ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 03 ມິຖຸນາ 2022, ທ່ານ ນາງ ພິດສະໄໝ ຕົ້ນສະຫວັນ ຮອງປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຢູ່ພະແນກການເງິນ ນວ ໂດຍການຕ້ອນຮັບຂອງທ່ານ ນາງ ພວງສີ ເພົ້າລາວັນ ຮອງຫົວໜ້າພະແນກການເງິນ ນວ.

ທ່ານ ນາງ ພວງສີ ເພົ້າລາວັນ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານໄລຍະຜ່ານມາ ແລະ ທິດທາງແຜນການເຄື່ອນໄຫວໃນຕໍ່ໜ້າ ໃຫ້ຄະນະລົງເຮັດວຽກຮັບຊາບ ດັ່ງນີ້: ໄລຍະ 05 ເດືອນ ຕົ້ນປີ 2022, ພະແນກການເງິນ ນວ ສາມາດຈັດຕັ້ງປະຕິບັດແຜນງົບປະມານແຫ່ງລັດ ໂດຍສາມາດເກັບລາຍຮັບໄດ້ 31,02% ທຽບໃສ່ແຜນການປີ 2022, ໃນນັ້ນ ລາຍຮັບພູດສູນກາງ ປະຕິບັດໄດ້ 28,33% ແລະ ລາຍຮັບທ້ອງຖິ່ນ ປະຕິບັດໄດ້ 38,47% ຖ້າທຽບໃສ່ໄລຍະດຽວກັນຂອງປີຜ່ານມາ ເຫັນວ່າເພີ່ມຂຶ້ນ 24,36%; ພ້ອມດຽວກັນນີ້ ກໍສາມາດຈັດຕັ້ງປະຕິບັດດ້ານລາຍຈ່າຍ 33,86% ຂອງແຜນການປີ 2022, ໃນນັ້ນ ລາຍຈ່າຍບໍລິຫານ (ປົກກະຕິ) ເທົ່າກັບ 33,85% ແລະ ລາຍຈ່າຍໃນການລົງທຶນຂອງລັດ ເທົ່າກັບ 18,56%. ໂດຍລວມແລ້ວ, ການປະຕິບັດລາຍຈ່າຍສ່ວນໃຫຍ່ ແມ່ນໄດ້ສຸມໃສ່ການເບີກຈ່າຍເງິນເດືອນ ແລະ ເງິນນະໂຍບາຍ ເປັນບູລິມະສິດອັນດັບໜຶ່ງ, ສ່ວນລາຍຈ່າຍບໍລິຫານ ແລະ ດັດສົມສົ່ງເສີມ ແມ່ນປະຕິບັດມາດຕະການຄຸ້ມຄອງລາຍຈ່າຍຢ່າງຮັດກຸມ ແລະ ປະຢັດມັດທະຍັດ ແນໃສ່ເພື່ອຮັບປະກັນສະພາບຄ່ອງໃນລະບົບງົບປະມານ. ນອກຈາກນີ້, ຍັງສາມາດປະຕິບັດການດຸ່ນດ່ຽງພັນທະຕາມແຜນສູນກາງໄດ້ 26,25% ຂອງແຜນການປີ 2022.

ຜ່ານການຈັດຕັ້ງປະຕິບັດວຽກງານໄລຍະຜ່ານມາ, ພະແນກການເງິນ ນວ ກໍໄດ້ເອົາໃຈໃສ່ໃນການປະຕິບັດນິຕິກຳລຸ່ມກົດໝາຍ ທີ່ກ່ຽວຂ້ອງກັບການຈັດເກັບລາຍຮັບຢ່າງເຂັ້ມງວດ ເພື່ອຮັບປະກັນໃຫ້ແກ່ການສ້າງ ແລະ ຂະຫຍາຍຖານລາຍຮັບ, ຄຸ້ມຄອງການຈັດເກັບລາຍຮັບ, ຂຸດຄົ້ນລາຍຮັບທີ່ບົ່ມຊ້ອນ ພ້ອມທັງສຳຫຼວດຖານລາຍຮັບໃໝ່ ເພື່ອເພີ່ມລາຍຮັບເຂົ້າງົບປະມານ; ໄດ້ຫັນເປັນທັນສະໄໝໃນການຈັດເກັບລາຍຮັບຈາກການຄຸ້ມຄອງການຈົດທະບຽນຊັບສິນຂອງລັດ ໂດຍສາມາດເຊື່ອມຕໍ່ຖານຂໍ້ມູນກັບກອງຄຸ້ມຄອງພາຫະນະ ແລະ ການຂັບຂີ່ ນະຄອນຫຼວງ ເຊິ່ງການອອກໃບຄິດໄລ່ມອບພັນທະຊັບສິນ ຈະມີລະບົບການສະໜອງຂໍ້ມູນປະເພດລົດ, ເລກຈັກ, ເລກຖັງ, ມູນຄ່າລາຄາ ລວມໄປເຖິງການຄິດໄລ່ຄ່າທຳນຽມຕ່າງໆຕາມລະບຽບການ ໂດຍອັດຕະໂນມັດ; ສົ່ງເສີມການນຳໃຊ້ເຄື່ອງມືທັນສະໄໝ ເພື່ອເກັບລາຍຮັບໃຫ້ຂະຫຍາຍຕົວຢ່າງກວ້າງຂວາງ, ສ້າງເງື່ອນໄຂໃຫ້ຫົວໜ່ວຍທຸລະກິດເຂົ້າໃນລະບົບຄຸ້ມຄອງຂໍ້ມູນໃນການເກັບລາຍຮັບ (TaxRIS) ເຊິ່ງສາມາດປະຕິບັດໄດ້ 3,539 ຫົວໜ່ວຍ ເທົ່າກັບ 54,44% ຂອງແຜນການປີ 2022 ເມື່ອທຽບໃສ່ໄລຍະດຽວກັນ ໃນປີ 2021 ສາມາດປະຕິບັດໄດ້ເກີນ 1.215 ຫົວໜ່ວຍ; ແກ້ໄຂການຮົ່ວໄຫຼຂອງງົບປະມານໃນການຈັດຕັ້ງປະຕິບັດຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານ; ສືບຕໍ່ເລັ່ງທວງ ແລະ ເກັບຄືນບັນດາລາຍຮັບທີ່ເປັນໜີ້ຄ້າງມອບຈາກບັນດາວິສາຫະກິດ, ໂຄງການສຳປະທານ, ຄ່າທຳນຽມ ແລະ ຄ່າສຳປະທານທີ່ດິນ ທີ່ຄ້າງມອບມາຫຼາຍປີ; ສຸມໃສ່ຊອກຄົ້ນແຫຼ່ງລາຍຮັບທີ່ເປັນທ່າແຮງບົ່ມຊ້ອນ; ຕິດຕາມກວດກາ ການລັກລອບຂຸດຄົ້ນ ແລະ ເຄື່ອນຍ້າຍຊັບພະຍາກອນທຳມະຊາດ ທີ່ບໍ່ຖືກຕ້ອງຕາມກົດໝາຍ ເພື່ອປະຕິບັດມາດຕະການຮິບ, ປັບໄໝ ແລະ ມອບເຂົ້າງົບປະມານໃຫ້ຄົບຖ້ວນ.


ໂອກາດດຽວກັນ, ຄະນະລົງເຮັດວຽກ ກໍໄດ້ມີບາງຄຳຖາມເຈາະຈີ້ມຕໍ່ກັບພະແນກການເງິນ ນວ ເຊິ່ງຄະນະພະແນກ ກໍໄດ້ຊີ້ແຈງ ແລະ ແລກປ່ຽນບາງບັນຫາຕໍ່ຄະນະລົງເຮັດວຽກ ເພື່ອຊອກຫາວິທີແກ້ໄຂຮ່ວມກັນໃນຕໍ່ໜ້າ.