ໃນໂອກາດທີ່ເຂົ້າຮ່ວມກອງປະຊຸມຄົບຄະນະຂອງກໍາມາທິການການຕ່າງປະເທດ ປະຈໍາປີ 2023 ເມື່ອກາງເດືອນທັນວາຜ່ານມາ, ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານຄະນະປະຈໍາສະພາແຫ່ງຊາດ ຜູ້ຊີ້ນຳວຽກງານການຕ່າງປະເທດ ໄດ້ມີຄໍາເຫັນຊີ້ນຳເພື່ອຮັບປະກັນການຈັດຕັ້ງປະຕິບັດທິດທາງແຜນການປີ 2024 ແລະການປະຕິບັດພາລະບົດບາດ, ສິດ ແລະ ໜ້າທີ່ຂອງກໍາມາທິການການຕ່າງປະເທດໃນຕໍ່ໜ້າ ໂດຍທ່ານໄດ້ສະເໜີແລກປ່ຽນບາງບັນຫາດັ່ງນີ້:

1. ໃນສະພາບການພາກພື້ນ ແລະສາກົນ ມີຄວາມສັບສົນສະຫຼັບຊັບຊ້ອນ ບວກໃສ່ຄວາມຫຍຸ້ງຍາກຢູ່ພາຍໃນປະເທດຄືປັດຈຸບັນ, ເຫັນວ່າວຽກງານສຶກສາອົບຮົມການເມືອງ-ແນວຄິດໃຫ້ພະນັກງານມີຄວາມໜັກແໜ້ນດ້ານຫຼັກໝັ້ນການເມືອງ, ມີຄວາມທຸ່ນທ່ຽງອຸ່ນອຽນ, ມີຄຸນສົມບັດສິນທໍາປະຕິວັດ; ເພີ່ມທະວີຄວາມສາມັກຄີຢ່າງໜັກແໜ້ນ ແລະ ຄວາມເປັນເອກະພາບສູງຕໍ່ແນວທາງຂອງພັກ-ລັດ; ມີຫົວຄິດປະດິດສ້າງໃນການປະຕິບັດໜ້າທີ່ການເມືອງຂອງກໍາມາທິການການຕ່າງປະເທດ ແມ່ນມີຄວາມຈໍາເປັນ ແລະສໍາຄັນຫຼາຍ.

2. ສືບຕໍ່ປັບປຸງກົນໄກປະສານງານ, ລະບອບແບບແຜນວິທີເຮັດວຽກ ໃຫ້ທັນສະໄໝ, ສອດຄ່ອງກັບເງື່ອນໄຂ ແລະສະພາບຕົວຈິງຂອງປະເທດເຮົາໃນໄລຍະໃໝ່; ເອົາໃຈໃສ່ປັບປຸງກົນໄກປະສານສົມທົບເປັນຢ່າງດີກັບຄະນະເລຂາ ທິການ, ບັນດາກໍາມາທິການພາຍໃນສະພາແຫ່ງຊາດ, ກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ບັນດາກະຊວງຕ່າງໆຂອງລັດຖະບານ ແລະກົງຈັກການຈັດຕັ້ງຂອງພັກ-ລັດຢູ່ສູນກາງ ແລະທ້ອງຖິ່ນ ໃນການເຄື່ອນໄຫວວຽກງານການຕ່າງປະເທດ ໃຫ້ມີຄວາມເປັນເອກະພາບໃນການເອົາທັດສະນະຕ່າງໆຕໍ່ບັນຫາພາກພື້ນ ແລະສາກົນທີ່ມີຄວາມລະອຽດອ່ອນ; ມີການສະຫຼຸບຖອດຖອນບົດຮຽນໃນແຕ່ລະບັ້ນການເຄື່ອນໄຫວການຕ່າງປະເທດທີ່ສໍາຄັນ.

3. ສືບຕໍ່ຜັນຂະຫຍາຍແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ ໃຫ້ເປັນແຜນອັນລະອຽດ ເຊິ່ງກອງປະຊຸມໃຫຍ່ຄັ້ງທີ 4 ຂອງອົງຄະນະພັກສະພາແຫ່ງຊາດ ກໍໄດ້ກໍານົດບັນດາແຜນງານ, ໂຄງການລະອຽດ ຕະ ຫຼອດໄລຍະສະໄໝທີ IV ແລ້ວ; ປະຕິບັດກົນໄກລາຍງານ ແລະຂໍທິດຊີ້ນໍາຢ່າງເປັນປະຈໍາຈາກກົມການເມືອງສູນກາງພັກ, ຄະນະເລຂາທິການສູນກາງພັກ ແລະຄະນະປະຈໍາສະພາແຫ່ງຊາດ ໃນການເຄື່ອນໄຫວຕ່າງປະເທດທີ່ສໍາຄັນ.

4. ຍົກສູງຄວາມຮັບຜິດຊອບໃນການຈັດຕັ້ງປະຕິບັດພາລະບົດບາດຂອງສະພາແຫ່ງຊາດ, ເຂົ້າຮ່ວມແຕ່ຫົວທີໃນການສ້າງ ແລະປັບປຸງກົດໝາຍ, ບັນດານິຕິກໍາໃຕ້ກົດໝາຍ ແລະບັນດາແຜນຍຸດທະສາດຕ່າງໆໃນຂົງເຂດວຽກງານການຕ່າງປະເທດ.

5. ເອົາໃຈໃສ່ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະນິຕິກໍາໃຕ້ກົດໝາຍ ຕາມພາ ລະບົດບາດຂອງສະພາແຫ່ງຊາດໃນຂົງເຂດວຽກງານການຕ່າງປະເທດຢູ່ສູນກາງ ແລະທ້ອງຖິ່ນໃນຂອບເຂດທົ່ວປະ ເທດ; ສ້າງແຜນການຕິດຕາມກວດກາການຈັດຕັ້ງປະຕິບັດຂໍ້ຕົກລົງ, ສັນຍາ ແລະສົນທິສັນຍາ ລະຫວ່າງ ສປປລາວ ກັບ ຕ່າງປະເທດ ກ່ຽວກັບການຄ້າ, ການລົງທຶນຂອງຕ່າງປະເທດ ໂດຍສະເພາະບັນດາໂຄງການທີ່ມີຜົນກະທົບເຊັ່ນ: ບັນຫາຊາຍແດນ, ການຄຸ້ມຄອງດ່ານຊາຍແດນ, ການເຂົ້າ-ອອກເມືອງ, ແຮງງານຕ່າງດ້າວ, ສິດທິມະນຸດ, ສະພາບການແກ້ໄຂຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະສ້າງຄອບຄົວບໍ່ຖືກລະບຽບ ຕາມບໍລິເວນຊາຍແດນ; ສະເໜີລັດຖະບານ ພິຈາ ລະນາໃນການແກ້ໄຂບັນຫາສະໜອງງົບປະມານໃຫ້ແກ່ໂຄງການບຸລິມະສິດໃນການສ້າງກັນຕາຝັ່ງເຈື່ອນຢູ່ 9 ແຂວງທີ່ມີຄວາມສ່ຽງຕໍ່ການເສຍດິນແດນນັບມື້ນັບຫຼາຍ; ສະເໜີໃຫ້ມີການຢຸດຕິການຂຸດຄົ້ນ ແລະຂາຍຫີນພູ, ຫີນຊາຍ ໃຫ້ຕ່າງ ປະເທດດັ່ງຜ່ານມາ; ສະເໜີກະຊວງການຕ່າງປະເທດ ມີທິດທາງແກ້ໄຂບັນຫາອໍານວຍຄວາມສະດວກກວ່າເກົ່າໃນການເຮັດປັດສະປໍ ແລະວີຊາ ອາດຈະໃຫ້ພະແນກຕ່າງປະເທດຂອງແຂວງເປັນຜູ້ສໍາພາດ ຫຼືອາດມີໜ່ວຍງານສໍາພາດເຄື່ອນທີ່ເພື່ອຫຼຸດຜ່ອນຄວາມບໍ່ສະດວກຂອງປະຊາຊົນ.

6. ເປັນເຈົ້າການໃນການເສີມຂະຫຍາຍການພົວພັນຮ່ວມມືກັບລັດຖະສະພາປະເທດເພື່ອນມິດຍຸດທະສາດ, ປະ ເທດເພື່ອນມິດໃນພາກພື້ນ ແລະສາກົນ ດ້ວຍການແລກປ່ຽນຄະນະຜູ້ແທນ, ແລກປ່ຽນບົດຮຽນທີ່ພົວພັນກັບການປະ ຕິບັດພາລະບົດບາດດ້ານນິຕິບັນຍັດ ແລະຫົວຂໍ້ອື່ນໆຕາມຄວາມຕ້ອງການ ແລະຄວາມຈໍາເປັນຂອງພວກເຮົາ; ເປັນເຈົ້າການໃນການຕ້ອນຮັບຄະນະຜູ້ແທນລັດຖະສະພາຕ່າງປະເທດທີ່ມາຢ້ຽມຢາມ ແລະເຮັດວຽກຢູ່ ສປປລາວ ແລະອໍານວຍຄວາມສະດວກໃຫ້ແກ່ຄະນະນໍາຂອງສະພາແຫ່ງຊາດໃນການຕ້ອນຮັບແຂກຕ່າງປະເທດ; ສ້າງເງື່ອນໄຂໃຫ້ແກ່ຄະ ນະມິດຕະພາບລັດຖະສະພາລະຫວ່າງສະພາແຫ່ງຊາດລາວ ກັບລັດຖະສະພາຕ່າງປະເທດ ໄດ້ມີການເຄື່ອນໄຫວເຮັດວຽກຮ່ວມກັນ; ເອົາໃຈໃສ່ຈັດຕັ້ງຜັນຂະຫຍາຍບັນດາບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ກັບລັດຖະສະພາຕ່າງປະເທດ ໃຫ້ເປັນຮູບປະທໍາ ໂດຍສະເພາະແມ່ນການເຜີຍແຜ່ຜົນສໍາເລັດຂອງກອງປະຊຸມສຸດຍອດລັດຖະສະພາ ກໍາປູເຈຍ-ລາວ-ຫວຽດນາມ (CLV) ຄັ້ງທີ 1 ໃຫ້ທົ່ວເຖິງ ແລະການຈັດຕັ້ງປະຕິບັດຖະ ແຫຼງການຮ່ວມທີ່ປະທານສະພາແຫ່ງຊາດ 3 ປະເທດ ໄດ້ລົງນາມຮ່ວມກັນ; ສືບຕໍ່ຍາດແຍ່ງການຊ່ວຍເຫຼືອທາງດ້ານທຶນ ຮອນ, ວັດຖຸອຸປະກອນ ກໍຄືການສ້າງຄວາມເຂັ້ມແຂງທາງດ້ານວິຊາການ ແລະອື່ນໆ.

7. ເປັນເຈົ້າການໃນການຄົ້ນຄວ້າເພື່ອເຂົ້າຮ່ວມເຄື່ອນໄຫວໃນກອງປະຊຸມອົງການລັດຖະສະພາພາກພື້ນ ແລະ ສາ ກົນຢ່າງມີຈຸດສຸມ ແລະຕາມຄວາມສາມາດດ້ານງົບປະມານ, ປະສານສົມທົບຢ່າງໃກ້ຊິດກັບສໍານັກງານເລຂາທິການໃຫຍ່ໄອປາ ໃນການກະກຽມຄວາມພ້ອມຮອບດ້ານໃຫ້ແກ່ການເປັນເຈົ້າພາບຈັດກອງປະຊຸມ AIPA ຄັ້ງທີ 45 ແລະກອງປະ ຊຸມປິ່ນອ້ອມ ໂດຍມີການປະສານສົມທົບຢ່າງໃກ້ຊິດກັບກະຊວງການຕ່າງປະເທດ ທັງດ້ານເນື້ອໃນ, ດ້ານພິທີການບໍລິ ຫານຕ່າງໆ ໃຫ້ມີຄວາມກົມກຽວກັນ; ພ້ອມທັງກະກຽມເປັນເຈົ້າພາບຈັດກອງປະຊຸມລະດັບກໍາມາທິການຂອງສະມັດ ຊາລັດຖະສະພາລະຫວ່າງຊາດທີ່ໃຊ້ພາສາຝຣັ່ງ ທີ່ ສປປລາວ.

8. ສືບຕໍ່ຕິດຕາມຄົ້ນຄວ້າສະພາບການ ແລະບັນຫາພົ້ນເດັ່ນໃນພາກພື້ນ ແລະສາກົນ, ອົງການລັດຖະສະພາຕ່າງໆ ແລະຄົ້ນຄວ້າທັດສະນະຂອງສະພາແຫ່ງຊາດລາວຕໍ່ບັນຫາລະອຽດອ່ອນ ລວມທັງບັນດາຂໍ້ສະເໜີຕ່າງໆທີ່ຂໍການສະໜັບສະໜູນ ໂດຍປະສານສົມທົບແໜ້ນກັບກະຊວງການຕ່າງປະເທດ.

9. ສູ້ຊົນໃຫ້ບັນດາກົມວິຊາການ ຫຼືຖັນແຖວພະນັກງານ ສືບຕໍ່ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ຕໍ່ວຽກງານທີ່ໄດ້ຮັບມອບໝາຍ ແລະສຸມສະຕິປັນຍາຫົວຄິດປະດິດສ້າງເຂົ້າໃນວຽກງານຕົວຈິງ, ຝຶກທັກສະ ແລະ ບົດ ຮຽນການຂີດຂຽນເອກະສານທາງການ ໃຫ້ນັບມື້ນັບມີຄວາມໜັກແໜ້ນຮັດກຸມ.