ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

         ທ່ານ ຄຳໃບ ດຳລັດ, ກຳມະການສູນກາງພັກ, ຮອງປະທານສະພາແຫ່ງຊາດ ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 20 ມິຖຸນາຜ່ານມາ ວ່າ: ຕາງໜ້າຄະນະປະຈຳສະພາແຫ່ງຊາດ, ມີຄວາມຍິນດີ ແລະ ຖືເປັນກຽດ, ແຈ້ງມາຍັງ ພະນັກງານ-ລັດຖະກອນ, ທະຫານ, ຕຳຫລວດ, ນັກຮຽນ-ນັກສຶກສາ, ປັນຍາຊົນ, ກຳມະກອນ,     ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນລາວບັນດາເຜົ່າ ໃນທົ່ວປະເທດ ​ແລະ ທີ່ອາໄສຢູ່ຕ່າງປະເທດ ເພື່ອຮັບຊາບ: ກ່ຽວກັບຜົນສຳເລັດການຄົ້ນຄວ້າພິຈາລະນາວຽກງານຂົງ​ເຂດວັດທະນະ​ທໍາ-ສັງຄົມ, ຢູ່​ໃນ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 3 ຂອງ​ສະພາ​ແຫ່ງ​ຊາດ ຊຸດ​ທີ IX ​ໃນວັນ​ທີ 20 ມິຖຸນາ 2022 , ເຊິ່ງ​ມີ 2 ​​ເນື້ອ​ໃນ​ຕົ້ນຕໍ ດັ່ງ​ນີ້:

  1. ​ການຈັດ​ຕັ້ງ​ປະຕິບັດ​ບັນດາ​ຄາດໝາຍ​ຂົງ​ເຂດ​ສຶກສາ​ທິການ-ກິລາ, ການ​ປັບປຸງ​ຄຸນນະພາບລະບົບ​ການ​ຮຽນ-ການ​ສອນ​ໃນ​ໄລຍະໃໝ່ ​ແລະ ການ​ຄຸ້ມ​ຄອງ​ວຽກ​ງານກິລາ-ກາ​ຍະ​ກໍາ;
  2. ​ການຈັດ​ຕັ້ງ​ປະຕິບັດ​ແຜນການ​ທ່ອງ​ທ່ຽວ​ສີຂຽວ, ການ​ເປີດ​ປະ​ເທດ ຕິດ​ພັນ​ກັບ​ການ​ປ້ອງ​ກັນ ​ແລະ ຮັບ​ມື​ການ​ແຜ່​ລະບາດ​ຂອງ​ພະຍາດ ​ໂຄ​ວິດ-19.

 

ກອງ​ປະຊຸມ ​ໄດ້​ຮັບ​ຟັງ​ການ​ລາຍ​ງານ​ໂດຍ​ສັງ​ເຂ​ບ ຈາກທ່ານ ​ລັດຖະມົນຕີ ທັງ 2 ກະຊວງ ຄື: ກະຊວງ​ສຶກສາ​ທິການ ​ແລະ ກິລາ; ກະຊວງ​ຖະ​ແຫຼ​ງຂ່າວ, ວັດທະນະ​ທໍາ ​ແລະ ທ່ອງ​ທ່ຽວ, ຫຼັງ​ຈາກ​ນັ້ນ, ຜູ້ຕາງໜ້າ​ຄະນະ​ປະ​ຈໍາ​ສະພາ​ແຫ່ງ​ຊາດ ​​​ໄດ້ຂຶ້ນ​ມີ​ຄໍາ​ເຫັນຕໍ່ບົດລາຍງານດັ່ງກ່າວ ແລະ ປະທານກອງ ປະຊຸມ ກໍໄດ້ມີຄຳເຫັນເຈາະຈີ້ມ ເພື່ອໃຫ້ບັນດາທ່ານສະມາຊິກສະພາແຫ່ງຊາດ ປະກອບຄຳເຫັນຢ່າງ ມີຈຸດສຸມ; ສັງເກດໄດ້ວ່າ: ບັນດາທ່ານສະມາຊິກສະພາແຫ່ງຊາດ ໄດ້ສຸມໃສ່ປະກອບຄວາມຄິດເຫັນ ດ້ວຍຄວາມຮັບຜິດຊອບສູງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວ ບັນດາເຜົ່າ, ພ້ອມທັງສະເໜີກົນໄກ, ​ວິທີການ ແລະ ມາດຕະການ ເພື່ອໃຫ້ລັດຖະບານ ກໍຄືພາກສ່ວນ ກ່ຽວຂ້ອງ ນໍາໄປຄົ້ນຄວ້າ, ປັບປຸງ ແລະ ສືບຕໍ່ຈັດຕັ້ງປະຕິບັດ ໃຫ້ມີຜົນສໍາເລັດດີຂຶ້ນ ເຊິ່ງສະມາຊິກສະພາແຫ່ງຊາດ ໄດ້ມີຄຳເຫັນຕໍ່ 2 ບົດລາຍງານດັ່ງກ່າວ ທັງໝົດ 18 ທ່ານ, ຍິງ 7 ທ່ານ, ສາມາດສັງລວມເນື້ອໃນ ໄດ້ດັ່ງນີ້:

  1. ວຽກງານສຶກສາທິການ ແລະ ກິລາ:

1). ການຈັດຕັ້ງປະຕິບັດບັນດາຄາດໝາຍຂະແໜງສຶກສາທິການ ແລະ ກິລາ: ສະມາຊິກ​ສະພາ​ແຫ່ງ​ຊາດ ​ໄດ້​ສະ​ເໜີ​ໃຫ້​ລັດຖະບານ ກໍ​ຄື​ຂະ​ແໜ​ງກ່ຽວຂ້ອງ ​ເອົາ​ໃຈ​ໃສ່ຈັດ​ຕັ້ງ​ປະຕິບັດ​ 8 ຄາດໝາຍ​ທີ່​ບໍ່ທັນບັນລຸ, ເປັນຕົ້ນແມ່ນອັດຕາປະລະການຮຽນ ຂອງນັກຮຽນທີ່ເຫັນວ່າຍັງມີຕົວເລກທີ່ສູງ;

2). ເອົາ​ໃຈ​ໃສ່ການປັບປຸງຄຸນນະພາບການຮຽນ-ການສອນ: ໂດຍສະເພາະແມ່ນ ກໍ່ສ້າງ, ຝຶກອົບຮົມ, ຍົກລະດັບຄູສອນ, ຜູ້ອຳນວຍການ, ຜູ້ບໍລິຫານ ໃຫ້ໄດ້ມາດຕະຖານ ແລະ ເປັນມືອາຊີບ; ການແກ້ໄຂບັນຫາຄູເຫຼືອບໍ່ພໍ, ການບັນຈຸລັດຖະກອນຄູ ແລະ ບໍລິຫານ, ການແກ້ໄຂບັນຫາຄູອາສາສະໝັກ ໂດຍສະເພາະ ຢູ່ເຂດຊົນນະບົດຫ່າງໄກສອກຫຼີກ, ​ໃຫ້​ຖືກຕ້ອງ​ສອດຄ່ອງ​ຕາມນິຕິກຳທີ່ວາງໄວ້;

3). ສະ​ເໜີ​ລັດຖະບານ ພິຈາລະນາ, ຊ​ອກຫາ​ວິທີ​ການ ​ເພື່ອ​ພັດ​ທະນາ, ​ປັບປຸງພື້ນຖານໂຄງລ່າງສະຖານ​ສຶກສາ, ສິ່ງອຳນວຍຄວາມສະດວກ, ການ​ສະໜອງ​ວັດຖຸອຸປະກອນການຮຽນ-ການສອນ ​ໃຫ້​ມີ​ຄວາມ​ພຽງພໍ, ທ່ົວ​ເຖິງ; ລວມທັງປັບປຸງສະພາບແວດລ້ອມຂອງສະຖານການສຶກສາ ​ໃຫ້ໄດ້ມາດຕະ ຖານ;

4). ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ຄູສອນ ໃຫ້ມີຄຸນທາດການເມືອງໜັກ  ແໜ້ນ, ມີຄຸນສົມບັດສິນທຳປະຕິວັດ, ມີຈັນຍາບັນ-ຈັນຍາທໍາ; ມີການປະເມີນຜົນການປະຕິບັດໜ້າທີ່ຂອງພະນັກງານ-ລັດຖະກອນ, ຄູ-ອາຈານ ແລະ ຜູ້ບໍລິຫານ ​ໃຫ້ເປັນປົກກະຕິຕໍ່ເນື່ອງ ຕາມມາດຕະຖານຂອງວຽກງານປະກັນຄຸນນະພາບການສຶກສາ;

5). ທົບທວນ, ປັບປຸງຫຼັກສູດ ໃຫ້ມີຄວາມແທດເໝາະກັບສະພາບຄວາມເປັນຈິງຂອງປະເທດ, ສອດຄ່ອງກັບແຕ່ລະກຸ່ມເປົ້າໝາຍຜູ້ຮຽນ,  ຄົ້ນຄວ້າຮູບແບບ ແລະ ວິທີການສອນ ໃຫ້ມີຄວາມຫຼາກຫຼາຍ ເຊັ່ນ: ການຮຽນແບບກັບທີ່ໃນຫ້ອງຮຽນ, ການຮຽນນອກສະຖານທີ່, ການຮຽນທາງໄກ ​ແລະ ອື່ນໆ, ພ້ອມທັງຜະລິດສື່ການຮຽນ-ການສອນ ໃຫ້ເໝາະສົມກັບແຕ່ລະຮູບແບບ ເພື່ອສ້າງເງື່ອນໄຂໃຫ້ພົນລະເມືອງລາວ ໄດ້ເຂົ້າເຖິງການສຶກສາຢ່າງເທົ່າທຽມ ແລະ ທົ່ວເຖິງ, ກ້າວໄປສູ່ຫັນການສຶກສາເປັນດີຈີຕອນ; ລວມທັງສ້າງຄວາມເຂັ້ມແຂງໃຫ້ສະຖານການສຶກສາ ມີຄວາມສາມາດໃນການຮັບມືກັບໄພສຸກເສີນ ແລະ ການແຜ່ລະບາດຂອງພະຍາດຕ່າງໆ;

6). ປັບປຸງກົນໄກການຈັດຕັ້ງປະຕິບັດວຽກງານຕິດຕາມ, ປະເມີນຜົນ ແລະ ຮັບປະກັນຄຸນນະພາບການສຶກສາ ທຸກຊັ້ນທຸກສາຍທັງພາກລັດ ແລະ ເອກະຊົນ ໃຫ້ເປັນລະບົບ ແລະ ສ້າງຖານຂໍ້ມູນເປັນທັນສະໄໝ ທີ່ສາມາດເຊື່ອມຕໍ່ໃນຂອບເຂດທົ່ວປະເທດ;

+ ຕໍ່ວຽກງານກິລາກາຍຍະກຳ: ​

1). ຄົ້ນຄວ້າ ແລະ ປັບປຸງກົງຈັກການຈັດຕັ້ງຂອງສະຖານການສຶກສາດ້ານກິລາ-ກາຍຍະກໍາ ທີ່ມີພາລະບົດບາດຊຳ້ຊ້ອນກັນ, ໃຫ້ລວມສູນ ຕາມທິດກະທັດຮັດ ແລະ ມີປະສິດທິຜົນ.

2). ເອົາ​ໃຈ​ໃສ່ຄຸ້ມຄອງ ແລະ ນຳໃຊ້ສະໜາມກິລາ, ພື້ນຖານໂຄງລ່າງກິລາ-ກາຍຍະກຳ ໃຫ້ມີປະສິດທິພາບ, ປະສິດທິຜົນ;

3). ຄົ້ນຄວ້າ, ຊອກ​ຫາ​ແຫຼ່​ງທຶນ ​ເພື່ອສະໜອງອຸປະກອນການສອນ-ການຮຽນ, ການເຝິກແອບ-ເຝິກຊ້ອມດ້ານກິລາ-ກາຍຍະກໍາ ​ໃຫ້​ມີຄວາມທັນສະໄໝ ແລະ ພຽງພໍ; ມີ​ແຜນການ​ເຝິກ​ອົບຮົມ, ​ເຜີຍ​ແຜ່​ຂໍ້​ມູນ​ໃຫ້ຜູ້ດໍາເນີນທຸລະກິດ ດ້ານກິລາ-ກາຍຍະກໍາ ​ເພື່ອ​ຊຸກຍູ້, ສ້າງບຸກຄະລາກອນທີ່ມີວິຊາສະເພາະດ້ານ  ​ປະກອບ​ໃນ​ຂົງ​ເຂດ​ວຽກ​ງານ​​ດັ່ງກ່າວ;

4). ຈັດຕັ້ງຜັນຂະຫຍາຍກົດໝາຍວ່າດ້ວຍກິລາ-ກາຍຍະກຳ ໂດຍສະເພາະ ນິຕິກຳ ທີ່​ຕິດ​ພັ​ນກັບ​ການຄຸ້ມຄອງ, ນຳໃຊ້ກອງທຶນກິລາ-ກາຍຍະກຳ,  ​ເພື່ອຈັດຕັ້ງປະຕິບັດ​ເປັນເອກະພາບ ​ແລະ ​ເຂັ້ມ​ງວດ;

5). ການສ້າງ-ພັດທະນາບຸກຄະລາກອນກິລາ-ກາຍຍະກຳ, ນັກກິລາ ​ໃຫ້ເປັນລະບົບຕໍ່ເນື່ອງ, ເປັນມືອາຊີບຂອງແຕ່ລະທ້ອງຖິ່ນ, ກໍ່ສ້າງໃນລະບົບໂຮງຮຽນ, ພ້ອມ​ທັງຊຸກຍູ້, ປຸກລະດົມການເຄື່ອນໄຫວກິລາ-ກາຍຍະກຳ ​​ໃຫ້ເປັນຂະບວນຟົດຟື້ນ, ກວ້າງຂວາງໃນທົ່ວປະເທດ;

6). ເພີ່ມທະວີການສຶກສາອົບຮົມການເມືອງ-ແນວຄິດ ບຸກຄະລາກອນກິລາ-ກາຍຍະກຳ, ນັກກິລາ ເພື່ອຮັບປະກັນໃຫ້ໄດ້ຄົນດີ-ຄົນເກັ່ງ, ມີຄຸນສົມບັດສິນທຳປະຕິວັດ, ມີນໍ້າໃຈຮັກຊາດ, ມີຈັນຍາບັນ-ຈັນຍາທໍາ, ມີລະບຽບວິໄນ ແລະ ປະຕິບັດກົດໝາຍ ຢ່າງເຂັ້ມງວດ;

7). ຄຸ້ມຄອງ, ຕິດຕາມ, ກວດກາ ແລະ ປັບປຸງການເຄື່ອນໄຫວຂອງຄະນະກຳມະການກິລາແຫ່ງຊາດ, ສະຫະພັນກິລາແຫ່ງຊາດ, ແຂວງ ແລະ ຂະແໜງການ, ສະມາຄົມ, ສະໂມສອນກິລາ-ກາຍຍະກຳ ແລະ ນຳໃຊ້ງົບປະມານຂອງລັດ, ທຶນຊ່ວຍເຫຼືອຂອງສາກົນ ​ໃນຂະແໜງການສຶກສາ ແລະ ກິລາ ໃຫ້ມີປະສິດທິພາບສູງ ຖືກຕ້ອງຕາມກົດໝາຍ ແລະ ລະບຽບການ.

 

  1. ຕໍ່ບົດລາຍງານການຈັດຕັ້ງປະຕິບັດແຜນການທ່ອງທ່ຽວ ແລະ ການເປີດປະເທດ, ຕິດພັນກັບການປ້ອງກັນ ແລະ ຮັບມືການແຜ່ລະບາດ ຂອງພະຍາດໂຄວິດ-19:

​ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ເປີດປະເທດ ຕ້ອນຮັບນັກທ່ອງທ່ຽວເຕັມຮູບແບບ ຕິດພັນກັບການປ້ອງກັນ ແລະ ຮັບມືການແຜ່ລະບາດຂອງພະຍາດໂຄວິດ-19 ລັດຖະບານກໍໄດ້ກໍານົດທິດທາງ ແລະ ວາງແນວທາງຟື້ນຟູການທ່ອງທ່ຽວ ຂອງ ສປປລາວ ໄລຍະ 2021-2025, ເພື່ອກະຕຸ້ນເສດຖະກິດແຫ່ງຊາດ, ເປັນການວາງທິດທາງໃຫ້ສອດຄ່ອງກັບສະພາບ ແລະ ເງື່ອນໄຂຄວາມເປັນຈິງຂອງປະເທດເຮົາໃນປັດຈຸບັນທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ແລະ ສະພາບຫັນປ່ຽນດ້ານເສດຖະກິດຂອງໂລກ ຊຶ່ງລັດຖະ ບານ ໄດ້ກໍານົດມີ 3 ທິດທາງ ຄື: ການພັດທະນາພື້ນຖານໂຄງລ່າງການທ່ອງທ່ຽວ, ການໂຄສະນາການທ່ອງທ່ຽວ, ການຄຸ້ມຄອງການສ້າງຄວາມເຂັ້ມແຂງບຸກຄະລາກອນທ່ອງທ່ຽວ; ຕໍ່​ວຽກງານ​ດັ່ງກ່າວ​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ ​ໄດ້​ມີຄ​ໍາເຫັນ​ເພີ່ມ​ຕື່ມ ​ເປັນ​ຕົ້ນ:

1). ສະພາບການທ່ອງທ່ຽວຜ່ານການຈັດຕັ້ງປະຕິບັດທົດລອງເປີດເຂດທ່ອງທ່ຽວສີຂຽວ ເຫັນວ່າມາດຕະການຄວບຄຸມພະຍາດໂຄວິດ-19 ໄດ້ສ້າງຄວາມຫຍຸ້ງຍາກໃຫ້ແກ່ນັກທ່ອງທ່ຽວ ແລະ ມີຄ່າໃຊ້ຈ່າຍສູງ ເຮັດໃຫ້ນັກທ່ອງທ່ຽວບໍ່ຢາກເດີນທາງມາທ່ອງທ່ຽວຢູ່ ສປປລາວ;

2). ແຫຼ່ງທ່ອງທ່ຽວສີຂຽວມີຫຼາຍ ແຕ່ການຄຸ້ມຄອງ, ການຂຶ້ນບັນຊີ ແຫຼ່ງທ່ອງທ່ຽວ ແລະ ເມືອງທ່ອງທ່ຽວ ບໍ່ທັນຄົບຖ້ວນ, ການສຳປະທານບາງແຫຼ່ງທ່ອງທ່ຽວ ຍັງບໍ່ທັນມີບົດວິພາກ ເພື່ອເປັນຂໍ້ມູນໃນການພັດທະນາ; ບາງໂຄງການພັດທະນາໃນບໍລິເວນແຫຼ່ງທ່ອງທ່ຽວຍັງສົ່ງຜົນກະທົບທາງລົບຕໍ່ແຫຼ່ງທ່ອງທ່ຽວທາງວັດທະນະທຳ, ປະຫວັດສາດ ແລະ ທຳມະຊາດ;

3). ຄວນມີການຊຸກຍູ້, ສົ່ງເສີມ ການຜະລິດ ແລະ ຈຳໜ່າຍ ເຄື່ອງທີ່ລະນຶກ ຜະລິດຕະພັນທີ່ເປັນເອກະລັກຂອງແຕ່ລະແຫຼ່ງທ່ອງທ່ຽວ ເພື່ອການສ້າງລາຍຮັບໃຫ້ແກ່ປະຊາຊົນຢູ່ພື້ນທີ່ດັ່ງກ່າວ;

4). ເພື່ອເຮັດໃຫ້ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ເປີດປະເທດ ຕ້ອນຮັບນັກທ່ອງທ່ຽວແບບເຕັມຮູບແບບ ຄວນພິຈາລະນາການເພີ່ມກຳນົດເວລາວິຊ່າໃຫ້ນັກທ່ອງທ່ຽວ ເພື່ອດຶງດູດນັກທ່ອງທ່ຽວ ແລະ ນຳເງິນຕາຕ່າງປະເທດ ເຂົ້າ ສປປ ລາວ ໃຫ້ຫຼາຍຂຶ້ນ;

5), ສະເໜີຄົ້ນຄວ້າ, ປັບປຸງການເຂົ້າເຖິງແຫຼ່ງທຶນດອກເບ້ຍຕໍ່າ ໃຫ້ແກ່ຜູ້ປະກອບການດ້ານການທ່ອງທ່ຽວ ໃຫ້ໄດ້ຫຼາຍຂຶ້ນ;

6). ປັບປຸງການບໍລິການ ການທ່ອງທ່ຽວ, ດ້ານຄວາມປອດໄພ, ສິ່ງອໍານວຍຄວາມສະດວກ ເປັນຕົ້ນ ການປະສານງານລະຫວ່າງພາກສ່ວນກ່ຽວຂ້ອງ, ເສັ້ນທາງເຂົ້າເຖິງແຫຼ່ງທ່ອງທ່ຽວ, ຄ່າອາຫານ ແລະ ເຄື່ອງດື່ມ ຢູ່ສະຖານທີ່ທ່ອງທ່ຽວຕ່າງໆໃຫ້ມີລາຄາສົມເຫດສົມຜົນ ແລະ ອື່ນໆ, ທີ່ພວກເຮົາຈະຕ້ອງໄດ້ສືບຕໍ່ນໍາໄປຄົ້ນຄວ້າພິຈາລະນາແກ້ໄຂ.

ນອກຈາກນັ້ນ, ກອງປະຊຸມ ຍັງໄດ້ມີການຊັກຖາມ ຂອງບັນດາທ່ານສະມາຊິກສະພາແຫ່ງຊາດທີ່ມີຄວາມສົນໃຈ ແລະ ຂະແໜງການ ໄດ້ຂຶ້ນຊີ້ແຈງ, ອະທິບາຍຕໍ່ໍຄໍາຊັກຖາມ ລວມມີ 5 ຂະແໜງ ການ (ກະຊວງ​ສຶກສາ​ທິການ ​ແລະ ກິລາ, ກະຊວງ​ເຕັກ​ໂຕ​ໂລ​ຊີ ​ແລະ ການ​ສື່ສານ, ກະຊວງ​ຖະ​ແຫຼ​ງ ຂ່າວ, ​ວັດ​ທະນະທຳ ​ແລະ ທ່ອງ​ທ່ຽວ, ກະຊວງ​ໂຍທາ​ທິການ ​ແລະ ຂົນ​ສົ່ງ, ກະຊວງ​ປ້ອງ​ກັນ​ຄວາມ​ສະຫງົບ).

ທັງໝົດນັ້ນ, ແມ່ນໄດ້ສະແດງເຖິງຄວາມຮັບຜິດຊອບຂອງຂະແໜງການ ເພື່ອຊຸກຍູ້ການຈັດຕັ້ງ ປະຕິບັດບັນດາຄາດໝາຍຂະແໜງສຶກສາທິການ ແລະ ກິລາ, ກໍຄືການປັບປຸງຄຸນນະພາບລະບົບການຮຽນ-ການສອນທຸກຊັ້ນທຸກສາຍ ໃນໄລຍະໃໝ່ ແລະ ການຈັດຕັ້ງປະຕິບັດແຜນການທ່ອງທ່ຽວສີຂຽວ ແລະ ການເປີດປະເທດ, ຕິດພັນກັບການປ້ອງກັນ-ຮັບມືກັບການແຜ່ລະບາດຂອງພະຍາດໂຄວິດ-19 ໃຫ້ມີຜົນສໍາເລັດຕາມແຜນການທີ່ວາງໄວ້.

ເວົ້າລວມແລ້ວ, ການປະກອບຄໍາຄິດຄໍາເຫັນ ໃນວັນທີ 17 ມິຖຸນາ 2022, ມີບັນຍາກາດສ້າງສັນ  ແລະ ຟົດຟື້ນ. ຂໍແຈ້ງມາຍັງທ່ານຊາບຕື່ມວ່າ: ໃນວັນທີ 8 ກໍລະກົດ 2022 ທີ່ຈະມາເຖິງນີ້, ກອງປະຊຸມສະພາແຫ່ງຊາດ ຈະໄດ້ພິຈາລະນາ ແລະ ລົງຄະແນນສຽງຮັບຮອງເອົາວຽກງານດັ່ງກ່າວ ເປັນມະຕິຂອງກອງປະຊຸມສະພາແຫ່ງຊາດ, ເພື່ອມອບໃຫ້ລັດຖະບານ ນໍາໄປຈັດຕັ້ງປະຕິບັດ. ພ້ອມກັນນັ້ນ, ບັນດາທ່ານສະມາຊິກສະພາແຫ່ງຊາດ ກໍມີໜ້າທີ່ຕິດຕາມກວດກາ, ຊຸກຍູ້ລັດຖະບານ ໃນການຈັດຕັ້ງປະຕິບັດບັນດາມະຕິດັ່ງກ່າວ ແລະ ຈະໄດ້ລາຍງານຕໍ່ກອງປະຊຸມສະໄໝສາມັນ ຂອງສະພາແຫ່ງຊາດ ໃນຕໍ່ໜ້າ.

ອີກເທື່ອໜຶ່ງ, ໃນນາມຕາງໜ້າຄະນະປະຈຳສະພາແຫ່ງຊາດ, ຂໍຂອບໃຈມາຍັງ ພະນັກງານ-ລັດຖະກອນ, ທະຫານ-ຕຳຫຼວດ, ນັກຮຽນ-ນັກສຶກສາ, ປັນຍາຊົນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າ ໃນທົ່ວປະເທດ ແລະ ພີ່ນ້ອງຊາວລາວ ທີ່ອາໄສຢູ່ຕ່າງປະເທດ, ທີ່ໄດ້ຕິດຕາມການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນຄັ້ງນີ້.

ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈ ມາຍັງພາກສ່ວນສື່ມວນຊົນທຸກສຳນັກ, ລວມທັງໂທລະພາບແຫ່ງຊາດ ແລະ ວິທະຍຸກະຈາຍສຽງແຫ່ງຊາດ, ສື່ສິ່ງພິມປະເພດຕ່າງໆ ທີ່ໄດ້ຕິດຕາມຢ່າງໃກ້ຊິດ, ເພື່ອເກັບກໍາຂ່າວ ແລະ ເຜີຍແຜ່ຢ່າງທັນການ ກ່ຽວກັບການດຳເນີນກອງປະຊຸມໃນຄັ້ງນີ້ ໃຫ້ແກ່ສັງຄົມ ໄດ້ຮັບຊາບຢ່າງທົ່ວເຖິງ.