ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 16-18 ສິງຫາ 2022 ນີ້ ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຍາມ, ເຮັດວຽກຢູ່ແຂວງຫລວງນ້ຳທາ ໂດຍການຕ້ອນຮັບຂອງທ່ານ ຄຳໄຫລ ສີປະເສີດ ກຳມະການສູນກາງພັກ ເລຂາຄະນະພັກແຂວງ ເຈົ້າແຂວງຫລວງນ້ຳທາ ແລະ ທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ.

ໂອກາດລົງຢ້ຽມຢາມແຂວງຫລວງນ້ຳທາໃນຄັ້ງນີ້ ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍຄະນະ ໄດ້ຢ້ຽມຢາມເມືອງສິງ ແຂວງຫລວງນ້ຳທາ ໂດຍການຕ້ອນຮັບຂອງທ່ານ ປະລິນຍາເອກ ຈັນພິພັກ ກອງຈຳປາ ເລຂາພັກເມືອງ ເຈົ້າໆເມືອງສິງ ແລະ ໄດ້ລົງຢ້ຽມຢາມໂຄງການຊົນລະປະທານ ອ່າງເກັບນ້ຳຢ້າ ທີ່ ສສ ຫວຽດນາມຊ່ວຍເຫລືອ; ຢ້ຽມຢາມຄອບຄົວຕົວແບບຜະລິດກະສິກຳ, ອຸດສາຫະກຳ, ກຸ່ມຜະລິດ ຫຼື ສະຫະກອນ; ຢ້ຽມຢາມສະຖານທີ່ໂຄງການກະສິກຳ, ອຸດສາຫະກຳ,ບໍລິການ ແລະ ການທ່ອງທ່ຽວ ຢູ່ເຂດບ້ານອຸດົມສິນ ແລະ ບ້ານນ້ຳແດດສົມບຸນ ເມືອງສິງ ແຂວງຫລວງນ້ຳທາ ແລະ ຮ່ວມເຮັດວຽກນຳຄະນະນຳຂອງເມືອງ ຢູ່ຫ້ອງປະຊຸມ ຫ້ອງວ່າການປົກຄອງເມືອງ ເພື່ອຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງສິງໂດຍຫຍໍ້; ໂອກາດນີ້ ທ່ານປະທານສະພາແຫ່ງຊາດ ຍັງນຳເອົາເຄື່ອງອຸປະກອນການຮຽນ, ເຄື່ອງນຸ່ງຫົ່ມ ມອບໃຫ້ອົງການປົກຄອງເມືອງສິງ ໂດຍການກ່າວຮັບຂອງທ່ານ ປະລິນຍາເອກ ຈັນພິພັກ ກອງຈຳປາ ເລຂາພັກເມືອງ ເຈົ້າໆເມືອງສິງ.

                ແລະ ຕອນເຊົ້າຂອງວັນທີ່ 18 ສິງຫາ 2022 ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຮັດວຽກຮ່ວມກັບການນຳຂອງແຂວງ, ການນຳຂອງສະພາປະຊາຊົນແຂວງ ຢູ່ທີ່ຫ້ອງປະຊຸມສະພາປະຊາຊົນແຂວງ ມີພະນັກງານຫຼັກແຫຼ່ງ, ພະນັກງານ-ລັດຖະກອນພາຍໃນສະພາປະຊາຊົນແຂວງເຂົ້າຮ່ວມ 40 ກວ່າຄົນ.

ໃນນີ້ໄດ້ຮັບຟັງສະພາບການຈັດຕັ້ງປະຕິບັດວຽກງານໂດຍຫຍໍ້ຂອງແຂວງຫລວງນ້ຳທາໃນໄລຍະຜ່ານມາ ແລະ ບົດລາຍງານການຈັດຕັ້ງເຄື່ອນໄຫວວຽກງານ ຂອງສະພາປະຊາຊົນແຂວງໂດຍຫຍໍ້ ເປັນຕົ້ນ; ການຈັດຕັ້ງປະຕິບັດວຽກງານໃນໄລຍະຜ່ານມາ, ການຈັດຕັ້ງປະຕິບັດພາລະບົດບາດດ້ານນິຕິກຳ, ດ້ານການຕົກລົງບັນຫາສຳຄັນພື້ນຖານຂອງແຂວງ, ດ້ານການຕິດຕາມກວດກາ, ວຽກງານພົບປະປະຊາຊົນຜູ້ມີສິດປ່ອນບັດເລືອກຕັ້ງ, ວຽກງານການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ19 ແລະ ການຊູກຍູ້ຕິດຕາມກວດກາ ການຈັດຕັ້ງຜັນຂະຫຍາຍ 2 ວາລະແຫ່ງຊາດ ກ່ຽວກັບການແກ້ໄຂບັນຫາເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດຂອງແຂວງ;                               ໂອກາດອັນສະຫງ່າລາສີນີ້ ຍັງໄດ້ຮັບຄຳໂອ້ລົມໃຫ້ທິດຊີ້ເຢືອງທາງຂອງທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບການຈັດຕັ້ງປະຕິບັດວຽກງານຂອງແຂວງ, ຂອງສະພາປະຊາຊົນແຂວງ ທີ່ຍາດໄດ້ຜົນງານອັນພົ້ນເດັ່ນຫລາຍດ້ານ ແລະ ໃຫ້ຮັກສາມູນເຊື້ອອັນດີງາມນີ້ໄວ້ຕະຫລອດໄປ, ຮຽກຮ້ອງໃຫ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານຫລັກແຫລ່ງໃຫ້ມີແນວຄິດຫລັກໜັ້ນ, ອຸ່ນອຽງທຸນທຽງ, ມີຄວາມສາມັກຄີເປັນປຶກແຜນ ແລະ ໃຫ້ລົງພົບປະປະຊາຊົນໃຫ້ເປັນປົກກະຕິ ເພື່ອນຳເອົາຄວາມຂັດຂ້ອງໝອງໃຈ, ຄວາມຫຍຸ້ງຍາກຂອງປະຊາຊົນ ມາຄົ້ນຄວ້າຫາທາງແກ້ໄຂ ພ້ອມກັນຈັດຕັ້ງປະຕິບັດວຽກງານດ້ວຍຄວາມຮັບຜິດຊອບສູງ ຕິດພັນກັບການພັດທະນາປະເທດຊາດ ເວົ້າລວມເວົ້າສະເພາະ ພັດທະນາແຂວງຫລວງນ້ຳທາ ໃຫ້ຈະເລີນສີວິໄລ.