ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າວັນທີ 21 ມິຖຸນາ 2022 ນີ້ ທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ຕາງໜ້າຄະນະປະຈຳສະພາແຫ່ງຊາດ ໄດ້ປະກອບຄຳເຫັນ ຕໍ່ບົດລາຍງານຂອງລັດຖະບານ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX.
1. ສະເໜີ ໃຫ້ລັດຖະບານ ສືບຕໍ່ປັບປຸງກົນໄກຕ່າງໆໃຫ້ຮັດກຸມ ພ້ອມທັງກຳນົດມາດທີ່ເດັດຂາດ ເພື່ອຮັບປະກັນໃຫ້ການປະຕິບັດວາລະແຫ່ງຊາດດັ່ງກ່າວ ມີຜົນສໍາເລັດຕາມຄາດໝາຍວາງໄວ້;
2. ການຈັດຕັ້ງປະຕິບັດວາລະແຫ່ງຊາດວ່າ ດ້ວຍການແກ້ໄຂຢາເສບຕິດຂອງລັດຖະບານໃນໄລຍະຜ່ານມາ ໄດ້ດໍາເນີນໄປຢ່າງຖືກຕ້ອງ ຕາມທິດຊີ້ນໍາຂອງກົມການເມືອງສູນກາງພັກ ແລະ ມະຕິຂອງກອງປະຊຸມສະພາແຫ່ງຊາດ;
3. ເຮັດໃຫ້ບັນຫາຢາເສບຕິດໄດ້ຮັບການແກ້ໄຂເປັນວົງກວ້າງ, ກຸ່ມເສບ, ຂົນສົ່ງ-ຄ້າຂາຍ ແລະ ຜະລິດຢາເສບຕິດ ມີຄວາມຢ້ານກົວ ແລະ ຈໍານວນໜຶ່ງໄດ້ຢຸດເຊົາ;
4. ອັນໄດ້ປະກອບສ່ວນເຂົ້າໃນການ ຮັກສາສະຖຽນລະພາບທາງການເມືອງ, ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມໄດ້ໂດຍພື້ນຖານ, ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການສ້າງສາພັດທະນາເສດຖະກິດ-ສັງຄົມຂອງປະເທດຊາດ;
5. ແນວໃດກໍຕາມ, ເພື່ອຮັບປະກັນໃຫ້ການປະຕິບັດວາລະດັ່ງກ່າວບັນລຸຄາດໝາຍ ຄະນະປະຈໍາສະພາແຫ່ງຊາດ ສະເໜີໃຫ້ລັດຖະບານສືບຕໍ່ປັບປຸງກົນໄກຕ່າງໆໃຫ້ຮັດກຸ່ມ, ໂດຍການດໍາເນີນມາດຕະການປ້ອງກັນໄປຄຽງຄູ່ການແກ້ໄຂຕໍ່ຜູ້ກະທໍາຜິດຕາມ ລະບຽບກົດໝາຍທີ່ເດັດຂາດ;
6. ໂດຍສະເພາະແມ່ນການເພີ່ມທະວີຍົກສູງຄວາມສາມາດ ໃນການຊີ້ນໍາການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ກາຍເປັນຄວາມຮັບຜິດຊອບໂດຍກົງ ແລະ ເດັດຂາດ ຂອງຄະນະພັກແຕ່ລະຂັ້ນ;
7. ຖືເອົາການແກ້ໄຂບັນຫາຢາເສບຕິດ ເປັນມາດຖານເງື່ອນໄຂໜຶ່ງເຂົ້າໃນຂະບວນແຂ່ງ ຂັນຮັກຊາດ ແລະ ພັດທະນາ, ສ້າງບ້ານປອດຢາເສບຕິດ, ສ້າງໜ່ວຍພັກປອດໃສເຂັ້ມ ແຂງ-ໜັກແໜ້ນ ຢູ່ບ້ານ, ສໍານັກງານ, ອົງການ, ສະຖາບັນການສຶກສາ, ໂຮງໝໍ, ໂຮງຈັກ, ໂຮງງານ ແລະ ບັນດາຫົວໜ່ວຍການຜະລິດ-ທຸລະກິດ;
8. ເພື່ອສ້າງໃຫ້ທຸກຄົນມີສະຕິ ລະວັງຕົວ ແລະ ເຂົ້າຮ່ວມການຈັດຕັ້ງປະຕິບັດ ວາລະແຫ່ງຊາດດັ່ງກ່າວຢ່າງແຂງແຮງ;
9. ຄະນະປະຈໍາສະພາແຫ່ງຊາດ ຍັງໄດ້ສະເໜີໃຫ້ລັດຖະບານສືບຕໍ່ສ້າງຄວາມຮັບຮູ້ໃຫ້ສັງຄົມ ດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບ ກົດໝາຍ, ຜົນຮ້າຍ ແລະ ຄວາມອັນຕະລາຍຂອງຢາເສບຕິດຢ່າງປົກກະຕິ ແລະ ຕໍ່ເນື່ອງດ້ວຍຫລາຍຮູບແບບ, ຫລາຍວິທີ, ເອົາໃຈໃສ່ຊຸກຍູ້, ສົ່ງເສີມ ແລະ ສ້າງຄວາມເຂັ້ມແຂງ ໃຫ້ສະຖາບັນຄອບຄົວ ແລະ ຊຸມຊົນໃນການຕ້ານ, ສະກັດກັ້ນ ແລະ ແກ້ໄຂບັນຫາຢາເສບ ຕິດໃຫ້ແຂງແຮງ;
10. ສືບຕໍ່ປັບປຸງ, ສ້າງກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງກັບ ບັນຫາຢາເສບຕິດໃຫ້ຮັດກຸມ, ບໍ່ມີຊ່ອງຫວ່າງ, ຖືກຕ້ອງ ແລະ ສອດຄ່ອງກັບຄວາມຮຽກຮ້ອງຕ້ອງການ ແລະ ການກໍານົດມາດຕະຖານໂທດປະຫານຊີວິດໃຫ້ຊັດເຈນ;
11. ການແກ້ໄຂຂອງກາງ ຫລື ວັດຖຸ, ຊັບສິນ ທີ່ໄດ້ມາຈາກການກະທໍາຜິດຢາເສບຕິດ, ບໍ່ປະໃຫ້ເປັນຊ່ອງວ່າງ ເພື່ອສວຍໃຊ້ໃນການຕໍ່ລອງ;
12. ພ້ອມນັ້ນ, ໃຫ້ເອົາໃຈໃສ່ໃນການບໍາບັດ-ປິ່ນປົວຜູ້ຕິດຢາເສບຕິດ, ຟື້ນຟູສຸຂະພາບຂອງຜູ້ຕິດຢາເສບຕິດ ກັບການດັດສ້າງ ແລະ ຝຶກສີມື, ຝຶກອາຊີບ ໃຫ້ເຂົາເຈົ້າ;
13, ລັດຖະບານ ຍັງຕ້ອງເອົາໃຈໃສ່ແກ້ໄຂປາກົດການຫຍໍ້ທໍ້ ແລະ ຄວາມໂປ່ງໃສ ໃນການເຄື່ອນໄຫວປະຕິບັດໜ້າທີ່ຂອງເຈົ້າໜ້າທີ່ຢ່າງເດັດຂາດ ແລະ ທັນການ;
14. ຕ້ອງກໍານົດລະບອບລະບຽບການ, ກົນໄກ ແລະ ການຈັດຕັ້ງທີ່ເຂັ້ມແຂງ ກ່ຽວກັບບັນຫາທີ່ພົວພັນເຖິງການແຈ້ງຂໍ້ມູນຂອງກາງ, ຊັບສິນ, ການອາຍັດຊັບ, ການຢຶດຊັບ ແລະ ການຮິບວັດຖຸ ຈາກຜູ້ກະທໍາຜິດຢາເສບຕິດ ທີ່ອາດເປັນຊ່ອງວ່າງພາໃຫ້ເກີດປະກົດການຫຍໍ້ທໍ້, ພ້ອມທັງເອົາໃຈໃສ່ການແກ້ໄຂກໍລະນີຕ່າງໆ ທີ່ບໍ່ຖືກຕ້ອງຕາມກົດໝາຍ ແລະ ຫລັກສິນທໍາໃນການດໍາເນີນຄະດີ;
15. ສືບຕໍ່ເພີ່ມທະວີຮ່ວມມືກັບສາກົນ, ໂດຍສະເພາະແມ່ນດ້ານການຂ່າວ, ຂໍ້ມູນເບາະແສຕ່າງໆ ກ່ຽວກັບຂະບວນການຜະລິດ, ຂົນສົ່ງ, ຄ້າຂາຍຢາເສບຕິດ ກັບບັນດາປະເທດໃກ້ຄຽງໃນອານຸພາກພື້ນ ແລະ ສາກົນ ໃຫ້ໜັກແໜ້ນ, ຮັດກຸມ ເພື່ອສະກັດກັ້ນ, ປາບປາມ ຂະບວນການດັ່ງກ່າວໃຫ້ແຂງແຮງ, ມີຈຸດສຸມ ແລະ ມີປະສິດທິຜົນ (ຂໍ້ມູນ ສຳນັກຂ່າວສານແຫ່ງ ປະເທດລາວ).