ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ເພື່ອເປັນການຮັບປະກັນໃຫ້ການຄົ້ນຄວ້າເນື້ອໃນຂອງຮ່າງກົດໝາຍ, ການຈັດຕັ້ງທາບທາມປະກອບຄຳຄິດຄຳເຫັນກວ້າງຂວາງ ແລະ ທັນຕາມກຳນົດເວລາ ຕາມແຜນການທີ່ໄດ້ກຳນົດໄວ້. ກຳມາທິການຍຸຕິທຳ ສະພາແຫ່ງຊາດ ໄດ້ຈັດກອງປະຊຸມທາບທາມການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ໃນລະຫວ່າງວັນທີ 17-18 ທັນວາ 2021 ທີ່ແຂວງບໍລິຄຳໄຊ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ເຂົ້າຮ່ວມມີຮອງປະທານກຳມາທິການຍຸຕິທຳ, ຮອງປະທານສະພາປະຊາຊົນແຂວງ (ສພຂ) ບໍລິຄຳໄຊ, ຄະນະກຳມະການຍຸຕິທຳ ແລະ ປກຊ-ປກສ, ຕາງໜ້າຈາກອົງການໄອຍະການປະຊາຊົນແຂວງ, ສານປະຊາຊົນແຂວງ, ກອງບັນຊາການ ປກສ ແຂວງ, ພະແນກຍຸຕິທຳແຂວງ ແລະ ອົງການກວດກາລັດແຂວງ.

ທ່ານ ຄຳແພງ ວິລະພັນ ໄດ້ມີຄຳເຫັນກ່າວເປີດກອງປະຊຸມວ່າ: ກອງປະຊຸມທາບທາມຄຳເຫັນໃສ່ຮ່າງປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ຄັ້ງນີ້ ຈະໄດ້ພ້ອມກັນຄົ້ນຄວ້າ ແລະ ແລກປ່ຽນຄຳເຫັນ ຕໍ່ກັບການທົດລອງກົນໄກການແກ້ໄຂຄຳຮ້ອງທຸກ ແລະ ທາບທາມຄຳເຫັນຮ່າງປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ສະບັບປີ 2016 ທີ່ໄດ້ນຳໃຊ້ຜ່ານມາເປັນເວລາ 5 ປີກວ່າ ແນໃສ່ເຮັດໃຫ້ການຮັບ ແລະ ພິຈາລະນາຄຳຮ້ອງຂອງສະພາແຫ່ງຊາດ ແລະ ພາກສ່ວນກ່ຽວຂ້ອງຖືກຕ້ອງ ແລະ ສອດຄ່ອງຕາມມະຕິຂອງກອງປະຊຸມຄົບຄະນະບໍລິຫານງານສູນກາງພັກ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ແລະ ມະຕິ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ແລະ ເປັນການນຳເອົາການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕາມພາລະບົດບາດຂອງໃຜລາວ, ທັງເປັນການເພີ່ມທະວີການຕິດຕາມກວດກາຂອງສະພາແຫ່ງຊາດ ຕໍ່ກັບຄວາມຮັບຜິດຊອບການເມືອງຂອງອົງການທີ່ມີສິດ ແລະ ໜ້າທີ່ ໃນການແກ້ໄຂຄຳຮ້ອງທຸກ ເພື່ອຮັບປະກັນໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນສາມາດເຂົ້າເຖິງຂະບວນການຍຸຕິທຳຫລາຍຂຶ້ນ ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມ ມີຄວາມຍຸຕິທຳ ແລະ ໂປ່ງໃສ. ທ່ານຍັງໄດ້ຮຽກຮ້ອງມາຍັງຄະນະນຳ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງຈົ່ງສຸມໃສ່ຄົ້ນຄວ້າ ປະກອບຄໍາຄິດຄໍາເຫັນ ຢ່າງກົງໄປກົງມາດ້ວຍເຫດດ້ວຍຜົນ ແລະ ຍົກເອົາປະສົບການ, ບົດຮຽນ ໃນການປະຕິບັດວຽກງານຕົວຈິງ ມາແລກປ່ຽນຄຳຄິດຄຳເຫັນນຳກັນ ເພື່ອພ້ອມກັນນຳເອົາບົດຮຽນທີ່ເປັນປະໂຫຍດມາປັບປຸງເຂົ້າໃນກົດໝາຍສະບັບນີ້ ໃຫ້ມີຄວາມຮັດກຸມ, ສອດຄ່ອງ ກັບສະພາບຄວາມເປັນຈິງ, ຖືກຕ້ອງຕາມລັດຖະທຳມະນູນ ແລະ ແນວທາງຂອງພັກ.

ໃນກອງປະຊຸມໄດ້ຮັບຟັງການສະເໜີແລກປ່ຽນບົດຮຽນການຮັບ ແລະ ພິຈາລະນາ ຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດ ແລະ ຄະນະປະຈຳສະພາປະຊາຊົນແຂວງ; ບົດເນື້ອໃນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ (ພາກທີ I, II, III, IV, V, VI, VII ແລະ ພາກທີ VIII). ຈາກນັ້ນ, ຜູ້ເຂົ້າຮ່ວມໄດ້ຜັດປ່ຽນກັນແລກປ່ຽນ ປະກອບຄຳຄິດຄຳເຫັນຢ່າງສ້າງສັນ ແລະ ກົງໄປກົງມາ ເພື່ອຮັບປະກັນໃຫ້ແກ່ການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ໄດ້ດຳເນີນໄປຕາມຂັ້ນຕອນຕາມທີ່ກຳນົດໄວ້ໃນກົດໝາຍວ່າດ້ວຍການສ້າງນິຕິກຳ, ຮັບປະກັນໃຫ້ກົດໝາຍມີເນື້ອໃນຄົບຖ້ວນ, ສົມບູນ ແລະ ສອດຄ່ອງກັບແນວທາງ-ນະໂຍບາຍຂອງພັກໃນການຄຸ້ມຄອງເສດຖະ ກິດ-ສັງຄົມ ຕາມກົດໝາຍ ແລະ ສອດຄ່ອງຕາມພາລະບົດບາດ, ສິດ ແລະ ໜ້າທີ່ຂອງບັນດາອົງການລັດ ທີ່ມີຄວາມຮັບຜິດຊອບໃນການແກ້ໄຂຄຳຮ້ອງທຸກ.

(ກົງທະນູຄຳພິພັດເສລີ)