ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

          (ສພຊ) ໃນລະຫວ່າງວັນທີ 17-19 ພຶດສະພາ 2022 ນີ້, ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ (ສພຂ) ສາລະວັນ ພ້ອມດ້ວຍ ສະມາຊິກສະພາປະຊາຊົນແຂວງ (ສສຂ) ແລະຕາງໜ້າຈາກພະແນກການທີ່ກ່ຽວຂ້ອງ ໄດ້ເຄື່ອນໄຫວຊຸກຍູ້ແລະຕິດຕາມການຈັດຕັ້ງປະຕິບັດ ມະຕິກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ສພຂ ຊຸດທີ II ແລະ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ກ່ຽວກັບການແກ້ໄຂບັນຫາຢາເສບຕິດ ຢູ່ທີ່ສະໂມສອນຂອງ 4 ເມືອງ ຄື: ເມືອງສະໝ້ວຍ, ເມືອງຕະໂອ້ຍ, ເມືອງຕຸ້ມລານ ແລະ ເມືອງສາລະວັນ; ໂດຍການຕ້ອນຮັບ ແລະ ເຂົ້າຮ່ວມກອງປະຊຸມມີທ່ານເລຂາພັກ ເຈົ້າເມືອງ, ຄະນະປະຈຳພັກເມືອງ, ອົງການປົກຄອງເມືອງ ເຂົ້າຮ່ວມ.
           ການເຄື່ອນໄຫວໃນແຕ່ລະເມືອງ ບັນດາທ່ານເລຂາພັກເຈົ້າເມືອງ ໄດ້ຂຶ້ນລາຍງານຜົນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນ ແລະ ທິດທາງແຜນການ 6 ເດືອນທ້າຍປີ 2022 ຂອງເມືອງ ແລະ ຜົນຂອງການຈັດຕັ້ງຜັນຂະຫຍາຍສອງວາລະແຫ່ງຊາດ ໂດຍຫຍໍ້; ພ້ອມນັ້ນກໍ່ໄດ້ຮັບຟັງການລາຍງານຈາກຕາງໜ້າຫ້ອງການເມືອງ ແລະ ພະແນກການທີ່ກ່ຽວຂ້ອງຕາມຂົງເຂດຄວາມຮັບຜິດຊອບ.
           ພ້ອມນັ້ນ, ທ່ານ ສີເຮັງ ຫອມສົມບັດ ໄດ້ເນັ້ນໃຫ້ແຕ່ລະເມືອງ ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງ ໃນ 6 ເດືອນຕໍ່ໜ້າ ໂດຍສະເພາະການຈັດເກັບລາຍຮັບເຂົ້າງົບປະມານໃຫ້ບັນລຸ, ຫັນການປູກຝັງການຜະລິດສິນຄ້າໃຫ້ຫຼາຍເພື່ອທົດແທນການນຳເຂົ້າ, ທ່ານເຈົ້າເມືອງຕ້ອງຊີ້ນຳໃຫ້ແຕ່ລະຂະແໜງການທີ່ຂຶ້ນກັບ ຮີບຮ້ອນເອົາໃຈໃສ່ຈັດຕັ້ງປະຕິບັດໃຫ້ມີຜົນສຳເລັດດີຂຶ້ນເປັນກ້າວໆ; ສຳລັບວາລະແຫ່ງຊາດ ໃຫ້ຖືເປັນສຳຄັນໂດຍມອບໃຫ້ແຕ່ລະພາກສ່ວນຂັ້ນເມືອງຂັ້ນບ້ານ ສືບຕໍ່ຜັນຂະຫຍາຍສອງວາລະແຫ່ງຊາດໃຫ້ເຂົ້າສູ່ລວງເລິກ ພ້ອມທັງຄົ້ນຄວ້າກຳນົດເປັນແຜນວຽກ,ແຜນຄົນ,ແຜນງົບປະມານໃຫ້ລະອຽດ ແລະ ເປັນລະບົບ; ມອບໃຫ້ ປກສ ເມືອງ ເປັນໃຈກາງລາຍງານປະຈຳວັນ ໃຫ້ທ່ານເຈົ້າເມືອງ, ຄະນະປະຈຳພັກເມືອງ ຮັບຊາບຢ່າງເປັນປົກກະຕິຕໍ່ກັບການແກ້ໄຂບັນຫາຢາເສບຕິດ.
           ການເຄື່ອນໄຫວຄັ້ງນີ້ ເພື່ອເປັນການຈັດຕັ້ງປະຕິບັດ ກົດໝາຍ ວ່າດ້ວຍການຕິດຕາມກວດກາ ຂອງ ສພຊ ແລະ ສພຂ, ເປັນການເກັບກຳຂໍ້ມູນຮອງຮັບໃຫ້ແກ່ ສະມາຊິກສະພາແຫ່ງຊາດ ເຂດ 14 ໃນການກະກຽມເຂົ້າຮ່ວມກອງປະຊຸມສະໄໝສາມັນເທື່ອທີ 3 ຂອງ ສພຊ ຊຸດທີ IX ທີ່ຈະເປີດໃນຕົ້ນເດືອນມິຖຸນາທີ່ຈະມາເຖິງນີ້.
ຂ່າວ ດີລຳພົນ ພົມມະຈັນ