(ສພຊ) ວັນທີ 5 ທັນວາ 2023 ທີ່ຫໍສະພາແຫ່ງຊາດ ນະຄອນຫຼວງວຽງຈັນ ໄດ້ມີພິທີມອບ-ຮັບເງິນ ຈຳນວນ 500 ລ້ານກີບ ຈາກບໍລິສັດ ສະຕາໂທລະຄົມ ມອບໃຫ້ແກ່ສະພາແຫ່ງຊາດ ເພື່ອປະກອບສ່ວນຊຸກຍູ້ກອງປະຊຸມສຸດຍອດລັດຖະສະພາກໍາປູເຈຍ-ລາວ-ຫວຽດນາມ (CLV) ຄັ້ງທີ 1 ທີ່ສະພາແຫ່ງຊາດລາວ ເປັນເຈົ້າພາບ ເຊິ່ງໄດ້ຈັດຂຶ້ນໃນລະຫວ່າງວັນທີ 4-7 ທັນວາ 2023 ໂດຍການກ່າວມອບຂອງທ່ານ ຫງຽນ ງັອກ ລອງ ຕາງໜ້າຄະນະອຳນວຍການບໍລິສັດ ສະຕາໂທລະຄົມ ແລະ ກ່າວຮັບໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ພ້ອມດ້ວຍພາກສ່ວນກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ, ທ່ານ ປອ. ບຸນທັນ ບຸນວິໄລ ໄດ້ກ່າວສະແດງຄວາມຂອບໃຈ ທີ່ທາງບໍລິສັດ ສະຕາ ໂທລະຄົມ ໄດ້ປະກອບສ່ວນຊຸກຍູ້ ແລະ ໃຫ້ການສະໜັບສະໜູນໃນຄັ້ງນີ້; ພ້ອມນັ້ນ, ຍັງໄດ້ຕາງໜ້າໃຫ້ຄະນະເລຂາທິການສະພາແຫ່ງຊາດ ມອບໃບຍ້ອງຍໍຂອງຄະນະປະຈຳສະພາແຫ່ງຊາດ ໃຫ້ບໍລິສັດ ສະຕາໂທລະຄົມ ທີ່ມີຜົນງານດີເດັ່ນໃນການປະກອບສ່ວນຊຸກຍູ້ ແລະ ອຸປະຖຳໃນຄັ້ງນີ້.

(ພາບ ແລະ ຂ່າວ: ນາງ ສຸພາວັນ ຫອມສະນິດ)