ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 5 ພະຈິກຜ່ານມາ, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປລາວ ໄດ້ຊີ້ແຈງ ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ກ່ຽວກັບການຈັດຕັ້ງປະຕິບັດເເຜນພັດທະນາເສດຖະກິດ-ສັງຄົມເເຫ່ງຊາດ, ເເຜນງົບປະມານເເຫ່ງລັດ, ເເຜນເງິນຕາ ປະຈໍາປີ 2021 ເເລະ ເເຜນການ ປະຈໍາປີ 2022 ວ່າ: ຕາງໜ້າໃຫ້ລັດຖະບານ ຊຸດທີ IX ກໍຄືໃນນາມສ່ວນຕົວ, ຂໍສະແດງຄວາມຂອບໃຈແລະ ຕີລາຄາສູງ ຕໍ່ການປະກອບຄໍາເຫັນຂອງຄະນະປະຈໍາສະພາແຫ່ງຊາດ ກໍຄືຂອງບັນດາທ່ານສະມາຊິກສະພາແຫ່ງຊາດ ເຊິ່ງເປັນຕົວແທນໃຫ້ປະຊາຊົນລາວບັນດາເຜົ່າ ຢູ່ໃນເຂດເລືອກຕັ້ງຂອງຕົນທົ່ວປະເທດ ຕໍ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ ປະຈຳປີ 2021 ແລະ ແຜນການ ປະຈຳປີ 2022 ຂອງລັດຖະບານ ດ້ວຍຄວາມຈິງໃຈ, ສ້າງສັນ ແລະ ກົງໄປກົງມາ.

ການປະກອບຄຳເຫັນຂອງບັນດາທ່ານ ສຸດທີ່ມີຄວາມໝາຍສໍາຄັນ ເຊິ່ງສະແດງໃຫ້ເຫັນເຖິງຄວາມຮັບຜິດຊອບ ແລະ ຄວາມເປັນຫ່ວງເປັນໃຍຕໍ່ປະເທດຊາດ, ພ້ອມກັນນັ້ນ ຍັງໄດ້ຝາກຄວາມເຊື່ອໝັ້ນຕໍ່ລັດຖະບານໃນການບໍລິຫານ ແລະ ຈັດຕັ້ງປະຕິບັດ ມະຕິກອງປະຊຸມໃຫຍ່ຂອງພັກ ຄັ້ງທີ XI ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ປີ 2021 ທີ່ສະພາແຫ່ງຊາດໄດ້ຮັບຮອງ ຜ່ານການປະຕິບັດຕົວຈິງຂອງລັດຖະບານ ໃນສະພາບເງື່ອນໄຂຂອງໂຄວິດ ທີ່ຍັງສືບຕໍ່ລະບາດນັບມື້ຮຸນແຮງ ແລະ ເປັນວົງກວ້າງນັ້ນ ເຫັນວ່າທິດທາງຄາດໝາຍ ປີ 2021 ຈຳນວນໜຶ່ງ ຍັງບໍ່ສາມາດບັນລຸໄດ້ ເຊິ່ງບັນດາທ່ານສະມາຊິກສະພາແຫ່ງຊາດ ກໍໄດ້ຮັບຮູ້ ແລະ ເຂົ້າໃຈ ສະພາບຄວາມເປັນຈິງດັ່ງກ່າວແລ້ວ.

ໃນໂອກາດນີ້, ຕາງໜ້າໃຫ້ລັດຖະບານ ຊຸດທີ IX ຂໍຮັບເອົາການປະກອບຄໍາເຫັນທັງໝົດຂອງບັນດາທ່ານ ເພາະບັນດາຄຳເຫັນເຫລົ່ານີ້ ສຸດທີ່ມີຄວາມໝາຍສໍາຄັນ, ເປັນບົດຮຽນອັນລໍ້າຄ່າ ທັງເປັນການໃຫ້ຄຳແນະນໄທີ່ດີ ຕໍ່ການບໍລິຫານລັດ, ບົນພື້ນຖານນັ້ນ ຈະສືບຕໍ່ນຳໄປຄົ້ນຄວ້າຕາມຄວາມຮັບຜິດຊອບຂອງລັດຖະບານ ກໍຄືຂອງບັນດາຂະແໜງການ ແລະ ທ້ອງຖິ່ນ ເພື່ອປັບປຸງແກ້ໄຂບັນຫາທີ່ກອງປະຊຸມສະພາແຫ່ງຊາດໃນຄັ້ງນີ້ຕັ້ງຂຶ້ນ.

ຖືໂອກາດນີ້, ອີກເທື່ອໜຶ່ງ ຂໍສະເໜີຕໍ່ກອງປະຊຸມສະພາແຫ່ງຊາດວ່າ ລັດຖະບານຊຸດທີ IX ມາຮັບໜ້າທີ່ແມ່ນໃນເວລາທີ່ສະພາບການພັດທະນາເສດຖະກິດ-ສັງຄົມ ຂອງປະເທດເຮົາພົບຄວາມຫຍຸ້ງຍາກ ແລະ ສິ່ງທ້າທາຍ 9 ບັນຫາຫລັກໆ ດັ່ງທີ່ໄດ້ສະເໜີໃນມື້ທຳອິດຂອງກອງປະຊຸມສະພາໃນຄັ້ງນີ້ ຂໍ້ຫຍຸ້ງຍາກເຫລົ່ານັ້ນ ແມ່ນສິ່ງທີ່ກຳລັງສົ່ງຜົນກະທົບແຮງຕໍ່ລະບົບເສດຖະກິດ-ສັງຄົມ ຂອງປະເທດ, ພວກເຮົາຕ້ອງຕັດສິນໃຈແກ້ໄຂບັນຫາເຫລົ່ານັ້ນ ໃຫ້ຜ່ອນຄາຍລົງ ໃນໄລຍະເວລາທີ່ສົມຄວນ. ການແກ້ໄຂບັນຫາດັ່ງກ່າວ ລັດຖະບານໄດ້ດໍາເນີນບົນຈິດໃຈ ຜັນຂະຫຍາຍ ແລະ ປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກ ທີ່ໄດ້ກໍານົດທິດຊີ້ນໍາລວມ ບົນຈິດໃຈສ້າງການຫັນປ່ຽນຢ່າງແຂງເເຮງ, ເລິກເຊິ່ງ ແລະ ຮອບດ້ານ ໂດຍໄດ້ຖືເອົາການກະກຽມ ແລະ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍບັນຫາຢາເສບຕິດ ເປັນວຽກງານບຸລິມະສິດຮີບດ່ວນ ໂດຍດໍາເນີນໄປບົນພື້ນຖານຍຶດໝັ້ນ 3 ຫລັກການຕົ້ນຕໍ: ເດັດຂາດ, ໂປ່ງໃສ ແລະ ມືອາຊີບ (ຫລັກວິຊາການ) ແລະ ອັນສຳຄັນແມ່ນສະພາແຫ່ງຊາດ ຊຸດທີ IX ກໍໄດ້ຮັບຮອງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ເຊິ່ງເປົ້າໝາຍຕົ້ນຕໍຂອງການປະຕິບັດສອງວາລະແຫ່ງຊາດ ເນື້ອແທ້ກໍແມ່ນເພື່ອແກ້ໄຂບັນຫາຫຍຸ້ງຍາກ ແລະ ພັດທະນາເສດຖະກິດຂອງປະເທດເຮົາ ໃຫ້ມີການຫັນປ່ຽນໃໝ່ໃນຕໍ່ໜ້າ.