(ສພຊ) – ວັນທີ 2-7 ກັນຍາ 2024 ທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 14 ແຂວງສາລະວັນ ພ້ອມດ້ວຍທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານຄະນະ ສສຊ ປະຈຳເຂດເລືອກຕັ້ງ ທັງເປັນປະທານສະພາປະຊາຊົນແຂວງ (ສພຂ) ແລະ ບັນດາທ່ານສະມາຊິກສະພາປະຊາຊົນແຂວງ (ສສຂ) ປະຈຳເຂດເລືອກຕັ້ງເມືອງ ໄດ້ເຄື່ອນໄຫວພົບປະປະຊາຊົນບັນດາເຜົ່າຢູ່ 7 ຈຸດ ໃນ 3 ເມືອງຂອງແຂວງສາລະວັນ ຄື: ບ້ານນາຮ່ອງຂາມ, ບ້ານນາຫົວແຮດ, ບ້ານນາກົກຕານ, ບ້ານກອງລືນ້ອຍ ເມືອງວາປີ; ບ້ານໂອກາດໃຫຍ່, ບ້ານແກ້ງໂຫດ ເມືອງຄົງເຊໂດນ; ບ້ານພູດາວແຈ້ງນ້ອຍ ເມືອງລະຄອນເພັງ ເຊິ່ງມີຄະນະພັກຮາກຖານກຸ່ມບ້ານ, ຄະນະອົງການຈັດຕັ້ງບ້ານ ຈາກ 22 ບ້ານ, ພະນັກງານອາວຸໂສບຳນານ, ເຖົ້າແກ່ແນວໂຮມ, ພໍ່ແມ່ປະຊາຊົນ, ຄູ ແລະ ນັກຮຽນ ເຂົ້າຮ່ວມ 794 ຄົນ, ຍິງ 320 ຄົນ; ຈຸດປະສົງເພື່ອລາຍງານການເຄື່ອນໄຫວປະຕິບັດສິດ ແລະ ໜ້າທີ່ຂອງສະມາຊິກສະພາຕໍ່ຜູ້ມີສິດເລືອກຕັ້ງ ໂດຍສະເພາະແມ່ນລາຍງານຜົນສຳ ເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ສພຂ ສາລະວັນ ຊຸດທີ II, ຢ້ຽມຢາມຖາມຂ່າວ, ຮັບຟັງຄໍາຄິດຄໍາເຫັນ, ຄວາມມຸ່ງມາດປາຖະໜາຂອງປະຊາຊົນບັນດາເຜົ່າ.
ການພົບປະໃນແຕ່ລະຈຸດ ໄດ້ຮັບຟັງລາຍງານສະພາບການພັດທະນາເສດຖະກິດ-ສັງຄົມພາຍໃນບ້ານ. ຫຼັງຈາກນັ້ນ, ສສຊ ແລະ ສສຂ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າ ໃຈ; ຈາກນັ້ນ, ກໍໄດ້ເປີດໂອກາດໃຫ້ມີຄຳເຫັນແລກປ່ຽນ ແລະ ຂໍ້ສະເໜີຕ່າງໆ ເຊິ່ງຂໍ້ສະເໜີດັ່ງກ່າວແມ່ນຕິດພັນກັບຊີ ວິດການເປັນຢູ່ຂອງປະຊາຊົນ ເປັນຕົ້ນ: ສ້າງເສັ້ນທາງເຂົ້າບ້ານ, ທຶນສ້ອມແປງໂຮງຮຽນ, ຊົນລະປະທານ, ໂທລະໂຄ່ງ ແລະ ອື່ນໆ.
ຜ່ານການຮັບຟັງຂໍ້ສະເໜີຂອງປະຊາຊົນ, ສະມາຊິກສະພາ ກໍຄືພາກສ່ວນກ່ຽວຂ້ອງຂັ້ນເມືອງທີ່ເຂົ້າຮ່ວມພົບປະ ກໍໄດ້ຊີ້ແຈງ, ອະທິບາຍໄປຕາມແຜນການຂອງລັດຖະບານ ກໍຄືຂອງແຂວງ ແລະ ເມືອງ ຕິດພັນກັບເນື້ອໃນກອງປະຊຸມສະໄໝສາມັນເທື່ອທີ 7 ເຊິ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມຂອງປະເທດ ໂດຍສະເພາະຜົນກະທົບຈາກສະພາບການຂອງໂລກ, ໄພທໍາມະຊາດ ແລະ ອື່ນໆ; ຍົກໃຫ້ເຫັນນະໂຍ ບາຍ, ມາດຕະການທີ່ລັດຖະບານ ກໍຄືທ້ອງຖິ່ນວາງອອກ ເພື່ອສູ້ຊົນຈັດຕັ້ງປະຕິບັດໃຫ້ມີຜົນສຳເລັດ. ພ້ອມດຽວກັນນັ້ນ, ກໍຮຽກຮ້ອງໃຫ້ຄະນະພັກ, ອຳນາດການປົກຄອງ ແລະ ປະຊາຊົນບັນດາເຜົ່າ ຈົ່ງເປັນເຈົ້າການເຂົ້າຮ່ວມ ແລະ ປະ ກອບສ່ວນຈັດຕັ້ງປະຕິບັດຮ່ວມກັບພັກ-ລັດ ເປັນຕົ້ນ: ສືບຕໍ່ປະຕິບັດ 2 ວາລະແຫ່ງຊາດ; ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ; ເພີ່ມທະວີການເຕົ້າໂຮມຄວາມສາມັກຄີບັນດາເຜົ່າໃຫ້ເປັນປຶກແຜ່ນ; ສືບຕໍ່ເສີມຂະຫຍາຍ ແລະ ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ທ້ອງຖິ່ນ ແລະ ຂອງຊາດ; ປະຕິບັດສິດ, ໜ້າທີ່ ແລະ ພັນທະຂອງພົນລະເມືອງ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເຂັ້ມ ແຂງ, ຈະເລີນຮຸ່ງເຮືອງຂຶ້ນໄປຢ່າງບໍ່ຢຸດຢັ້ງ.
ໃນການເຄື່ອນໄຫວຄັ້ງນີ້, ຄະນະໄດ້ນຳເອົາອຸປະກອນກິລາ ແລະ ປຶ້ມຂຽນຈຳນວນໜຶ່ງ ມອບໃຫ້ການຈັດຕັ້ງໃນແຕ່ລະຈຸດ ເພື່ອນຳໄປແຈກຢາຍໃຫ້ແກ່ນ້ອງນັກຮຽນທີ່ທຸກຍາກຂາດເຂີນ.
ວັນທີ 27 ສິງຫາ – 1 ກັນຍາ, ທ່ານ ສຸບັນ ສະວະບຸດ ຄະນະປະຈໍາສະພາແຫ່ງຊາດ ພ້ອມຄະນະ ໄດ້ເຄື່ອນໄຫວຕິດຕາມກວດກາ, ຊຸກຍູ້ວຽກງານພົບປະປະຊາຊົນຂອງ ສສຊ ແລະ ສສຂ ຢູ່ແຂວງອັດຕະປື ແລະ ເຄື່ອນໄຫວເຮັດວຽກຢູ່ເມືອງພູວົງ ແລະ ເມືອງຊານໄຊ; ວັນທີ 8-13 ກັນຍາ ໄດ້ເຄື່ອນໄຫວຢູ່ເຂດເລືອກຕັ້ງທີ 12 ແຂວງຄໍາມ່ວນ ໂດຍການຕ້ອນຮັບ ແລະ ຮ່ວມເຮັດວຽກຂອງທ່ານ ບຸນມີ ພິມມະສອນ ຮອງເລຂາພັກແຂວງ, ປະທານຄະນະ ສສຊ ປະຈຳເຂດເລືອກຕັ້ງ ທັງເປັນປະທານ ສພຂ ເຊິ່ງໄດ້ເຮັດວຽກຢູ່ເມືອງນາກາຍ ແລະ ເມືອງໜອງບົກ.
ຜ່ານການເຄື່ອນໄຫວເຮັດວຽກຢູ່ 4 ຕົວເມືອງຂອງ 2 ແຂວງນັ້ນ, ຄະນະ ສສຂ ປະຈໍາເຂດເລືອກຕັ້ງເມືອງ ໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກໃນການເຄື່ອນໄຫວວຽກງານ ໂດຍສະເພາະການພົບປະຜູ້ມີສິດເລືອກຕັ້ງ ເຊິ່ງເຫັນວ່າການເຂົ້າຮ່ວມຂອງປະຊາຊົນບາງຈຸດມີຈໍານວນບໍ່ຫຼາຍ, ການແກ້ໄຂຄໍາສະເໜີຂອງປະຊາຊົນຍັງຊັກຊ້າ ບໍ່ໄປຕາມເວ ລາທີ່ກໍານົດ, ກົນໄກວິທີການແກ້ໄຂບໍ່ລະອຽດ ແລະ ອື່ນໆ; ຈາກນັ້ນ, ກໍໄດ້ເຮັດວຽກກັບຄະນະປະຈໍາ ສພຂ ຕໍ່ສະພາບການຈັດຕັ້ງປະຕິບັດໜ້າທີ່ຂອງຄະນະ ສສຊ ແລະ ສສຂ. ຕອນທ້າຍ, ທ່ານ ສຸບັນ ສະວະບຸດ ໄດ້ມີຄໍາເຫັນແລກປ່ຽນບາງດ້ານເຊັ່ນ: ສະເພາະໜ້າ ແຕ່ນີ້ຮອດທ້າຍສະໄໝຂອງ ສພຊ ຊຸດທີ IX ແລະ ສພຂ ຊຸດທີ II ຈະຕ້ອງໄດ້ສືບຕໍ່ຈັດຕັ້ງປະຕິບັດວຽກງານຂອງຄະນະ ສສຊ ປະຈໍາເຂດເລືອກຕັ້ງ ແລະ ສສຂ ໃຫ້ບັນລຸຕາມແຜນທີ່ວາງໄວ້; ວຽກພົບປະຜູ້ມີສິດເລືອກຕັ້ງ ຈະໄດ້ຄົ້ນຄວ້າປັບປຸງນິຕິກໍາ ກໍຄືປຶ້ມຄູ່ມືການພົບປະປະຊາຊົນ ໃຫ້ສອດຄ່ອງກວ່າເກົ່າ ແລະ ຮັບປະກັນໃຫ້ວຽກງານດັ່ງກ່າວ ມີປະສິດທິພາບສູງຂຶ້ນ.
(ຄໍາແດງ ອິນທະສັກ ແລະ ໄຈຢ່າງ ມະນີວົງຢ່າລື)