ້ຮັບຜົນສໍາເລັດເປັນຢ່າງດີ.