ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະລະຫວ່າງ ສອງສະພາແຫ່ງຊາດລາວ ແລະ ສະພາແຫ່ງຊາດຫວຽດນາມ ແລະ ສະເຫຼີມສະຫຼອງປີສາມັກຄີມິດຕະພາບ ລະຫວ່າງ ລາວ-ຫວຽດນາມ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ແລະ 45 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ລາວ-ຫວຽດນາມ; ພ້ອມທັງເປັນການສ້າງຄວາມສາມັກຄີ ລະຫວ່າງ ສະພາແຫ່ງຊາດລາວ-ສະພາແຫ່ງຊາດຫວຽດນາມ ລວມທັງອົງການຈັດຕັ້ງລັດໃນຂົງເຂດການຕ່າງປະເທດ ແລະ ສະຖານທູດຫວຽດນາມ ປະຈຳ ສປປລາວ. ໃນວັນທີ 24 ກັນຍາ 2022 ສະພາແຫ່ງຊາດ ໄດ້ຈັດງານແຂ່ງຂັນລົດຖີບມິດຕະພາບ ລາວ-ຫວຽດນາມ ປະຈໍາປີ 2022 ເຊິ່ງງານດັ່ງກ່າວ ໄດ້ຮັບການສະໜັບສະໜູນຫຼັກຈາກ ທະນາຄານພັດທະນາລາວ ຈໍາກັດ ແລະ ຊຸກຍູ້ງົບປະມານ ໃຫ້ກົມສື່ມວນຊົນ ຄະນະເລຂາທິການສະພາແຫ່ງຊາດ ລວມມູນຄ່າ 500 ລ້ານກວ່າກີບ.


ເພື່ອເປັນການສັນລະເສີນຜົນງານ ແລະ ຄຸນງາມຄວາມດີດັ່ງກ່າວ ຄະນະປະຈໍາສະພາແຫ່ງຊາດ ຈຶ່ງໄດ້ມອບໃບຍ້ອງຍໍ ໃຫ້ທະນາຄານພັດທະນາລາວ ຕາງໜ້າສະພາແຫ່ງຊາດມອບໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ, ຕາງໜ້າທະນາຄານພັດທະນາລາວຮັບໂດຍທ່ານ ວຽງຄໍາ ວັນສີລາລົມ ຮອງຜູ້ອໍານວຍການທະນາຄານພັດທະນາລາວ ໃນພິທີດັ່ງກ່າວ ໂດຍການເຂົ້າຮ່ວມເປັນສັກຂີພິຍານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍພະນັກງານທີ່ກ່ຽວຂ້ອງຂອງສອງຝ່າຍ.
ໃນປີຜ່ານມາ, ທະນາຄານພັດທະນາລາວ ໄດ້ໃຫ້ການສະໜັບສະໜູນ ສະພາແຫ່ງຊາດ ໂດຍສະເພາະກົມສື່ມວນຊົນ ຄະນະເລຂາທິການສະພາແຫ່ງຊາດ ໄດ້ຮັບການອຸປະຖໍາຈາກ ທະນາຄານພັດທະນາລາວ ມູນຄ່າ 200 ລ້ານກີບ ເຂົ້າຮັບໃຊ້ໃນວຽກງານສື່ມວນຊົນ, ສະເພາະປີນີ້ ທະນາຄານພັດທະນາລາວ ໄດ້ໃຫ້ການອຸປະຖໍາ ກົມສື່ມວນຊົນ ຄະນະເລຂາ ທິການສະພາແຫ່ງຊາດ ມູນຄ່າ 300 ລ້ານກວ່າກີບ ໃນນັ້ນ, ໄດ້ຊື້ກ້ອງຖ່າຍຮູບ ແລະ ກ້ອງວິດີໂອ ເພື່ອປະກອບສ່ວນຮັບໃຊ້ເຂົ້າໃນວຽກງານສື່ມວນຊົນຂອງສະພາແຫ່ງຊາດ ຫວັງວ່າຈະໄດ້ຮັບການອຸປະຖໍາຕື່ມອີກໃນປີຕໍ່ໆໄປ.