(ສພຊ) ທະນາຄານພົງສະຫວັນ ໄດ້ນຳເງິນຈຳນວນ 30 ລ້ານກີບ ມອບໃຫ້ກອງທຶນຊ່ວຍເຫຼືອສັງຄົມຂອງສະ ພາແຫ່ງຊາດ ເພື່ອນຳໄປມອບຕໍ່ໃຫ້ປະຊາຊົນທີ່ຖືກໄພພິບັດຢູ່ແຂວງຕ່າງໆທົ່ວປະເທດ ໂດຍການມອບຂອງທ່ານ ໄພບູນ ພົງສະຫວັນ ເລຂາໜ່ວຍພັກກຸ່ມບໍລິສັດ ພົງສະ ຫວັນ, ຜູ້ອຳນວຍການໃຫຍ່ທະນາຄານພົງສະຫວັນ ແລະ ຮັບໂດຍທ່ານ ນາງ ມະນີວັນ ເຢຍປາວເຮີ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ທັງເປັນຮອງປະທານກອງທຶນຊ່ວຍເຫຼືອສັງຄົມຂອງສະພາແຫ່ງ ຊາດ; ມີທ່ານ ນາງ ມະໂນລາ ຫຼວງໂຄດ ຮອງຜູ້ອຳນວຍ ການໃຫຍ່, ບັນດາທ່ານຮອງປະທານ, ຄະນະຮັບຜິດຊອບກອງທຶນດັ່ງກ່າວ ແລະ ຜູ້ຊ່ວຍວຽກຂອງສອງຝ່າຍເຂົ້າຮ່ວມເປັນສັກຂີພິຍານ.
ໃນໂອກາດດຽວກັນ, ທ່ານ ນາງ ມະນີວັນ ເຢຍປາວເຮີ ໄດ້ຕາງໜ້າໃຫ້ຄະນະເລຂາທິການສະພາແຫ່ງຊາດ ກໍຄືຄະນະກອງທຶນຊ່ວຍເຫຼືອສັງຄົມຂອງສະພາແຫ່ງຊາດ ມອບໃບຍ້ອງຍໍໃຫ້ທະນາຄານພົງສະຫວັນ ເນື່ອງຈາກມີຜົນງານດີເດັ່ນໃນການຊ່ວຍເຫຼືອທຶນຊ່ວຍຜູ້ປະສົບໄພພິບັດໃນຄັ້ງນີ້ ໂດຍການຮັບຂອງທ່ານ ໄພບູນ ພົງສະຫວັນ.
(ພາບ ແລະ ຂ່າວ: ນາງ ປາກາລັກ ພົມມີໄຊ)