ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າຂອງວັນທີ 3 ຕຸລາ 2022 ທີ່ສະພາແຫ່ງຊາດ ນະຄອນຫຼວງວຽງຈັນ, ບໍລິສັດ ຈະເລີນເຊກອງ ພະລັງງານ ຈຳກັດ (CSE) ຕາງໜ້າໂດຍທ່ານ ສີຫຸນ ສິດທິລືໄຊ ຮອງປະທານອາວຸໂສ ຊີ້ນໍາວຽກງານຫ້ອງການ-ບໍລິຫານຂອງ ບໍລິສັດ CSE ໄດ້ມອບເຄື່ອງອຸປະກອນຮັບໃຊ້ພາຍໃນຫ້ອງປະຊຸມໃຫ້ແກ່ສະພາແຫ່ງຊາດ ຕາງໜ້າຮັບໂດຍທ່ານ ນາງ ທັດສະດາພອນ ຈັນທະມາດ ຮອງປະທານກຳມາທິການບັນດາເຜົ່າ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງເຊກອງ ເພື່ອນຳໄປມອບຕໍ່ໃຫ້ສະພາປະຊາຊົນແຂວງເຊກອງ ແລະ ສະພາປະຊາຊົນແຂວງອັດຕະປື ເຂົ້າຮ່ວມເປັນສັກຂີພິຍານມີພາກສ່ວນກ່ຽວຂ້ອງຂອງສອງຝ່າຍ.
ໂອກາດດຽວກັນ, ທ່ານ ນາງ ທັດສະດາພອນ ຈັນທະມາດ ໄດ້ສະແດງຄວາມຂອບໃຈເປັນຢ່າງສູງ ທີ່ບໍລິສັດ CSE ໄດ້ໃຫ້ການຊ່ວຍເຫຼືອຕໍ່ສະພາແຫ່ງຊາດເວົ້າລວມ, ເວົ້າສະເພາະແມ່ນການຊ່ວຍເຫຼືອສະພາປະຊາຊົນແຂວງເຊກອງ ແລະ ແຂວງອັດຕະປື ໂອກາດດັ່ງກ່າວ, ທ່ານ ນາງ ທັດສະດາພອນ ຈັນທະມາດ ຕາງໜ້າໃຫ້ຄະນະປະຈຳສະພາແຫ່ງຊາດ ມອບໃບຍ້ອງຍໍໃຫ້ແກ່ບໍລິສັດ ຈະເລີນເຊກອງ ພະລັງງານ ຈຳກັດ ໂດຍແມ່ນທ່ານ ສີຫຸນ ສິດທິລືໄຊ ເປັນຜູ້ຮັບ ພ້ອມດຽວກັນນີ້, ທ່ານ ສີຫຸນ ສິດທິລືໄຊ ຕາງໜ້າ ບໍລິສັດ ຈະເລີນເຊກອງ ພະລັງງານ ຈໍາກັດ ກໍໄດ້ສະແດງຄວາມດີໃຈທີ່ໄດ້ປະກອບສ່ວນເຂົ້າໃນວຽກງານລວມຂອງສະພາແຫ່ງຊາດ ກໍຄືສະພາປະຊາຊົນທັງສອງແຂວງ ແລະ ສະແດງຄວາມຮູ້ບຸນຄຸນຕໍ່ການນຳຂອງທັງສອງແຂວງ ທີ່ໄດ້ສ້າງເງື່ອນໄຂອຳນວຍຄວາມສະດວກດ້ານຕ່າງໆ ໃຫ້ແກ່ການດຳເນີນໂຄງການຂອງຕົນ
(ພາບ ແລະ ຂ່າວ: ນາງ ປາກາລັກ ພົມມີໄຊ)