ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອເປັນການສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ໃນວັນທີ 29 ກໍລະກົດ 2022ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ໃຫ້ສໍາພາດຕໍ່ສື່ມວນຊົນ ຂອງສະພາແຫ່ງຊາດ ແຫ່ງ ສສ.ຫວຽດນາມ ວ່າ: ໃນນາມຕາງໜ້າໃຫ້ສະພາແຫ່ງຊາດ ແຫ່ງ ສປປ ລາວ ກໍຄືໃນນາມສ່ວນຕົວ, ມີຄວາມພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ໃຫ້ສຳພາດຕໍ່ໂທລະພາບສະພາແຫ່ງຊາດ ສສ.ຫວຽດນາມ ກ່ຽວກັບບົດບາດຄວາມສໍາຄັນ ແລະ ຄວາມໝາຍຍຸດທະສາດ ຂອງສາຍພົວພັນອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ປະທານ ໂຮ່ ຈິ ມິ່ງ ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາຮົບຮັກ ຂອງພວກເຮົາ ຮ່ວມກັນສ້າງຕັ້ງ ແລະ ພ້ອມກັນປົກປັກຮັກສາ, ທະນຸຖະໜອມ ແລະ ເພີ່ມພູນຄູນສ້າງຈາກບັນດາຮຸ່ນຄົນ ຂອງສອງຊາດພວກເຮົາ ໃຫ້ນັບມື້ນັບກ້າວເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.

ສະຫາຍ ຍັງໃຫ້ຮູ້ຕື່ມວ່າ: ຄວາມສຳຄັນ ແລະ ຄວາມໝາຍຍຸດທະສາດ ຂອງສາຍພົວພັນ ລະຫວ່າງ ສອງຊາດລາວ-ຫວຽດນາມ, ຫວຽດນາມ-ລາວ ໃນປະຫວັດສາດ ກໍຄືປັດຈຸບັນນັ້ນກໍຄື ສອງປະເທດພວກເຮົາ ໄດ້ສາມັກຄີຮ່ວມສຳພັນສູ້ຮົບ ດ້ວຍຄວາມສັດຊື່ ແລະ ບໍລິສຸດຜຸດຜ່ອງ, ສະໜັບສະໜູນອູ້ມຊູຊ່ວຍເຫຼືອ ໃຫ້ກັນ ແລະກັນ ທາງວັດຖຸ, ຈິດໃຈ ແລະ ສ້າງເງື່ອນໄຂອຳນວຍຄວາມສະດວກ ເຊິ່ງກັນ ແລະ ກັນ ອັນເປັນປັດໄຈຕັດສິນໄຊຊະນະ ໃນພາລະກິດປະຕິວັດ ຂອງທັງສອງຊາດລາວ-ຫວຽດນາມ. ມູນເຊື້ອຄວາມສາມັກຄີຊ່ວຍເຫຼືອ ເຊິ່ງກັນ ແລະກັນ ດັ່ງກ່າວ ໄດ້ສະທ້ອນໃຫ້ເຫັນໃນຄໍາເວົ້າທີ່ວ່າ ເຂົ້າເມັດຫັກ ຜັກເສັ້ນດຽວກໍ່ແບ່ງກັນກິນ.

ໃນປັດຈຸບັນ ເຖິງແມ່ນວ່າ ສະພາບການພາກພື້ນ ແລະ ສາກົນ ຈະມີການຜັນແປໄປຢ່າງສັບສົນ ແລະ ສະຫຼັບສັບຊ້ອນປານໃດກໍຕາມ, ແຕ່ພັກ, ລັດ ແລະ ປະຊາຊົນລາວ ສືບຕໍ່ຍຶດໝັ້ນຮ່ວມກັບພັກ, ລັດຖະບານ ແລະ ປະຊາຊົນຫວຽດນາມ ປົກປັກຮັກສາ, ທະນຸຖະໜອມ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຫາໄດ້ຍາກ ໃນທຸກຂົງເຂດ ຂອງການເມືອງ, ເສດຖະກິດ, ວັດທະນະທຳ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ, ການສຶກສາ,ທ່ອງທ່ຽວ ແລະ ອື່ນໆ. ນອກນີ້, ຍັງມີການພົວພັນຮ່ວມມືຢ່າງໜັກແໜ້ນ ໃນການເຄື່ອນໄຫວໃນເວທີພາກພື້ນ ແລະ ສາກົນ, ທັງໝົດທີ່ກ່າວມານັ້ນ ກໍເພື່ອຜົນປະໂຫຍດຂອງປະຊາຊົນ ສອງປະເທດ, ເພື່ອສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ໃນໂລກ.

ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ໄດ້ມີການພົວພັນຮ່ວມມືນໍາກັນ ມາແຕ່ດົນນານ, ປະກອບສ່ວນຢ່າງຕັ້ງໜ້າ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ ຢ່າງມີຜົນສຳເລັດ ໃນຫຼາຍດ້ານ ເປັນຕົ້ນ ສອງຝ່າຍ ຈັດຕັ້ງຜັນຂະຫຍາຍບົດບັນທຶກການຮ່ວມມື ລະຫວ່າງ ສອງສະພາແຫ່ງຊາດ ແລະ ສອງຫ້ອງວ່າການ ໃນນັ້ນ, ໄດ້ມີການແລກປ່ຽນຄະນະຜູ້ແທນໃນທຸກລະດັບ ນັບແຕ່ລະດັບປະທານສະພາແຫ່ງຊາດ, ກຳມາທິການ, ຄະນະເລຂາທິການ ຈົນເຖິງວິຊາການ, ແຕ່ສູນກາງ ຈົນເຖິງສະພາເຂດເລືອກຕັ້ງ ຂອງບັນດາທ້ອງຖິ່ນ, ຮ່ວມກັນຈັດຕັ້ງກອງປະຊຸມສຳມະນາແລກປ່ຽນບົດຮຽນ ກ່ຽວກັບການຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ ເປັນຕົ້ນ ການພິຈາລະນາຮັບຮອງແຜນການສ້າງ ແລະ ປັບປຸງກົດໝາຍ, ການຕົກລົງບັນຫາສຳຄັນພື້ນຖານຂອງຊາດ, ແຜນພັດທະນາເສດຖະກິດ-ສັງຄົມ ແລະ ອື່ນໆ. ຮ່ວມກັນຕິດຕາມກວດກາ ການຈັດຕັ້ງປະຕິບັດສັນຍາ, ສົນທິສັນຍາ ແລະ ຂໍ້ຕົກລົງ ລວມທັງບັນດາໂຄງການການຮ່ວມມື ແລະ ໂຄງການຊ່ວຍເຫຼືອລ້າ ລະຫວ່າງ ສອງລັດຖະບານ. ສອງຝ່າຍ ຍັງໃຫ້ການຮ່ວມມືສະໜັບສະໜູນ ເຊິ່ງກັນ ແລະ ກັນຢ່າງແໜ້ນແຟ້ນ ໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນ AIPA, APPF, IPU, ASEP, APF ແລະ ອື່ນໆ ນອກນີ້, ກໍຍັງມີການຮ່ວມມືໃນອບ CLV ິ່ງສະພາແຫ່ງຊາດລາວ ຈະເປັນເຈົ້າພາບໃນປີ 2023ແລະ ຈະຍົກລະດັບ CLV ຈາກລະດັບກຳມາທິການ ເປັນລະດັບປະທານສະພາແຫ່ງຊາດ ໃຫ້ສົມຄູ່ກັບເບື້ອງລັດຖະບານ.

ສຳລັບທິດທາງແຜນການຮ່ວມມືໃນຕໍ່ໜ້າ ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ມີດັ່ງນີ້:

1. ສືບຕໍ່ຈັດຕັ້ງປະຕິບັດບົດບັນທຶກ ວ່າດ້ວຍການຮ່ວມມື ລະຫວ່າງ ສະພາແຫ່ງຊາດ, ສອງຫ້ອງວ່າການ ແລະ ສອງກຳມາທິການບັນດາເຜົ່າ ໃຫ້ໄດ້ຮັບຜົນສຳເລັດຢ່າງຈົບງາມ;
2. ຮ່ວມກັນຈັດຕັ້ງສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ ລະຫວ່າງ ສອງສະພາແຫ່ງຊາດ;
3. ສືບຕໍ່ແລກປ່ຽນຄະນະຜູ້ແທນ, ແລກປ່ຽນບົດຮຽນ, ຈັດຕັ້ງກອງປະຊຸມສຳມະນາ;
4. ສືບຕໍ່ຮ່ວມກັນຊຸກຍູ້ ແລະ ຕິດຕາມກວດກາບັນດາສັນຍາ, ສົນທິສັນຍາ, ຂໍ້ຕົກລົງ, ບັນດາໂຄງການລົງທຶນ ແລະ ຊ່ວຍເຫຼືອ ລະຫວ່າງ ສອງລັດຖະບານ.

ໃນຊີວິດເຍົາໄວ, ຂ້າພະເຈົ້າ ໄດ້ອາສຢູ່ກັບຄອບຄົວ ແລະ ໄດ້ເຂົ້າສຶກສາຮໍ່າຮຽນ ຢູ່ ສສ.ຫວຽດນາມ, ໃກ້ຊິດຕິດແທດກັບປະຊາຊົນຫວຽດນາມອ້າຍນ້ອງເປັນພິເສດ. ບິດາ ຂອງຂ້າພະເຈົ້າ ກໍໄດ້ເຮັດວຽກຮ່ວມກັບປະທານ ໂຮ່ ຈິ ມິທີ່ແສນເຄົາລົບຮັກ ໄດ້ກໍ່ຕັ້ງມູນເຊື້ອສາຍພົວພັນຄວາມສາມັກຄີພິເສດ, ໄດ້ຄຽງບ່າຄຽງໄຫຼ່, ຕໍ່ສູ້ ແລະ ເສຍສະຫຼະຮ່ວມກັນກັບການນໍາທຸກຮຸ່ນ ແລະ ປະຊາຊົນສອງຊາດລາວ-ຫວຽດນາມ ໃນການຮ່ວມັນຕໍ່ສູ້ກູ້ຊາດ ເພື່ອຍາດເອົາເອກະລາດແລະ ເສລີພາບໃນເມື່ອກ່ອນ ກໍຄືປົກປັກຮັກສາ ແລະ ສ້າງສາປະເທດຊາດ ໃນປັດຈຸບັນ. ຂ້າພະເຈົ້າ ຍັງຈື່ໄດ້ວ່າ ເພິ່ນເຄີຍສັ່ງສອນໃຫ້ຮຽນຮູ້ ກ່ຽວກັບແບບແຜນການດຳລົງຊີວິດ, ດຸໝັ່ນອົດທົນ, ມີນໍ້າໃຈສາມັກຄີປອງດອງ, ຮັກເຊື້ອແພງຊາດ, ເຊື່ອມສານນໍ້າໃຈຂອງປະຊາຊົນລາວ-ຫວຽດນາມ ແລະ ຮັກສາມູນເຊື້ອວິລະຊົນປະຕິວັດ ຂອງສາຍພົວພັນແບບພິເສດ ລະຫວ່າງ ລາວຫວຽດນາມ ດັ່ງທີ່ປະທານ ສຸພານຸວົງ ໄດ້ກ່າວໄວ້ວ່າ: ສາຍພົວພັນພິເສດລາວ-ຫວຽດນາມ ສູງກວ່າພູຜາໃດໆ, ຍາວກວ່າແມ່ນໍ້າທຸກສາຍ, ກວ້າງໃຫຍ່ກວ່າມະຫາສະໝຸດ, ສວຍງາມກວ່າດວງເດືອນໃນວັນເພັງ, ຫອມກວ່າດອກໄມ້ທີ່ຫອມທີ່ສຸດ. ສາຍພົວພັນທີ່ບໍລິສຸດຜຸດຜ່ອງ ລະຫວ່າງ ສອງພັກ, ສອງປະເທດ ໄດ້ກາຍເປັນສາຍພົວພັນທີ່ເປັນແບບຢ່າງ ແລະ ຫາຍາກທີ່ສຸດຢູ່ໃນໂລກ, ປະທານ ໄກສອນ ພົມວິຫານ ໄດ້ຢືນຢັນຫຼາຍເທື່ອວ່າ: ໃນປະຫວັດສາດຂອງການປະຕິວັດໂລກ ກໍໄດ້ມີຫຼາຍແບບຢ່າງທີ່ເປັນແວ່ນແຍງໃຫ້ເຫັນເຖິງນໍ້າໃຈກໍາມະຊີບສາກົນ, ແຕ່ບໍ່ມີບ່ອນແລະ ບໍ່ມີຄວາມສາມັກຄີໃດ, ສໍາພັນທະມິດຕໍ່ສູ້ໃດພິເສດ, ຍາວນານ ແລະ ຮອບດ້ານ ແບບນີ້; ປະທານ ໂຮ່ ມິ່ງ ຍັງເວົ້າເລື້ອຍວ່າ: ຫວຽດນາມ ແລະ ລາວພວກເຮົາ, ຮັກແພງກັນເລິກເຊິ່ງກວ່າ ແມ່ນໍ້າຮົ່ງ ແລະ ແມ່ນໍ້າຂອງ.

ດ້ວຍຄໍາສັ່ງສອນຂອງເພິ່ນ ແລະ ບວກກັບຊິວີດການເຄື່ອນໄຫວເຮັດວຽກ ຂອງຕົນ, ຂ້າພະເຈົ້າ ໄດ້ພົວພັນ ແລະໃກ້ຊິດຕິດແທດກັບຫວຽດນາມ ມາຕະຫຼອດ ເຮັດໃຫ້ຂ້າພະເຈົ້າ ຮູ້ສຶກມີຄວາມຜູກພັນກັບປະຊາຊົນຫວຽດນາມອ້າຍນ້ອງຫຼາຍທີ່ສຸດ ຄ້າຍກັບວ່າເກີດມາຈາກທ້ອງແມ່ດຽວກັນ, ແນວຄິດຂອງຜູ້ນໍາທີ່ແສນເຄົາລົບຮັກທັງສອງທ່ານ ຍັງຄົງເປັນເຂັມທິດເຍືອງທາງ ໃຫ້ແກ່ຂ້າພະເຈົ້າ ໃນການມີແບບແຜນວິທີເຮັດວຽກທີ່ດີ ແລະ ສືບຕໍ່ທະນຸຖະໜອມ ຖ່າຍທອດສາຍພົວພັນທີ່ເປັນມູນເຊື້ອອັນບໍລິສຸດຜຸດຜ່ອງ,ກ້ຊິດ ທີ່ມີໜຶ່ງດຽວໃນໂລກນີ້ ໃຫ້ຄົນຮຸ່ນຫຼັງໄດ້ເຂົ້າອົກເຂົ້າໃຈ ແລະ ສືບທອດສາຍພົວພັນດັ່ງກ່າວ ໄປຕະຫຼອດກາລະນານ.